1 Urana u ro reve Kora ulobo wa Izara, mawun ma tsukaya ma̱ Koha, vu ugundo wa̱ Levi u yuwaan tsugbain tsa Musa aciyogbamu, Datan na̱ Abiram olobo a Eliyabu a̱ da̱na̱ ta̱ oɓolo na̱ a̱yi, oɓolo na̱ On ulobo wa Pele umatsun wa̱ Roben. 2 Reve ama a nda o ɓolo una̱ na aza a Israꞌila ama ukpakure na̱ kupoton (250), azagbain a na a ɗangulai a na ama e revei ne ele. 3 Reve ama'a o ɓoloto, a̱vu a̱ ꞌya̱wa̱ uba̱ta̱ wa Musa na̱ Haruna, reve a damma le, <<Icigi i tsugbain tsa̱ ɗu tsu ura ta̱ wira̱! Ama suru a̱ ta̱ na akiza e ekere a̱ A̱sulazuva, waru A̱sulazuva o to oɓolo ne ele. Adama a̱ nye a ɗa i tarai aciya̱ɗu she damma i la'a ta̱ iɓolo ya ama a̱ A̱sulazuva a nda suru?>>

4 Ana Musa uwwai ne, reve u von ma̱kpa̱ɓa̱ e iɗa. 5 Reve u damma Kora na aza a na oo tono yi, <<Nfa'an nu usana, A̱sulazuva o to roco za na ri za va̱ yi, na̱ za na ri na akiza, waru u ta zuwa vuma ndolo u rawa zuzu na̱ a̱yi. Za na u ɗangulai, a̱yi ɗa waa lyawa u rawa zuzu na̱ a̱yi. 6 A̱vu Kora, na aza a na oo tono wu, nda ili na yaa yuwan: Nfa'an i tara ayimba o ukula̱tosu wa̱ a̱tsuka̱ a̱ ma̱guru. 7 Waru i zuwa pe akina na̱ a̱tsuka̱ a̱ ma̱ka̱ka̱n ma̱ A̱sulazuva. Vuma na A̱sulazuva a ɗangulai, a̱yi ɗa za va akiza. A̱ɗu nan Levi yu ura ta̱ wira̱!>>

8 Reve waru Musa dammisa Kora, <<Gogo nda poloi atsuvu, a̱ɗu nan Levi! 9 U rawa ɗu a na A̱sula̱ a Isra'ila a tawa nɗu a̱tsuma̱ a akapi a ama a Isra'ila, a̱vu u ta̱wa̱to ɗu zuzu na̱ a̱yi, adama i yuwan ulinga o Oogodo o Uga'asusan, a̱vu yi isawan a̱ ma̱ka̱ka̱n ma ama'a i yuwaan le a̱ga̱nda̱ shi? 10 U rawato ɗu ta̱ oɓolo na̱ a̱za̱ a̱ ɗu nan Levi zuzu na̱ a̱yi, agba gogo i to mpolo i tsura̱ tsuganu fo. 11 Adama o ndolo a̱ɗu na aza a na oo tono ɗu suru i 'ya̱sa̱a̱n ta̱ A̱sulazuva aci a na i ɓolotoi uba̱ta̱ u ta̱. Zane ɗa Haruna hali na yaa yuwusan adanshawuya a aci a̱ yi?>>

12 Reve Musa lyungu e ɗe Datan na̱ Abiram, olobo a Eliyabu. Agba a̱vu a damma, <<Tsa̱a̱ ta̱wa̱ shi! 13 U rawa wu shi a na vu uta̱ ntsu diga e iɗa ya Masar, iɗa i na yee yeneshe maani ni ishiki, adama vu una tsu a̱tsumona? Gogo waru vu cigai ta̱ vo o'wo mogono ma̱ tsu ma ɗa? 14 Babu na̱ a̱yi ndolo, koto vu ta̱wa̱to tsu a̱tsuma̱ e iɗa i na yee yeneshe na̱ maani ni ishiki shi. Waru vu ca tsu agadu a̱ a̱ɗuma̱ na̱ a̱ɗuma̱ a̱ ina̱bi shi. Vu to mpolo vu luluma̱ tsu? O'o, tsa̱a̱ ta̱wa̱ shi!>> 15 A̱vu Musa yuwan upan lon, reve u damma A̱sulazuva, <<She vu ushi kucci le wan. Ko mololi ma̱ ta̱ n usa le i ɗa shi, agba n yuwaan za ro a̱tsuma̱ e le unusu shi.>>

16 Reve Musa damma Kora, <<A̱vu na aza a na oo tono wu suru i ta̱wa̱ a̱ ma̱ka̱ka̱n ma̱ A̱sulazuva nfa'an, a̱vu ne ele na̱ Haruna. 17 Vuma suru u tara aayimba o ukula̱tosu wa̱ a̱tsuka̱ a̱ yi, u tsun pe a̱tsuka̱, a̱vu u ta̱wa̱ na̱ a̱yi a̱ ma̱ka̱ka̱n ma̱ A̱sulazuva, ayimba ukpakure na̱ kupoton (250) suru suru. A̱vu na̱ Haruna fo i ta̱ ta̱wa̱a̱ na ayimba o ukula̱tosu wa̱ a̱tsuka̱.>>

18 <<A̱vu vuma suru tara aayimba o ukula̱tosu wa̱ a̱tsuka̱, reve u tsun pe akina na̱ a̱tsuka̱. Reve e isawan oɓolo na̱ Musa na̱ Haruna o una̱ntsu wo Oogodo o Uga'asusan.>> 19 Ana Kora ɓolotoi aza a na oo tono yi suru a̱ nla̱ngi na̱ Musa o una̱ntsu wo Oogodo o Uga'asusan, reve tsugbain tsa̱ A̱sulazuva tsa̱ ta̱wa̱ uba̱ta̱ wo oɓolo a ama'a suru. 20 Reve A̱sulazuva a yuwan adanshi na̱ Musa na̱ Haruna adansa, 21 <<Kakasai aciya̱ɗu no oɓolo a ama a nda, tsura̱ n kototo le nu uta̱.>>

22 Amma Musa na̱ Haruna o von ta̱ ma̱kpa̱ɓa̱ reve a damma, <<A̱sula̱, A̱sula̱ a wuma wu vaɗilima̱ suru. Vu ta yuwan upan no oɓolo a ama'a suru agba vuma ta̱ ɗa yuwain unusu?>>

23 Reve A̱sulazuva a yuwan adanshi na̱ Musa u damma, 24 <<Vu damma iɓolo ya amaꞌa, <Takatsuwai alanga no oogodo a̱ Kora na̱ Datan na̱ Abiram.> >>

25 Reve Musa ꞌyon u 'ya̱wa̱ uba̱ta̱ wa Datan na̱ Abiram reve mbara ma Isra'ila n kuru yi. 26 Reve Musa yuwan adanshi ni iɓolo ya ama'a u damma, <<Ka̱mba̱i na̱ a̱ca̱pa̱ diga o ogodo a ama a vama a nda! Waru she i ju'wa̱n ko ili i ta̱ a̱tsuma̱ e itana i le wan, na̱ ne ɗa shi a ta raɗa ɗu adama a̱ nusu le suru.>> 27 Ɗaɗa ama'a a takatsuwai diga o oogodo a Kora, na̱ Datan, na̱ Abiram. A̱vu Datan na̱ Abiram o uta̱ e isawan a̱ na̱ntsu vo ogodo e le, oɓolo na̱ a̱ma̱ci e le na̱ muwun n le na̱ muwun n kekeꞌen n le.

28 Reve Musa damma ama a Israꞌila, <<Apa cine yee reve na A̱sulazuva a ɗa a̱ lyungu numu n yuwan ili i nda suru, waru uyuwun wa aciya̱va̱ u ɗa shi. 29 Nna ama a nda a̱ kuwa̱ ukwa̱ wa̱ A̱sula̱, reve ili i na i tsu cina ama i cina le goon, to, A̱sulazuva a̱ lyungu mu shi. 30 Agba n na̱ A̱sulazuva a yuwan ili i saꞌavu i ro ko'o, a̱vu iɗa i kpa̱tu'wa̱ reve u soɗu le, ni ili i na a̱ ri ne ele suru, a̱vu a̱ ka̱ra̱ a̱ cipa̱ wuma a̱tsuma̱ a ason, to, i te reve ama a nda o goro ta̱ A̱sulazuva.>>

31 A̱yi o mokotoo ma adanshi a nda suru, reve iɗa i na a̱ ri mishin u ɓatsalai. 32 A̱vu iɗaꞌa i kpa̱tuꞌwa̱ reve u soɗu le na ama a 'wa le suru, na ama a̱ Kora suru ni ili i na a̱ ri ne ele suru. 33 Reve a̱ ka̱ra̱ a̱ cipa̱ pe a ason wuma, ni ili i na a̱ ri ne ele suru, a̱vu iɗa i kpa̱to le, a̱vu a̱ kuwa̱ reve a̱ puwa̱n diga a̱tsuma̱ a ama. 34 Ana a uwwai yorori i le, ama a Isra'ila a na a̱ ri uka̱nda̱ruwu ne ele suru a suma ta̱, a dansa, <<Iɗa'a u to soɗu tsu fo!>>

35 Akina o uta̱ ta̱ uba̱ta̱ wa̱ A̱sulazuva reve u kula̱to ama ukpakure na̱ kupoto'on (250) aza a na a̱ shi a̱ kula̱tosu a̱tsuka̱'a̱.

36 Reve A̱sulazuva a yuwan adanshi na̱ Musa u damma, 37 <<Damma Eliyaza ulobo wa Haruna ganu wu tawa ayimba o ukula̱tosu wa̱ a̱tsuka̱'a̱ diga uba̱ta̱ u na akina a̱ kula̱toi ama'a. A̱vu a baza akinkina'a takaci adama a na ayimba'a a̱ ta̱ na akiza. 38 Ayimba o ukula̱tosu wa̱ a̱tsuka̱ wa ama a nda aza a na a̱ kuwa̱i adama a̱ nusu le, lyawa a ruma le o'woto le mkpa̱ta̱tsu m masa'a, adama a na a ca ta̱ A̱sulazuva ele, a̱vu a tawa le na akiza. Lyawa le o o'wo iroci e ekere a aza a Isra'ila.>>

39 <<Reve Eliyaza ganu ɓoloto ayimba a̱ rumushili wa aza a na o unai na̱ ta̱wa̱yi, a̱vu a ruma le o o'wo mkpa̱ta̱tsu m masa'a, 40 cine A̱sulazuva a damma niyi o una̱ wa Musa. A̱yi nda u ta cuwaan aza a Isra'ila a na ko vuma ta̱ a̱ ta̱wa̱ u kula̱to a̱tsuka̱ a̱ ma̱ka̱ka̱n ma̱ A̱sulazuva shi she ugundo wa Haruna goon, na̱ ne ɗa shi u to o'wo tsa̱ Kora na aza a na oo tono yi.

41 <<Ana usana u tawai reve aza a a Isra'ila suru a yuwaan Musa na̱ Haruna adanshawuya. Reve a damma, <Yu una ta̱ ama a̱ A̱sulazuva.> >>

42 Amma a mantsa ma na iɓolo ya ama a Isra'ila i ɓolotoi adama a yuwan nla̱ngi ne ele, a̱vu Musa na̱ Haruna a vadala urewesu u le a̱ tyo o Oogodo o Uga'asusan, babu usa̱n reve eleshe a̱ ɓa̱ru yi, reve tsugbain tsa̱ A̱sulazuva tso uta̱. 43 Reve Musa na̱ Haruna a̱ ka̱ra̱ a̱ tyo elime o Oogodo o Uga'asusa'an. 44 Reve A̱sulazuva a yuwan adanshi na̱ Musa u damma, 45 <<Kakasai aciya̱ɗu ni iɓolo i ndolo tsa̱ra̱ n kototo le nu uta̱.>> Reve Musa na̱ Haruna o von ma̱kpa̱ɓa̱.

46 Reve Musa damma Haruna, <<Tara aayimba a̱ wu vu tsun pe a̱tsuka̱, oɓolo na akinkina diga a masa'a. Reve vu jika̱ vu 'ya̱wa̱ uba̱ta̱ wi iɓolo'o, vu yuwan kucci matara mo ume mo unusu adama e le. Upan wu uta̱ ta̱ diga uba̱ta̱ wa̱ A̱sulazuva, mɓa̱la̱ n teme ta̱.>> 47 Reve Haruna yuwan cine Musa dammai. A̱vu u ꞌyon ni ilaɗi a̱ tyo e memere me iɓolo ya ama'a. Mɓa̱la̱ n shi ta̱ ɗe n fara, amma Haruna ca ta̱ kucci va̱ a̱tsuka̱'a̱, reve u yuwan kucci matara mo ume mo unusu adama o unusu wa ama'a. 48 Reve wi isawan e memere ma̱ a̱kwa̱kwa̱ na aza a wuma, reve mɓa̱la̱ mi isawan. 49 Amma suru na̱ ne ama a na a̱ kuwa̱i adama a̱ mɓa̱la̱'a̱, a rawa ta̱ ama ukpakukupa kupa ukpakukupa una̱shi nu ukpaku ucindere (14,700) babu na aza na a̱ kuwa̱i adama a̱ Kora. 50 Reve Haruna ka̱mba̱ uba̱ta̱ wa Musa o una̱ntsu wo Oogodo o Uga'asusan adama a na mɓa̱la̱'a̱ mi isawan ta̱.