1 O woto wu ufaru a̱vu ama a Israꞌila suru a rawa A̱tsumona a̱ Zin,* reve a̱ va̱la̱ Kedesh. Ɗe ɗa Maryamu kuwa̱i a̱vu a̱ ciɗo yi.

2 Uba̱ta̱'a̱ u shi na̱ mini ma na ama oo sowo shi, ɗaɗa a̱ ꞌya̱wa̱i uba̱ta̱ wa Musa na̱ Haruna na̱ nla̱ngi. 3 Reve a yuwan mawasan na̱ Musa, reve a damma, <<Na̱ shi tsu kuwa̱ a mantsa ma na a̱za̱ a̱ tsu a̱ kuwa̱i a̱ ma̱ka̱ka̱n ma̱ A̱sulazuva, u shi ta laꞌaa tsu! 4 Adama a̱ nye i ta̱wa̱toi ama a̱ A̱sulazuva a̱tsumona a nda, adama a̱tsu ni iliyamunga i tsu tsu kuwa̱ pa? 5 Adama a̱ nye yu uta̱a̱ ntsu a̱tsuma̱ a Masar, reve i ta̱wa̱to tsu a̱tsumona a wuya a nda, uba̱ta̱ u na u ri ni ilyalya na̱ biri na̱ muwun mu ɗanga m peme shi. Waru babu mini ma na tsoo sowo!>>

6 Reve Musa na̱ Haruna lyawa iɓolo ya ama a̱ ka̱ra̱ a̱ ꞌya̱wa̱ o u'uwata wo Oogodo o Uga'asusan, a̱vu o von ma̱kpa̱ɓa̱. Reve tsugbain tsa̱ A̱sulazuva tsa̱ ta̱wa̱ uba̱ta̱ u le. 7 A̱vu A̱sulazuva a damma Musa,

8 <<Tara aaɗanga, reve a̱vu na̱ mawun ma̱ a̱na̱wun ma̱ wu Haruna, i ɓoloto ama uba̱ta̱ u ta̱. Amaꞌa a̱ a̱ka̱nla̱, reve vu yuwan adanshi na aatali'i u ta̱ gba a̱ ta̱wa̱ na̱ mini ma na u ri pe na̱ a̱yi. Nna̱ vu uta̱a̱ na̱ mini diga a aataliꞌi, reve vu ca amaꞌa ni iliyamunga i le o sowo.>>

9 Ɗaɗa Musa tarai aaɗanga'a a̱ ma̱ka̱ka̱n ma̱ A̱sulazuva cine u damma niyi. 10 Reve a̱yi na̱ Haruna o ɓoloto amaꞌa elime a aataliꞌi, a̱vu u damma, <<Gogo, uwwai a̱ɗu aza a aciyogbamu. She na̱ tsu uta̱wa̱ ɗu na̱ mini a aatali a nda?>> 11 A̱vu Musa ꞌya̱sa̱n ukere wa̱ yi, reve u faba aataliꞌi ure na aaɗanga'a. Reve mini me reme o utusa̱ a̱bunda̱, reve amaꞌa ni iliyamunga i le o sowo.

12 A̱vu gba A̱sulazuva a damma Musa na̱ Haruna, <<Adama a na i ꞌyuwain a zuwaa mu ucira na yaa ca mu tsugbain e esu a aza a Isra'ila, yaa tara ama nda a uwa e iɗa i na maa casu le shi.>>

13 A̱yi nda a̱yi ɗa mini ma Meriba uba̱ta̱ u na aza a Isra'ila a yuwain mawasan na̱ A̱sulazuva nu uba̱ta̱ u na u rocoi aciya̱yi na akiza e ekere e le.

14 Musa lyungu ta̱ nlingata diga Kedesh a̱ tyo uba̱ta̱ u mogono ma̱ Edom, adansa, <<Apa ili i na za va̱ wu Isra'ila dammai, vu reve ta̱ na̱ a̱tsuma̱lima̱ a na a cina ntsu suru. 15 Nkaya n tsu n 'ya̱wa̱ ta̱ Masar, waru tsu da̱nu ta̱ ɗe a'wan a̱ a̱bunda̱. Aza a Masar o ɓongi tsu ta̱ oɓolo na̱ nkaya n tsu. 16 Agba a na tsu showeyin A̱sulazuva, wu uwwa ta̱ mesun ma̱ tsu reve u lyungu malingata ma̱ A̱sula̱ a̱vu wu uta̱a̱ tsu diga Masar. <Gogo a̱tsu ɗa nda a Kedesh, lyuci na ri a̱ nge'en mu utyo wi iɗa ya̱ wu. 17 Vu yuwan ankuri vu lyawa tsu tsu utula̱i ni iɗa ya̱ wu. Tsa̱a̱ utula̱i na̱ a̱ɗuma̱ ko a̱ɗuma̱ a̱ ina̱bi shi, ko tsu sowo mini mo oko'o ma̱ wu shi. Tsu ta̱ kuru nu Ure u Gbain u Mogono goon, waru tsaa vadala ko usa'ani ko ugula̱ shi she tsu uta̱ utyo wi iɗa ya̱ wu.> >> 18 Amma Edom usu ta̱ u damma, <<Ya̱a̱ utula̱i na̱ pa shi, nni i rito gba, tsu ta̱ o uta̱ tsu riya̱a̱ ɗu na̱ matsun me pe'eni.>> 19 Reve aza a Isra'ila a̱ usu, <<Tsu ta̱ kuru nu ure u gbain, na̱ a̱tsu ko iliyamunga i tsu i sowo mini ma̱ ɗu, tsu ta tsupa ɗu. Tsu ciga ta̱ tsu utula̱i goon a ana, babu waru ili i ro.>> 20 Reve waru u usuwisa̱, <<Ya̱a̱ utula̱i nu uba̱ta̱ u nda shi.>> Ɗaɗa Edom uta̱i uvon ne ele na̱ a̱soja a̱ a̱bunda̱ na̱ a̱za̱ o ucira. 21 Ana wo o'woi Edom putsa nle o utula̱i ni iɗa ya̱ yi, reve aza a Isra'ila a vadala nu ure u ro.

22 A̱vu aza a Israꞌila suru e reme mmalu diga Kedesh reve a̱ tyo a Masasan mo Hor. 23 Reve A̱sulazuva a damma Musa na̱ Haruna a Masasan mo Hor o utyo wi iɗa ya Edom, a na, 24 <<Haruna aa uwa e iɗa i na maa ca ama a Israꞌila shi, u ta̱ kuwa̱, adama a na a̱ɗu ra i yuwaan ta̱ ili i na n zuwai aciyogbamu a̱ mini ma̱ Meriba. 25 Vu tara Haruna oɓolo nu ulobo wa̱ yi Eliyaza vu kumba ne ele a Masasan mo Hor. 26 Reve vu foɗo a̱tugu a Haruna a̱vu vo otowo ulobo wa̱ yi Eliyaza, adama a na u ta̱ kuwa̱ ɗe.>>

27 Reve Musa yuwan cine A̱sulazuva a dammai: A kumba ta̱ a Masasan mo Hor e esu a ama a Israꞌila suru. 28 A̱vu u foɗo a̱tugu a Haruna, reve wo otowo ulobo wa̱ yi Eliyaza. A̱vu Haruna kuwa̱ ɗe zuva masasaꞌan. Ɗaɗa Musa na̱ Eliyaza a̱ cipa̱i zuva masasaꞌan. 29 Ana amaꞌa suru e revei a na Haruna kuwa̱i, a̱vu a yuwan nden n wiruta̱ hali rana mataꞌatsu.