1 A̱sulazuva a yuwan ta̱ adanshi na̱ Musa a̱ A̱tsumona a Sinai o Oogodo o Uga'asusan, o urana wu ufaru u woto we ire, a aa'wan e ire ana aza a Isra'ila o uta̱i e iɗa ya Masar, u damma, 2 <<A̱vu na̱ Haruna i kece oɓolo a ama a Isra'ila suru, gundo gundo nu umatsun umatsun, i ɗana ala a ali suru. 3 I te gere le ukasu ukasu diga a'wan ushin a gawan aza a na rawai a̱ 'ya̱wa̱ uvon. 4 Vu zuwa vuma ta̱ a̱tsuma̱ e elentsu suru za na a̱yi ɗa zagbain a̱tsuma̱ o umatsun u kamba ɗu. 5 Apa nda ala a ama a na aa kamba ɗu: uba̱ta̱ wa̱ Roben, Elizu ulobo wa Shedeya. 6 Diga o ugundo wa Saminu, Shelumiye ulobo wa Zurishadai. 7 Diga o ugundo wa Yahuza, Nashon ulobo wa Aminada. 8 Diga o ugundo wa Isaka, Nataniya ulobo wa̱ Zowa. 9 Diga o ugundo wa Zebulun, Eliyabu ulobo wa Helon. 10 Diga o olobo a̱ Isuhu ya Ifiramu, Elishama ulobo wa Amihu. O ugundo wa Manase, Gamaliya ulobo wa Fedazu. 11 Diga o ugundo wa Banyami, Abidan ulobo wa Gidiyoni. 12 Diga o ugundo wa Dan, Ahiyeza ulobo wa Amishadai. 13 Diga o ugundo wa Asha, Fagiye ulobo wa Okiran. 14 Diga o ugundo wa Gadu, Eliyasa ulobo wa Deyuwe. 15 Diga o ugundo wa Nafutali, Ahira ulobo wa Enan.>>

16 Ele nda ele ɗa ama a na a ɗangwai a̱tsuma̱ o oɓolo a ama'a, azagbain e elentsu a nkaya n le, azagbain a 'wa va aza a Isra'ila.

17 Reve Musa na̱ Haruna tara ama a nda a na a cayi ala e le'e, 18 reve o ɓoloto ama suru uba̱ta̱ u ta̱ o urana wu ufaru u woto we ire. Reve a ɗana le diga a nkaya n le na̱ matsun le. A ɗana le ta̱ diga aza a a'wan ushin a gawan aci aci, 19 cine A̱sulazuva a zuwai Musa yuwan. Ne ɗa u kece nle a̱ A̱tsumona a Sinai. 20 Diga o ugundo wa̱ Roben, mawun mo ufaru ma Isra'ila:

Ali suru a na a̱ ri a'wan ushin ko a pasai aza a na a rawai a̱ 'ya̱wa̱ uvon e gere le ta̱ na ala e le aci aci diga a nkaya n le na̱ gundo le nu umatsun u le. 21 A̱bunda̱ a aza a na e kecei o ugundo wa̱ Roben ele ɗa ali ukpakukupa amunga nu ukpakukupa uta̱li nu ukpakuton. (46,500).

22 Diga o ugundo wa Saminu:

Ali a na a̱ ri a'wan ushin nu upasu aza a na a rawai a̱ 'ya̱wa̱ uvon suru a ɗana le ta̱ na ala e le aci aci diga a nkaya n le na̱ gundo le nu umatsun u le. 23 A̱bunda̱ a aza a na e kecei o ugundo wa Saminu ele ɗa ali ukpakukupa kupoton nu ukpakukupa kucci nu ukpakuta'atsu (59,300).

24 Diga o ugundo wa Gadu:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 25 A̱bunda̱ a aza a na e kecei o ugundo wa Gadu ele ɗa ama ukpakukupa amunga nu ukpakukupa uton nu ukpakuta̱li na̱ kupoton (45,650).

26 Diga o ugundo wa Yahuza:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 27 A̱bunda̱ a aza a na e kecei o ugundo wa Yahuza ele ɗa ama ukpakukupa kupocindere nu ukpakukupa una̱shi nu ukpakuta̱li (74,600).

28 Diga o ugundo wa Isaka:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 29 A̱bunda̱ a aza a na e kecei o ugundo wa Isaka ele ɗa ama ukpakukupa kupoton nu ukpakukupa una̱shi nu ukpakuna̱shi (54,400).

30 Diga o ugundo wa Zebulun:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 31 A̱bunda̱ a aza a na e kecei diga o ugundo wa Zebulun ele ɗa ama ukpakukupa kupoton nu ukpakukupa ucindere nu ukpakuna̱shi (57,400).

32 Diga o ugundo wa̱ Isuhu ya Ifiramu:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 33 A̱bunda̱ a aza a na e kecei o ugundo wa Ifiramu ele ɗa ama ukpakukupa amunga nu ukpakuton (40,500).

34 Diga o ugundo wa Manase:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 35 A̱bunda̱ a aza a na e kecei o ugundo wa Manase ele ɗa ama ukpakukupa mata'atsu nu ukpakukupa ure nu ukpakure (32,200).

36 Diga o ugundo wa Banyami:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 37 A̱bunda̱ a aza a na e kecei o ugundo wa Banyami ele ɗa ama ukpakukupa mata'atsu nu ukpakukupa uton nu ukpakuna̱shi (35,400).

38 Diga o ugundo wa Dan:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 39 A̱bunda̱ a aza a na e kecei o ugundo wa Dan ele ɗa ama ukpakukupa kupota̱li nu ukpakukupa ure nu ukpakucindere (62,700).

40 Diga o ugundo wa Asha: Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 41 A̱bunda̱ a aza a na e kecei diga o ugundo wa Asha ele ɗa ama ukpakukupa amunga nu ukpakukupa nu ukpakuton (41,500).

42 Diga o ugundo wa Nafutali:

Ali a na a̱ ri a'wan ushin ko a pasai aza a na a rawai a̱ 'ya̱wa̱ uvon suru a ɗana le ta̱ na ala e le diga a nkaya n le na̱ gundo le nu umatsun u le. 43 A̱bunda̱ a aza a na e kecei o ugundo wa Nafutali ele ɗa ama ukpakukupa kupoton nu ukpakukupa uta'atsu nu ukpakuna̱shi (53,400).

44 Ele nda ele ɗa aza a na Musa na̱ Haruna e kecei oɓolo ni ikambi ya azagbain kupa ne ejere ya aza a Isra'ila, vuma ta̱ suru o una̱ wu umatsun wu u'wa u le. 45 Ne ɗa e kecei aza a Isra'ila aza a na a̱ ri na a'wan ushin a gawan aza a na a rawai a̱ 'ya̱wa̱ uvon o una̱ wu 'wa vu matsun le. 46 A̱bunda̱ a aza a na e kecei suru suru ele ɗa ama ukpakukupa ukpaku uta̱li nu ukpakukupa uta'atsu nu ukpakuton na̱ kupoton (603,550).

47 Agba e kece ugundo wa̱ Levi o una̱ wu 'wa vu nkaya n le oɓolo na akapi shi. 48 Adama a na A̱sulazuva a damma ta̱ ɗe Musa, a na, 49 <<Ugundo wa̱ Levi u ɗa goon vee kece shi. She vu kece le oɓolo na aza a Isra'ila wan. 50 Amma vu zuwa le a̱ ka̱lyuwusa̱ Oogodo o Uga'asusan, ni itana yu ulinga ya̱ yi ni ili i na i ri pe suru. Ele ɗa aa tanu oogodoꞌo ni itana ya̱ yi suru, reve o goloɓuso yi. Reve a̱ va̱la̱ uka̱nda̱ruwu na̱ a̱yi. 51 A mantsa ma na oogodoꞌo a̱a̱ 'yon, nan Levi ɗa a̱ mula̱ yi. A mantsa ma na waru a̱a̱ shuwisa̱ yi ele ɗa a̱a̱ shuwa̱ yi. Na̱ vuma ro ko'o rawa zuzu na̱ a̱yi, a̱ to una yi. 52 Aza a Isra'ila a̱ ta̱ shuwa̱ oogodo e le gundo gundo za suru o uva̱la̱ta̱ wa̱ yi, waru za suru uba̱ta̱ wa atuta a̱ yi. 53 Agba nan Levi a̱ ta̱ va̱la̱ a̱ka̱nda̱ruwa̱ Oogodo o Uga'asusan adama upan u riya̱a̱ oɓolo a aza a Isra'ila wan. Nan Levi a ɗa a̱ ri n goloɓuso Oogodo o Uga'asusa'an.>>

54 Ne ɗa aza a Isra'ila a yuwain cine A̱sulazuva a zuwai Musa.