1 A̱vu A̱sulazuva a damma Musa, 2 <<Ca aza a Isra'ila wila̱ u nda a̱vu vu damma le: <I reve i ta̱wa̱a̱ mu ta̱ ni ilyalya i kucci a mantsa ma na n zuwai, za na a yuwain na akina, ili ma̱guru mo uyo'o a̱ tyo e ekere a̱ va̱.> 3 Reve vu damma le: Apa kucci va akina na yaa ca a̱ tyo uba̱ta̱ wa̱ A̱sulazuva: mugiri'i n re n na n ri na a'wan a̱ ta̱ ta̱ aza a na a̱ ri usa̱du shi, kucci vu ukula̱tosu vu usana suru. 4 A ca kucci ma̱giri'i za ta̱ nu usana, za ta̱ nu ulivu, 5 oɓolo na̱ kucci makundatsu mo uɓatsulai uta̱ u efa a̱tsuma̱ a kupa ma yira i lashi, za na a̱ ja̱mba̱ra̱i nu uɓatsulai uta̱ a̱tsuma̱ o una̱shi a mani'in ma̱ zetun. 6 Kucci vu ukula̱tosu vu usana suru ɗa za na a zuwai a yuwusan a Masasan ma Sinai ili i ma̱guru mo uyo'o, za na a yuwain na akina a̱ tyo uba̱ta̱ wa̱ A̱sulazuva. 7 Ili i na oo ɓolo na̱ kucci ma̱giri'i vu usana'a a ta ca kucci vi ili yo oso vu uɓatsulai uta a̱tsuma̱ o una̱shi e meden. A̱ ta̱ tsun kucci vi ili yo oso'o a̱ ma̱ka̱ka̱n ma̱ A̱sulazuva a̱tsuma̱ a̱ a̱a̱'isa̱. 8 I ca ma̱giri'i ma̱ ta̱ ma na ma buwai nu ulivu, oɓolo na̱ cu'un kucci vi ishina oɓolo na̱ kucci vi ili yo oso na o foɓoi nu usana. A̱yi nda a̱yi ɗa kucci na a yuwain na akina, ili i ma̱guru mo uyo'o e ekere a̱ A̱sulazuva.

9 <<O urana wa Ashibi, i ca kucci mugiri'i n re aza a na a̱ ri na aa'wan a̱ ta̱ ta̱ aza a na a̱ ri usa̱du shi, oɓolo na̱ kucci vi ili yo oso na̱ kucci vi ishina nkundatsu n re n efa a̱tsuma̱ a kupa u yira i lashi i na a̱ ja̱mba̱ra̱i na̱ mani'in. 10 A̱yi nda a̱yi ɗa kucci vu ukula̱tosu va Ashibi suru, babu na̱ kucci vu ukula̱tosu vu usana suru oɓolo na̱ kucci vi ili yo oso va̱ yi.

11 <<O ufaru u woto suru, i ta̱wa̱a̱ A̱sulazuva na̱ kucci vu ukula̱tosu vu muggono mi inan n re, oɓolo na̱ a̱a̱giri'i a̱ ta̱, waru na̱ mugiri'i n cindere ma aa'wan a̱ ta̱ ta̱, aza a na a̱ ri usa̱du shi. 12 O to ɓolo moggono suru na̱ kucci vi ishina nu uɓatsulai uta'atsu u makundatsu ma efa a̱tsuma̱ a kupa i yira i lashi i na a̱ ja̱mba̱ra̱i na̱ mani'in, oɓolo na̱ a̱a̱giri'i, na̱ kucci vi ishina nu uɓatsulai ure a̱tsuma̱ a kupa i yira i lashi i na a̱ ja̱mba̱ra̱i na̱ mani'in. 13 Waru oɓolo na̱ mokyokyon suru a ca kucci vu uɓatsulai uta̱ a̱tsuma̱ a kupa u makundatsu ma efa i yira i lashi i na a̱ ja̱mba̱ra̱i na̱ mani'in. A̱yi nda a̱yi ɗa adama a̱ kucci vu ukula̱tosu, ili i ma̱guru mo uyo'o, kucci na a cayi A̱sulazuva va akina. 14 Kucci vi ili yo oso e le u to o'wo muden n re m masayan adama o oogono a nan suru, na̱ meden ma̱ ta̱ na akapi adama a̱ a̱a̱giri'i suru na̱ meden ma̱ ta̱ adama o mokyokyon suru. A̱yi nda a̱yi ɗa kucci vu ukula̱tosu u woto suru na aa yuwan o woto u sa'avu a̱tsuma̱ a aa'wan. 15 Babu na̱ kucci vu ukula̱tosu vu urana suru oɓolo na̱ kucci vi ili yo oso, a ta ca kucci ma̱ga̱ji ma̱ ta̱ adama a̱ kucci vu unusu a̱ tyo uba̱ta̱ wa̱ A̱sulazuva.

16 <<O urana wa kupa na̱ a̱za̱ a̱ na̱shi o woto wu ufaru, a ta yuwan A̱buki a Mapasa ma̱ A̱sulazuva. 17 O urana wa kupa no ozo o ton o woto'o, a ta yuwan a̱buki, a ta tama opopofu a na a yuwain na̱ wolilo shi hali rana cindere. 18 Urana wu ufaru wa̱ a̱buki'i u to o'wo urana u gbain wi iɓolo ya akiza. She i yuwan ulinga u ro u na i tsu yuwusan wan. 19 I ca A̱sulazuva kucci na a yuwain va akina, kucci vu ukula̱tosu muggono mi inan n re, a̱a̱giri'i a̱ ta̱ oɓolo na̱ mugiri'i n cindere ma aa'wan a̱ ta̱ ta̱, aza a na a̱ ri usa̱du shi. 20 Oɓolo na̱ moggono ma nan suru i foɓo kucci vi ishina i yira i lashi vu nkundatsu n ta'atsu n efa a̱tsuma̱ a kupa i na a̱ ja̱mba̱ra̱i na̱ mani'in, a̱a̱giri'i suru o ɓolo yi na̱ nkundatsu n re a̱tsuma̱ a kupa, 21 ma̱giri'i ma̱ ta̱ suru o ɓolo yi na̱ makundatsu ma̱ ta̱ a̱tsuma̱ a kupa ma yira i lashi. 22 Waru i ca ma̱ga̱ji ma̱ ta̱ adama a̱ kucci vu unusu, adama a yuwan kucci matara mo ume mo unusu ma̱ ɗu. 23 I ta ca kucci nda babu na̱ kucci vu ukula̱tosu za na a tsu ca usana suru. 24 Tsunda tsa ɗa yaa ca ilyalya, kucci na a yuwain na akina vu urana suru, hali rana cindere, ili i ma̱guru mo uyo'o a̱ tyo uba̱ta̱ wa̱ A̱sulazuva. I ta ca kucci nda babu na̱ kucci vu ukula̱tosu oɓolo na̱ kucci vi ili yo oso vu urana suru. 25 O urana we cindere'e i ta yuwan iɓolo ya akiza, yaa yuwan ulinga u na i tsu yuwusan shi.

26 <<O urana wu ufaru wu ucasu wu umatsun wu ufaru, ana yaa ca A̱sulazuva kucci vi ishina i sa'avu a mantsa ma̱ A̱buki a Ajuma Ajuma, i yuwan iɓolo ya akiza, agba i yuwan ulinga u na i tsu yuwusan wan. 27 I ca kucci vu ukula̱tosu vu muggono mi inan n re, oɓolo na̱ a̱a̱giri'i a̱ ta̱, na̱ mugiri'i n cindere ma aa'wan a̱ ta̱ ta̱ ili i ma̱guru mo uyo'o e ekere a̱ A̱sulazuva. 28 Oɓolo na̱ moggono ma nan suru a ca kucci vi ishina nkundatsu n ta'atsu n efa a̱tsuma̱ a kupa i yira i lashi i na a̱ ja̱mba̱ra̱i na̱ mani'in, oɓolo na̱ a̱a̱giri'i nkundatsu n re a̱tsuma̱ a kupa, 29 oɓolo na̱ ma̱giri'i ma̱ ta̱ suru, a ta ca makundatsu ma̱ ta̱ a̱tsuma̱ a kupa. 30 I ta ca ma̱ga̱ji ma̱ ta̱ adama a yuwan kucci matara mo ume mo unusu ma̱ ɗu. 31 I ca ele nda oɓolo na kucci vi ili yo oso, babu na̱ kucci vu ukula̱tosu vu urana suru na̱ kucci vi ishina va̱ yi. I reve iliyamunga i ndolo a̱ ri usa̱du shi.