1 A̱sulazuva a yuwan ta̱ adanshi na̱ Musa, u damma, 2 <<Vu lyungu ama a̱ ꞌya̱wa̱ a tawa utyo wi iɗa ya Kaꞌana, za na maa ca ama a Israꞌila. Diga o ugundo wu nkaya o ugundo wa aza a Israꞌila suru, vu lyungu zagbain ta̱ a̱tsuma̱ e le.>>

3 Reve o udammu wa̱ A̱sulazuva, Musa lyungu le diga A̱tsumona a Faran. Suru nle azagbain a Israꞌila a ɗa. 4 Nda ala e le,

diga o ugundo wa̱ Roben, Shamuwa ulobo wa Zaku,

5 diga o ugundo wa Saminu, Shafa ulobo wa̱ Hori,

6 diga o ugundo wa Yahuza, Keleb ulobo wa̱ Jefune,

7 diga o ugundo wa Isaka, Iga ulobo wa̱ Isuhu,

8 diga o ugundo wa Ifiramu, Hosiya ulobo wa̱ Nun,

9 diga o ugundo wa Banyami, Palti ulobo wa Rafu,

10 diga o ugundo wa Zebulun, Gadiye ulobo wa̱ Sodi,

11 diga o ugundo wa Manase, a̱tsuma̱ o ugundo wa̱ Isuhu u ta̱, Gadi ulobo wa Susi,

12 diga o ugundo wa Dan, Amiye ulobo wa Gemali,

13 diga o ugundo wa Asha, Setu ulobo wa Mika'ilu,

14 diga o ugundo wa Nafutali, Nabi ulobo wa̱ Vosi,

15 diga o ugundo wa Gado, Geyuwe ulobo wa Maki.

16 Ele nda ele ɗa ala a ama a na Musa lyunguyi a̱ 'ya̱wa̱ a tawa utyo wi iɗa'a. Musa ca ta̱ Hosiya ulobo wa̱ Nun aala Josuwa.

17 Mantsa ma na Musa lyungu nle a tawa utyo wi iɗa ya Ka'ana, reve u damma le, <<Diga lo i kuru upasu wu ugana a̱ tyo Nege, a̱vu i kuru a̱ tyo upasu u masasan e iɗa ya agaɗi. 18 I ka̱lyuwa̱ cine iɗa'a u ri, na̱ cine ama'a a̱ ri, ko ama'a a̱ ta̱ a̱bunda̱ ko a̱ ri a̱bunda̱ shi, waru ko a̱ ta̱ nu ucira ko babu ucira. 19 I ka̱lyuwa̱ i reve ko iɗa i na a̱ ri nden u tu ulobonu, ko u ri ulobonu shi. A̱vu waru i ka̱lyuwa̱ icu'un yi ilyuci i ne ɗa a̱ ri pe nden, waru i ka̱lyuwa̱ ilyuci'i a̱ ta̱ nu ukari ko a̱ ri na̱ a̱yi shi. 20 I ka̱lyuwa̱ cine iɗa'a i ri, ko u tu nu umili ko u ri nu umili shi, waru ko u ta̱ na̱ ɗanga ko babu. I yuwan a̱tyo o ukadu a̱ ɗu i ta̱wa̱a̱ tsu na̱ muwun mu ɗanga mi iɗa i le tse ene.>> A mantsa ma nda gba a̱ tsu tsura̱ ta̱ winu wu ufaru u muwun n inabi.

21 Reve a̱ ka̱ra̱ a̱ 'ya̱wa̱ a tawa utyo wi iɗa'a diga A̱tsumona a̱ Zin hali a̱ tyo a̱ lyuci va Reho, zuzu na̱ Lebo Hamat. 22 A̱vu a̱ kuru a̱ tyo upasu wa Nege hali a rawa Heburon. Uba̱ta̱ u ɗaɗa limatan va Anaku ri na̱ nden, ele ɗa Ahiman na̱ Sheshai, na̱ Talmai vu ugundo wa̱ a̱ba̱jini a ama. A suwa ta̱ Heburon a'wan e cindere kafu a suwa Zowa a̱tsuma̱ a Masar. 23 Ana a rawai o uka̱ri wa Eshikol, reve o koɗo eten a na a̱ ri no ojuɓo a̱ muwun n ina̱bi za ta̱, ama e re ɗa tanu niyi o uvangaci u le. A̱vu waru a ta'an muwun mu uɗanga m peme na̱ muwun mo oroci mu ubiri. 24 E ɗe ta̱ aala o uba̱ta̱'a̱ Uka̱ri wa Eshikol, adama o ojuɓo a̱ muwun mu uɗanga n ina̱bi n na aza a Isra'ila o koɗoi diga ɗe.

25 O ukosu wu rana amunga, reve a̱ ka̱mba̱ diga matawa mo utyo me iɗa'a.

26 Reve a̱ ka̱mba̱ uba̱ta̱ wa Musa na̱ Haruna na ama a Isra'ila suru a Kedesh A̱tsumona a Faran. Lo ɗa a cuɗuwa nle no oɓolo a ama suru, a̱vu o roco le limatan vu ɗanga vi iɗaꞌa. 27 Reve a damma Musa, <<Tsu ꞌya̱wa̱ ta̱ e iɗa i na vu lyungu ntsu'u, tse ene ta̱ iɗaꞌa, u ta̱ nu umili a̱bunda̱ lon. Nda limatan vu ɗanga vi iɗaꞌa. 28 Agba ama a na a̱ ri pe nden a̱ ta̱ nu ucira lon, waru a̱ ta̱ ni ilyuci i gbagbain, waru a̱ tu uka̱nda̱ruwu nu ukari. Waru tse ene ta̱ ugundo wa Anaku aza a na a̱ ri pe na̱ nden! 29 Aza a Amaleka a̱ ta̱ nden Nege, aza a Hitiya na aza a Jebusiya na aza a Amoriya a̱ ta̱ nden e iɗa ya agaɗi. Aza a Ka'ana waru a̱ ta̱ nden zuzu na̱ mala zuzu nu Uɗolu wa̱ Urudu waru.>>

30 Reve gba Keleb zuwa ama'a a̱ rungwa̱ a̱ ma̱ka̱ka̱n ma Musa u damma, <<Tsu gawain tsu 'ya̱wa̱i tsu usai iɗaꞌa. N reve ta̱ tsu ta gura usa yi.>>

31 Agba aza a na a̱ ꞌya̱wa̱i e iɗa'a oɓolo na̱ a̱yi a damma ta̱, <<Tsaa gura yuwan uvon ne ele shi, a laꞌa tsu ta̱ ucira.>> 32 Reve a ca alabari o uwuyanu a̱tsuma̱ a ama a Israꞌila adama e iɗa i na a tawai utyo, a dansa, <<Iɗa i na tsu tawai utyo'o u ta lyuwusa ama a̱ yi. Waru ama a na tse enei pe a̱ba̱jini a̱ba̱jini a ama a ɗa. 33 Waru tse ene ta̱ ɗe a̱ba̱jini a̱ba̱jini a ama o ugundo wa Anaku, aza a na a̱ ta̱wa̱i diga Nefili. Tso o'wo ta̱ tsa aapapari e yeni i tsu, ne ɗa gba tsu ri e ekere e le.>>