1 A̱tsuma̱ a ayin o ndolo, reve ama suru a̱ 'ya̱sa̱n uɗyo u le a̱vu a uwa mesun. 2 Reve aza a Isra'ila suru a yuwusaan Musa na̱ Haruna adanshawuya, a̱vu oɓolo a ama'a suru a damma le, <<Tsu shi ta̱ tsu laꞌa ciga tsu kuwa̱ a̱tsuma̱ a Masar! Ko gba a̱ a̱tsumona a nda! 3 Adama a̱ nye a ɗa A̱sulazuva ta̱wa̱to ntsu e iɗa i nda adama o una tsu na̱ matsun me pe'eni? E te reme a̱ma̱ci a̱ tsu na̱ muwun n tsu. Waa laꞌaa tsu tsu ka̱mba̱ e iɗa ya Masar shi?>> 4 A̱vu a dammulai va̱ni le, <<Tsu ɗangwayi aciya̱tsu zagbain, reve tsu ka̱mba̱i Masar.>>

5 Reve Musa na̱ Haruna o von ma̱kpa̱ɓa̱ a̱ ma̱ka̱ka̱n ma amaꞌa suru. 6 A̱vu Josuwa ulobo wa̱ Nun na̱ Keleb ulobo wa̱ Jefune aza a na a̱ da̱na̱i a̱tsuma̱ a aza a na a̱ ꞌya̱wa̱i matawa mo utyo me iɗa'a a̱ da̱na̱ ta̱ lo mishin, a kara a̱tugu e le. 7 A̱vu a damma amaꞌa suru, <<Iɗa i na tsu utula̱i matawa mo utyo'o u tu ulobonu u na u ka̱ra̱la̱i. 8 Nna̱ A̱sulazuva a uwwa uyoꞌo u tsu, u ta tara tsu a̱ ꞌya̱wa̱ ɗe iɗa i na yee yenishe maani ni ishiki reve u ca tsu a̱yi. 9 She i yuwaan A̱sulazuva aciyogbamu wan, waru she yu uwwa wovon wa ama e iɗaꞌa wan. Adama a na tsu ta lyuwa le. Ugeshete u le u buwa shi, A̱sulazuva o to oɓolo na̱ a̱tsu, she yu uwwa wovon u le wan.>>

10 Reve ama a Israꞌila suru a a damma a ta vara le na atali adama o una le. Reve tsugbain tsa̱ A̱sulazuva tsa̱ cipa̱ zuva vo Oogodo o Uga'asusan uba̱ta̱ wa ama a Israꞌila suru. 11 A̱vu A̱sulazuva a damma Musa, <<Hali mantsa ma̱ ne ma ɗa ama a nda o rono mu e iɗa? Hali mantsa ma̱ ne ma ɗa a̱ kuɗa̱ a̱ usu mu, suru nu ulinga wa asalama u na n yuwain a̱tsuma̱ e le? 12 N ta faba le na̱ mɓa̱la̱, a̱vu mu kasa le na agadu e le. Agba n ta yuwan iɗa i gbain i ro nu ucira na̱ a̱vu i na i la'a nle.>>

13 Amma Musa damma ta̱ A̱sulazuva, <<Aza a Masar a ta uwwa alabari a nda! Nu ucira wa̱ wu u ɗa vu uta̱yi ama a nda a̱tsuma̱ e le. 14 A̱ ta̱ gba a damma aza a na a̱ ri na̱ nden e iɗa i nda aɗa a nda. A uwwa ta̱ ɗe a na a̱vu A̱sulazuva, vu ta̱ oɓolo na ama a nda. Waru a̱vu A̱sulazuva, e ene wu ta̱ esu ne esu, a na eleshe a̱ wu a̱ tsi isawan zuva le waru vu tsu wala ta̱ elime e le a̱tsuma̱ o oɓolo e eleshe nu urana na a atsura a akina na ayin. 15 Gogo na̱ vu una ama a nda suru nu uta̱, nɗa n na mu uwwai aɗa a̱ wu a ta damma, 16 <O una̱ u na A̱sulazuva a gura 'ya̱wa̱toi ama a nda a̱tsuma̱ e iɗa i na u kucinai a na waa ca le shi, a̱yi ɗa i zuwai wu una nle ɗe a̱tsumona.>

17 <<Gogo lyawa ucira wa̱ A̱sulazuva wu uta̱ a alanga, cine vu dammai: 18 <A̱mu A̱sulazuva n tsu yuwan upan go'o shi, za va̱ a̱bunda̱ e icigi, za vu u yuwusan u gafura wi iwuya nu unusu. Suru na̱ ne, za na a̱a̱ kuɗa̱ ca za vu unusu oforo a ɗa shi, u tsu ca ta̱ muwun oforo adama o unusu wu mbara n le hali a̱ tyo mantsa ma ta'atsu na̱ ma̱ na̱shi.> 19 Adama a̱ a̱bunda̱ e icigi ya̱ wu za na tsu vadala shi, n te ipati ya̱ wu vu yuwaan ama a nda gafura vu unusu u le, cine vu yuwaan nle diga mantsa ma na a lyawai iɗa ya Masar hali a cina ana'an.>>

20 A̱vu A̱sulazuva a̱ usu, <<N yuwaan le ta̱ gafura, cine vu patiyi. 21 Amma n kucina ta̱ na̱ wuma u va̱, waru na̱ cine tsugbain tsa̱ A̱sulazuva tso shiton uvaɗi ma̱ɓula̱, 22 ama'a suru aza a na e enei tsugbain tsa̱ va̱ ni iroci vu linga va asalama a na n yuwain a̱tsuma̱ a Masar na̱ a̱tsumona, suru na̱ ne gba a̱ lyungwa̱ mu ta̱ toto kupa, waru a̱vu a 'yuwan a yuwan tsutoni nu uɗyo u va̱, 23 ko vuma ta̱ a̱tsuma̱ e le ee ene iɗa i na n kucinai i na maa ca nkaya n le shi. Ko vuma ta̱ na rono numu ee iɗa'a e ene yi shi 24 Amma adama a na aagbashi a̱ va̱ Keleb a̱ ri na̱ cu'un ruhu ro ko'o waru u kuru numu no okolo a̱ ta̱, n ta̱ 'ya̱wa̱to yi iɗa i na u 'ya̱wa̱i, waru u to o'wo agadu o ugundo wa̱ yi. 25 Gogo gba ana wo o'woi, aza a Amaleka na aza a Ka'ana a̱ ta̱ nden a̱ ka̱ri, nfa'an she i vadala i reme ure a̱ tyo a̱tsumona o ure u na u kuruyi a̱ tyo a Mala ma̱ Shili.>>

26 Reve A̱sulazuva a damma Musa na̱ Haruna: 27 <<Uyan ama a wuya a nda a̱ da̱na̱ a adanshawuya a aci a̱ va̱? Mu uwwa ta̱ mesun ma adanshawuya ma ama a Israꞌila a nda. 28 Gogo vu damma le, <A̱mu A̱sulazuva n kucina ta̱ na̱ wuma u va̱ n ta yuwan na̱ a̱ɗu ili i na mu uwwa nɗu a dansa: 29 I ta̱ kuwa̱ suru nɗu a̱tsumona a nda! Za na e kecei suru aza a na a̱ ri aꞌwan ushin ko aza a na a pasai a'wan ushin aza a na a yuwaan numu adanshawuya. 30 Agba ko za ta̱ a̱tsuma̱ a amaꞌa aa uwa e iɗa i na n kucinai a na a̱a̱ da̱nu shi. She Keleb ulobo wa̱ Jefune na̱ Josuwa ulobo wa̱ Nun. 31 Muwun n ɗu gba a na i dammai a̱ ta̱ pura̱ le o uvon, n ta̱ ta̱wa̱to le a uwwa uyo'o wi iɗa i na i ꞌyuwain. 32 A̱ɗu gba i ta̱ kuwa̱, lipu ɗu to oco a̱tsumona a nda. 33 Muwun n ɗu n to o'wo aza a agara a̱tsumona a'wan amunga, o sowuso a̱tsuma̱lima̱ adama o ulambu wa̱ a̱ɓula̱ a̱ ɗu, hali mantsa ma na vuma vu ukosu ɗu kuwa̱i a̱tsumona. 34 I to sowo a̱tsuma̱lima̱ adama o unusu u ɗu hali a'wan amunga, o una̱ wu rana amunga a na i yuwain a tawasa utyo wi iɗa'a, usana u ta̱ o una̱ wa aa'wan a̱ ta̱. Ne ɗa yaa tara ume wu unusu u ɗu, waru i ta̱ reve ili i ke'en i ɗa shi upan u va̱ u cipa̱ a aci a vuma.> 35 A̱mu A̱sulazuva n damma ta̱, waru amayun n ta yuwan ne a aci a̱ ɗu, a̱ɗu iɓolo ya ama a wuya a na o ɓoloi una̱ adama a̱ va̱. A̱tsumona a nda a ɗa yoo koto suru nɗu, koyan ɗu ta̱ kuwa̱.>>

36 Ama a na Musa lyunguyi a̱ 'ya̱wa̱ a tawa utyo wi iɗa, aza a na a̱ ka̱mba̱i reve a zuwa iɓolo ya ama'a suru a yuwaan A̱sulazuva adanshawuya adama a alabari a vama a na a cayi adama e iɗa'a, 37 ama a nda aza a na a cayi aalabari a vama adama e iɗa'a, A̱sulazuva a faba le ta̱ na̱ mɓa̱la̱ a̱vu a̱ kuwa̱ a̱ ma̱ka̱ka̱n ma̱ yi. 38 A̱tsuma̱ a ama a na a̱ 'ya̱wa̱ a tawai utyo wi iɗa'a Josuwa ulobo wa̱ Nun na̱ Keleb ulobo wa Jefune ɗa goon la'ai.

39 Ana Musa dammai ama a Isra'ila ili i na A̱sulazuva a dammai reve a uwa a̱tsumola̱ngu lon. 40 Na̱ wasasa reve a̱ ꞌyon a̱ kuru ure a̱ tyo upasu wi iɗa ya agaɗi, adansa, <<A̱tsu ɗa nda, ufoɓu u ɗa tsu ri adama tsu 'ya̱wa̱ e iɗa i na A̱sulazuva a yuwain nzuwulai n na waa ca tsu. Tsu usu ta̱ tsu yuwan ta̱ unusu.>> 41 Amma Musa damma ta̱, <<Nye i zuwai yaa pasasa udammu wa̱ A̱sulazuva, mayan ne wa̱a̱ ta̱wa̱ nu ulyuwu we elime shi! 42 She i 'ya̱wa̱ a gawan wan, adama a na A̱sulazuva a̱ ri oɓolo na̱ a̱ɗu shi, n'yuwatan n ɗu n ta lyuwa ɗu. 43 Adama a na aza a Amaleka na aza a Ka'ana a̱ ta̱ ta̱wa̱a̱ ɗu nu uvon uba̱ta̱'a̱, a̱ to una ɗu na̱ matsun me pe'eni. Adama a na i vadala ta̱ i lyawa itoni ya̱ A̱sulazuva, A̱sulazuva gba wa̱a̱ da̱na̱ oɓolo na̱ a̱ɗu shi.>>

44 Amma suru na̱ ne a majiyan me le a gawan ta̱ a̱ tyo upasu wa agaɗi wi iɗa'a, ko na wo o'woi ko Akpati a Nzuwulai a̱ A̱sulazuva, ko Musa a̱ ꞌyon diga o uva̱la̱ta̱ shi. 45 Reve aza a Amaleka na aza a Ka'ana aza a na a̱ ri na̱ nden upasu wa agaɗi wi iɗa'a, a̱ za̱nluwa̱ a̱ cipa̱a̱ le nu uvon. A̱vu a lyuwa aza a Isra'ila hali a̱ tyo e iɗa ya Homa.