1 Mantsa ma na mogono ma Arada, za na da̱na̱i mogono mo upasu wu uyagi wa Ka'ana, za na ri nden a Nege wu uwwai a na aza a Isra'ila a̱ ta̱ lo a̱ ta̱wa̱ nu ure wa Atarim, a̱vu u riya̱a̱ le nu uvon, a̱vu u reme ozo o ro a̱tsuma̱ e le. 2 Reve aza a Isra'ila a yuwaan A̱sulazuva akucunu a nda: <<Na̱ vaa ca tsu ama a nda e ekere a̱ tsu, tsu ta̱ kototo ilyuci i le suru suru.>> 3 A̱sulazuva o poloo ta̱ uɗyo wa aza a Isra'ila atsuvu, a̱vu u ca le aza a Ka'ana e ekere e le. A̱vu gba o kototo le ni ilyuci i le suru suru, adama o ndolo a ɗa a cayi uba̱ta̱'a̱ ala Homa*.

4 Aza a Isra'ila a̱ 'yon ta̱ reve e reme ta̱ mmalu diga a Masasan mo Hor a̱ tyo nu ure u Mala ma̱ Shili, adama a kanzuꞌwa iɗa ya̱ Edom. Agba amaꞌa a gura kaɓa asuvu o ure shi. 5 Reve a yuwan adanshawuya a̱ tyo e ekere a̱ A̱sula̱ na̱ Musa, a̱vu a damma, <<Adama a̱ nye a ɗa yu uta̱a̱ ntsu a̱tsuma̱ a Masar adama tsu kuwa̱ pa a̱tsumona a nda? Ilyalya yi pa shi! Waru mini ma pa shi! Waru tsu kuna̱ ta̱ ni ilyalya i vanvama i nda!>>

6 A̱vu A̱sulazuva a̱ lyunguwa̱ le ni iyo i tsukono a̱tsuma̱ e le, a̱vu a̱ ka̱ɗa̱ ama, reve ama a Isra'ila na̱ a̱bunda̱ a̱ kuwa̱. 7 Reve amaꞌa a̱ ta̱wa̱ uba̱ta̱ wa Musa reve a damma, <<Tsu yuwan ta̱ unusu ana tsu yuwain adanshawuya a̱ tyo e ekere a̱ A̱sulazuva na̱ a̱vu. Vu vasa adama A̱sulazuva a tawaa tsu iyo i nda.>> Reve Musa patiya amaꞌa.

8 Reve A̱sulazuva a damma yi, <<Vu ruma yo vu rumushili, a̱vu vu katala yi zuva vo owoꞌo, adama za na yo ka̱ɗa̱i suru, a̱vu wi indana u laꞌa.>> 9 Ɗaɗa Musa yuwain yo vu rumushili, a̱vu u zuwa yi zuva vo owo'o, reve za na yo ka̱ɗa̱i biti, a̱vu nu u ka̱lyuwa̱ yo vu rumushili'i she u laꞌa. 10 Reve aza a Isra'ila a̱ ꞌyon a̱vu a̱ va̱la̱ a Obo. 11 A̱vu a̱ ꞌyon diga Obo a̱vu a̱ va̱la̱ a Iye Abarim, a̱tsumona a na a̱ ri a̱ nka̱la̱la̱i na̱ Mowa nu upasu wa asana. 12 Diga lo reve a̱ ꞌyon a̱ va̱la̱ o uka̱ri wa̱ Zere. 13 Reve a̱ ꞌyon diga lo reve a̱ va̱la̱ mavada mo Uɗolu wa Anon, za na ri a̱tsumona za na ka̱ra̱la̱i a̱ tyo utyo wi iɗa wa aza a Amoriya. Anon a̱yi utyo wi iɗa wa̱ Mowa e memere ma̱ Mowa na aza a Amoriya ɗa. 14 A̱yi ɗa i zuwai Aatagada o Uvon a̱ A̱sulazuva a dammai: <<Wahe a̱tsuma̱ o upasu wa Sufa, na̱ ɗolu va Anon, 15 nu uzuru wu ɗolu na remei a̱ tyo nda̱na̱ta̱ ma Ar a̱vu u ga'asan nu utyo wa̱ Mowa.>> 16 Diga lo reve a lyuwa elime a̱ tyo Biya, o oko'o a na A̱sulazuva a dammai Musa, <<Ɓoloto ama uba̱ta̱ u ta̱ a̱mu gba n ta ca le mini.>>

17 Reve aza a Isra'ila a cana ishipa i nda:

<<Oko'o,

uta̱a̱ mini!

A canaa yi ishipa.

18 Oko'o a na muwun mu ngono n ka̱pa̱i,

a na azagbain a̱ ka̱pa̱i na

aɗanga o tsugono tse le

na aɗanga e le.>>

Reve diga a̱tsumona'a a̱ ka̱ra̱ a̱ tyo Matana. 19 Diga Matana a̱ tyo Nahaliye, diga Nahaliye a̱ tyo Bamo, 20 waru diga Bamo a̱ tyo o uka̱ri a̱tsuma̱ a̱ Mowa, uba̱ta̱ u na ncilecile m Masasan ma Pisiga ma̱a̱ ka̱lyuwusa̱ uba̱ta̱ u na u ri m mini shi.

21 Reve aza a Israꞌila a̱ lyungu nlingata a damma Sihon mogono ma aza a Amoriya a na,

22 <<Lyawa tsu tsu utula̱i ni iɗa ya̱ wu mejege. Tsaa ɓatsa a̱ a̱ɗuma̱ ko a̱ a̱ɗuma̱ a̱ ina̱bi ko tsu sowo mini o oko'o a̱ ta̱ shi. Tsu ta̱ kuru Ure u Gbain u Mogono, hali she tsu utula̱i utyo wi iɗa ya̱ wu.>>

23 A̱vu gba Sihon putsa le o utula̱i nu utyo wi iɗa ya̱ yi. Reve u foɓo a̱soja a̱ yi a̱vu a uwa a̱tsumona adama a yuwan uvon na aza a Isra'ila. Ana u rawai Jahaz, a̱vu u yuwan uvon na̱ Isra'ila. 24 A̱vu gba ama a Israꞌila o una mogonoꞌo na̱ matsun me pe'eni, a̱vu a usa iɗa ya̱ yi diga o uɗolu wa Anon a̱ tyo Jabo, agba uba̱ta̱ wa aza a Amon u ɗa goon a lyuwai, adama a na utyo wi iɗa u le u da̱na̱ ta̱ nu ukari wu ucira. 25 Reve aza a Isra'ila a lyuwa ilyuci i gbagbain ya aza a Amoriya suru, reve a̱ da̱nu e ilyuci'i, oɓolo na̱ Heshibon na̱ mulyuci n na n ri uka̱nda̱ruwu na̱ a̱yi suru. 26 Heshibon ɗa shi lyuci gbain va Sihon mogono ma aza a Amoriya, za na yuwain uvon na̱ mogono ma̱ Mowa reve u usa yi iɗa ya̱ yi suru diga o Uɗolu wa Anon. 27 Adama o ndolo a ɗa a̱za̱ e ishipa a tsu damma,

<<Ta̱wa̱i Heshibon, lyawai a suwisa yi,

lyawa a̱ ka̱mbuwisa̱ lyuci gbain va Sihon.

28 <<Adama a na akina a̱ ta̱wa̱ ta̱ diga Heshibon,

elentsu a akina diga a̱ lyuci va Sihon.

U soɗu ta̱ Ar va̱ Mowa,

a̱vu u kototo agaɗi o uɗolu wa Anon.

29 A̱tsuma̱lima̱ a ta cina wu, a̱vu Mowa!

A̱ rukutsa̱ ɗu ta̱, a̱ɗu ama a Kemosh!

U ca ta̱ olobo a̱ yi o o'wo a̱za̱ e ilaɗi yu uvon,

esheli waru o una̱ wi ili i na e remei uba̱ta̱ wu uvon ya Sihon mogono ma aza a Amoriya.

30 <<Amma gogo o kototo le ta̱,

o kototo ta̱ Heshibon hali a rawa Dibon.

Tsu rukutsa̱ le ta̱ hali a rawa Nofa

a̱ tyo Medeba.>>

31 Ne ɗa Isra'ila da̱nuyi e iɗa ya aza a Amoriya.

32 Reve Musa lyungu aza a matawa mo utyo wi iɗa a̱ 'ya̱wa̱ Jaza, reve aza a Isra'ila e reme mulyuci n na n ri uka̱nda̱ruwu na̱ a̱yi a̱vu a̱ gba̱ra̱ aza a Amoriya a na a̱ shi pe.

33 Reve aza a Israꞌila a vadala ure a̱ tyo e iɗa ya Bashan, reve Og mogono ma Bashan na a̱soja a̱ yi suru o uta̱ adama a yuwan uvon ne ele a Edirai. 34 A̱vu A̱sulazuva a damma Musa, <<She vu uwwa wovon wa̱ yi wan, adama a na n ca yi ta̱ e ekere a̱ wu, oɓolo na̱ soja a̱ yi suru ni iɗa ya̱ yi. Vu yuwan na̱ a̱yi cine vu yuwain na̱ Sihon mogono ma Amoriya, za na yuwain tsugono a̱tsuma̱ a Heshibon.>>

35 Reve aza a Israꞌila o una yi, na̱ a̱yi no olobo a̱ yi na̱ a̱soja a̱ yi suru. A lyawaa le ko aaci a̱ ta̱ shi. Reve a kpada iɗaꞌa yo oꞌwo iɗa i le.