1 Urana u ro reve aza a Isra'ila a uwa acingi adama a̱ a̱tsuma̱lima̱ e le, A̱sulazuva gba a uwwusa. Ana wu uwwa nle, a̱vu u yuwan upan. A̱vu akina a̱ A̱sulazuva a̱ cipa̱ a̱ kula̱tosu le, hali u kula̱to upasu u na wu uva̱la̱ta̱'a̱. 2 A̱vu ama'a e showen Musa, a̱vu u pati A̱sulazuva, ɗaɗa akina'a a̱ kima̱i. 3 Adama o ndolo a ɗa e ɗeyi uba̱ta̱'a̱ Tabera adama a na lo ɗa akina a̱ A̱sulazuva a̱ kula̱i a̱tsuma̱ e le.

4 Reve oɓolo a ama aza a na a̱ ri aza a Isra'ila a ɗa shi a na a̱ ri oɓolo ne ele e teme izami yi ili na̱ a̱bunda̱, reve aza a Isra'ila fo e teme acingi a̱vu a damma, <<A damma de tsu shi ta̱ a̱ tsura̱ inama i na tsaa tama! 5 Tsu cuwan ta̱ cine tsu tamusai mugula e iɗa ya Masar uneꞌe, waru tsu cuwan ta̱ na̱ kukumba*, no oɗyoro na arumbasa, no oroci a arumbasa a nata*. 6 Amma gogo gba ucira u tsu u koto ta̱, babu ili i ro lo na tsaa lyuwa she mana goon tsee inda.>>

7 Mana ndolo gba tsi isu'wan i u'ri i ɗa u ri, u rotso ta̱ erepu o uɗanga. 8 Ama a̱ tsu 'ya̱wa̱ ta̱ o ɓoloto le a̱vu e ira le a atali a yira ko a̱ kula̱ le o usun. A tsu ralu yi ta̱ o upondo ko a yuwan le emeshen. A̱vu u yuwan a̱limu tse ili i na a yuwain na̱ mani'in ma̱ zetun. 9 Mantsa ma na a'iza a̱ cipa̱i na ayin o uva̱la̱ta̱, mana fo u tsu cipa̱ ta̱ oɓolo ne ele.

10 Musa uwwa ta̱ ama a 'wa suru a acingi, koyan o una̱ntsu wo oogodo a̱ yi. A̱vu A̱sulazuva a yuwan upan lon, hali Musa o'wo udamu. 11 A̱vu Musa damma A̱sulazuva, <<Nye i ɗa i zuwai vu ta̱wa̱yi aagbashi a̱ wu na addama a nda? Nye n yuwain na n lungusa̱ nuwu okolo, hali na vu zuwai ume wa ama a nda suru a aci a̱ va̱? 12 A̱mu ɗa n tanuyi a̱tsuma̱ a ama a nda suru? A̱mu ɗa m matsan nle? Nye i zuwai vu zuwa numu n sheɗe le e ekere a̱ va̱, cine ka tsu sheɗe ba̱ba̱, hali a̱ tyo e iɗa i na vu kucinayi nkaya n le, a na vaa ca le? 13 Te ɗa ma̱a̱ tsura̱ inama i na maa ca ama a nda suru? Ele ɗa nda a̱ shoshen mu a dansa, <Ca tsu inama tsu tama!> 14 A̱mu a̱ nde'en maa gura tara ume wa ama a nda suru shi, ume u le u la'a ta̱ ucira u va̱. 15 Na̱ ne ɗa vaa yuwan na̱ a̱mu, waru na̱ n ta̱ tsura̱ isa'ani ya̱'a̱ wu, n te e ipati vu una mu gogo, she vu lyawa me ene a̱tsuma̱lima̱ a nda wan.>>

16 A̱vu A̱sulazuva a damma Musa,<<Ɓolotowo mu ama kupocindere mbara ma Isra'ila, aza a na vu revei ele ɗa azagbain a ama'a, aza a na waru a casu tsugbain. Vu zuwa le a̱ ta̱wa̱ o Oogodo o Uga'asusan, e isawan lo na̱ a̱vu. 17 A̱mu n ta̱ cipa̱ n yuwan adanshi na̱ a̱vu uba̱ta̱'a̱. Waru n te kene ruhu na n ca nuwu a̱vu n ca le. A ta kamba wu matara mo ume wa ama'a, adama vu tara ume'e a̱vu a̱ nde'en wan.

18 <<Damma ama'a a̱ ka̱mba̱to aciyele na akiza adama a na nfa'an a ta tama inama. Adama a na i yuwan ta̱ acingi a atsuvu a̱ A̱sulazuva, a dansa, <A damma de tsu ta̱ tsura̱ inama i na tsaa tama! U shi ta̱ u la'aa tsu e iɗa ya Masar!> >> Adama o ndolo A̱sulazuva a ta ca ɗu inama, i ta̱ gba aa tama. 19 Aa tama inama'a uranu u ta̱ shi, ko rana re, ko rana ton shi ko kupa, ko rana ushin goon shi. 20 Amma a̱ ta̱ a̱ da̱na̱ a tamusa inama'a hali woto u ta̱, hali u makan le, yaa ciga ee ene le shi, adama a na i 'yuwan ta̱ A̱sulazuva za na ri a̱tsuma̱ a̱ ɗu, a̱vu i shon a̱ ma̱ka̱ka̱n ma̱ yi a dansa, <<Nye i zuwai tsu lyawai iɗa ya Masar?>>

21 Amma Musa damma ta̱, <<A̱mu ɗa nda a mmalu a ana oɓolo na ama ukpakukupa ukpakuta̱li (600,000), a̱vu ɗa nda gba vu dammai, <N ta ca le inama i na aa tama i na yaa rawa le woto u ta̱!> 22 Ko na a paɗa oɓolo e inan ni ikyon na̱ mgbele, u ta rawa le tama? Ko ne reme mugula m mala suru u ta rawa le?>>

23 A̱vu A̱sulazuva a̱ usu Musa, <<Ucira wu ukere u va̱ u ka̱la̱ma̱ ta̱? Gogo vu te ene ko adanshi a̱ va̱ a ta shiwan ko waa shiwan shi.>>

24 A̱vu Musa uta̱ u damma ama'a ili i na A̱sulazuva a dammai. A̱vu waru u ɓoloto mbara kupocindere, a̱vu u zuwa le e isawan uka̱nda̱ruwu no Oogodoꞌo. 25 A̱vu A̱sulazuva a̱ cipa̱ a̱tsuma̱ e eleshe a̱vu u yuwan adanshi na̱ a̱yi. A̱vu waru u tara a̱tsuma̱ a̱ ruhu na u cayi Musa, a̱vu u ca mbara kupocindere n ndolo. Mantsa ma na ruhu cipa̱i a aci e le, a̱vu a fara adansa ikaka ya̱ A̱sula̱, agba diga lo a yuwisan ne waru shi. 26 Agba mbara n re n shi ta̱ lo aza a na a̱ 'ya̱wa̱i uba̱ta̱ wo oogodo oɓolo na̱ akapi a mbara shi, ala e le a ɗa Elida na̱ Meda. A̱ shi ta̱ a̱tsuma̱ a mbara n na e kecei, amma o uta̱ a̱ tyo o oogodo'o shi. A̱vu ele fo a fara adansa ikaka ya̱ A̱sula̱ o uva̱la̱ta̱'a̱ 27 A̱vu molobo mo ro ma suma ni ilaɗi a̱vu u damma Musa, <<Elida na̱ Meda a ta yuwusan adanshi e ikaka ya̱ A̱sula̱ a̱tsuma̱ o uva̱la̱ta̱.>>

28 Josuwa ulobo wa̱ Nun, kambi va Musa a̱yi o ulobo, u yuwan ta̱ adanshi u damma, <<Musa zagbain va̱, putsa le!>>

29 Amma Musa usu yi ta̱ u damma, <<Vu ta yuwusan tsushu'un adama a̱ va̱? N shi ta̱ a ciga ama a̱ A̱sulazuva suru o o'wo ama̱sula̱, reve A̱sulazuva a zuwaa le ruhu va̱ yi!>> 30 A̱vu Musa na̱ mbara ma aza a Isra'ila a̱ ka̱mba̱ o uva̱la̱ta̱.

31 A̱vu A̱sulazuva a zuwa upepu u ro u ta̱wa̱a̱ na̱ nroni diga a mala. A̱vu nroni mo oco pe uba̱ta̱ u na a̱ da̱na̱i uva̱lu, na̱ ba̱ta̱ na da̱na̱i suru uka̱nda̱ruwu nu uva̱la̱ta̱'a̱. Na̱ nge'en mu uva̱la̱ta̱'a̱ suru, ana a ta'atsu a ɗa goon aa gura 'yawan zuva. A̱ nge'en suru a̱bunda̱ e le e reme ta̱ alanga a mmalu mu urana u ta̱. 32 A̱vu ama'a o uta̱ a uwa mereme mo nroni, nu usana na ayin hali rana re. Ko za kuɗa̱ o ɓoloto nroni n na n rawai kilo ukpaku (100) shi. A̱vu e 'yetsu le uba̱ta̱ biti o uva̱la̱ta̱'a̱. 33 Amma ele pe a̱tsuma̱ o utamu, inama ubuwu a̱ na̱ le kafu o soɗu, a̱vu upan wa̱ A̱sulazuva u cipa̱ a aci a ama'a a̱vu u lapa le na̱ mɓa̱la̱ n vama. 34 Adama o ndolo a ɗa e ɗeyi ala o uba̱ta̱'a̱ Kibirot Hatava, adama a na lo ɗa a̱ ciɗoi ama a na a yuwain utsa̱n.

35 Diga Kibirot Hatava a̱vu ama'a a yuwan mmalu a̱ tyo Hazero, a̱vu a̱ va̱la̱ lo.