1 A̱sulazuva a yuwan ta̱ adanshi na̱ Musa, 2 <<Vu zuwaa ama a Isra'ila ili i nda vu damma le, a mantsa ma na i uwai e iɗa ya Ka'ana iɗa i na yoo o'wo za ɗu ya agadu, apa cine utyo wi iɗa'a wa̱a̱ da̱na̱.

3 <<Upasu wu uyagi u ɗu u te reme diga a̱ a̱tsumona a̱ Zin a rawa utyo wa Edom. Upasu wu uyagi u ɗu u te reme diga o ukosu u Mala ma Akpaɗi na asana. 4 Utyo'o u ta vadala u kuru a̱ tyo uyagi, a gawan nu ure wa Akarabim a̱ tyo Zin. A̱vu u reme a̱ tyo uyagi wa Kadesh Baniya. A̱vu u saɓa a̱ tyo Haza Ada, u kuru a̱ tyo Azumon, 5 uba̱ta̱ u na waa vadala u ga'asan nu Uɗolu wa Masar, reve u koso a Mala'a.*

6 <<Upasu wu utyo wa̱ a̱livu a̱ ɗu u to o'wo nge'en m Mala ma Gbain.* A̱yi ɗa wo o'wo utyo u ɗu a̱livu.

7 <<Utyo u ɗu wu ugana, u ta fara diga a Mala ma Gbain a̱ tyo a Masasan ma Hor. 8 Waru diga a Masasan ma Hor a̱ tyo Lebo Hamat, utyo'o u kuru a̱ tyo Zeda, 9 a̱vu u kuru a̱ tyo Zifuro. Reve u koso Haza Ena. A̱yi nda a̱yi ɗa woo o'wo utyo u ɗu o upasu wu ugana.

10 <<Utyo u ɗu wa asana u ta fara diga Haza Ena a̱vu u kuru a̱ tyo Shefam. 11 Utyo'o u ta̱ zura̱ diga Shefam a̱ tyo Ribula na asana a Ayin. Reve u kuru a̱ tyo o uzuru wa asana a Mala ma̱ Ga̱lili. 12 Reve utyo'o u zura̱ a̱ tyo Urudu a̱vu u koso a Mala ma Akpaɗi.

<<A̱yi nda u to o'wo iɗa i ɗu, na̱ tyo va̱ yi a̱ mɓa̱nga̱ suru.>>

13 A̱vu Musa damma aza a Isra'ila, <<I ne'eshen iɗa i nda na̱ mazuwa ma agita wo o'wo ɗu agadu. A̱yi ɗa A̱sulazuva a zuwai a ca gundo kucci na akapi. 14 Adama a na umatsun wu ugundo wa̱ Roben, nu ugundo wa Gadu nu uɓatsulai wu ugundo wa Manase a̱ ushi ta̱ ɗe agadu e le. 15 Gundo re na akapi a nda a̱ ushi ta̱ akunda a agadu e le a̱ mɓa̱nga̱ ma asana ma̱ Urudu va̱ Jeriko, nu upasu wa asana.>>

16 A̱sulazuva a damma ta̱ Musa, 17 <<Nda ala a ama a na aa kamba wu une'esun wa agadu e iɗa'a: Eliyaza ganu na̱ Josuwa ulobo wa̱ Nun. 18 Vu ta tara zagbain ta̱ diga o ugundo suru adama a kamba une'esun wi iɗa'a. 19 Apa nda ala e le: Keleb ulobo wa̱ Jefune, diga o ugundo wa Yahuza, 20 Shemuwe ulobo wa Amihu, diga o ugundo wa Saminu, 21 Elida ulobo wa Kisulo diga o ugundo wa Banyami, 22 Buki ulobo wa Yogili zagbain vu ugundo wa Dan, 23 Haniye ulobo wa Efo zagbain vu ugundo wa Manase ulobo wa̱ Isuhu, 24 Kemuwe ulobo wa Shifitan zagbain vu ugundo wa Ifiramu ulobo wa̱ Isuhu, 25 Elizafan ulobo wa Fana, zagbain vu ugundo wa̱ Zebulun, 26 Palitiye ulobo wa Azan, zagbain vu ugundo wa Isaka, 27 Ahihu ulobo wa Shelomi, zagbain vu ugundo wa Asha, 28 Fedahe ulobo wa Amihu, zagbain vu ugundo wa Nafutali.>> 29 Ele nda ele ɗa ama a na A̱sulazuva a zuwai e ne'esheen ama a Isra'ila agadu e iɗa ya Ka'ana.