1 A̱sulazuva a yuwan ta̱ adanshi na̱ Musa, u damma, 2 <<Vu ruma avana e re a azurufa. Reve a yuwan ulinga ne ele adama e ɗe ama o ɓoloto, waru na a adama o u'yosun o uva̱la̱ta̱. 3 A mantsa ma na e ivula̱i avana'a ra, reve ama suru o ɓoloto a̱ ma̱ka̱ka̱n ma̱ wu o una̱ntsu wo Oogodo o Uga'asusan. 4 Amma nna̱ za ta̱ ɗa e ivula̱i, azagbain a na a̱ ri aci o gundo va Isra'ila, ele ɗa oo ɓoloto a̱ ma̱ka̱ka̱n ma̱ wu. 5 Ne e ivula̱ wivulu wa'a, gundo na ri uva̱lu asana ele ɗa a̱ 'yon e reme ure. 6 Ne e ivula̱ wivulu u wa'a we ire, aza a na a̱ ri uva̱lu uyagi ele ɗa a̱ 'yon e reme ure. Mesu'un u to o'wo iroci yu u'yosun. 7 Amma nne ee ɗe ama o ɓoloto, yi ivulula̱i avana'a.

8 <<Olobo a Haruna nan ganu, ele ɗa ee ivula̱ avana'a. A̱yi nda u to o'wo ɗu ili i mayan hali hali a̱ tyo o umatsun we elime. 9 A mantsa ma na yu uta̱i e iɗa i ɗu na yaa yuwan uvon na̱ n'yuwatan n ɗu aza a na oo ɓongishi ɗu, yi ivula̱ avana, adama A̱sulazuva A̱sula̱ a̱ ɗu a cuwan na̱ a̱ɗu, a̱vu u wawa ɗu e ekere a n'yuwatan n ɗu. 10 Waru a mantsa ma̱ ma̱za̱nga̱ ma̱ ɗu, mantsa ma na i tsu yuwan a̱buki na̱ A̱buki o Woto u Sa'avu, i te ivula̱ avana a mantsa mo ucasu u kucci vu ukula̱tosu na̱ kucci muwwulai ɗu. Waru o to o'wo ili i na A̱sula̱ a̱ ri n cuwusan na̱ a̱ɗu. A̱mu ɗa A̱sulazuva A̱sula̱ a̱ ɗu.>>

11 O urana wu ushin u woto we ire a aa'wan e ire ana o uta̱i Masar, ɗaɗa eleshe a̱ 'yoyin zuva vo Oogodo o Uga'asusan. 12 Reve ama a Isra'ila a̱ 'yon e reme mmalu oɓolo oɓolo diga A̱tsumona a Sinai, hali she na eleshe e isawain A̱tsumona a Faran. 13 Reve a̱ 'yon o uta̱ u'yowun wu ufaru cine A̱sulazuva a dammai Musa.

14 Atuta o ugundo wa Yahuza u ɗa u fara 'yoyin, reve akapi o gundo a̱ kuru oɓolo oɓolo. Nashon ulobo wa Aminada u ɗa u da̱na̱i zagbain le. 15 Nataniya ulobo wa̱ Zowa u ɗa u da̱na̱i zagbain ve eɓele o ugundo wa Isaka. 16 Eliyabu ulobo wa Helon a̱yi ɗa u da̱na̱i zagbain ve eɓele o ugundo wa Zebulun. 17 Reve a̱ mula̱ oogodoꞌo, a̱vu aza a Gashon na aza a Merari aza a na a tanu niyi a̱ 'yon o uta̱.

18 Reve atuta o ugundo wa̱ Roben a̱ kuru le oɓolo oɓolo. Elizu ulobo wa Shedeya u ɗa u da̱na̱i zagbain le. 19 Shelumiye ulobo wa Zurishadai a̱yi ɗa zagbain vu ugundo wa Saminu. 20 Eliyasa ulobo wa Deyuwe a̱yi ɗa zagbain ve eɓele o ugundo wa Gadu. 21 Reve aza a Koha a̱ kuru utanuwu ni itana ya akiza. A̱ ta̱ shuwa̱ oogodoꞌo kafu a rawa.

22 Reve atuta o ugundo wa Ifiramu a̱ kuru le oɓolo oɓolo. Elishama ulobo wa Amihu u ɗa zagbain le. 23 Gamaliya ulobo wa Fedazu a̱yi ɗa zagbain ve eɓele o ugundo wa Manase. 24 Abidan ulobo wa Gidiyoni a̱yi ɗa zagbain ve eɓele o ugundo wa Banyami.

25 Reve o ukosu, atuta o ugundo wa Dan a̱ kuru le oɓolo oɓolo. Reve o o'wo a̱ca̱pa̱ a̱ pirishi akapi o oɓolo suru. Ahiyeza ulobo wa Amishadai a̱yi ɗa zagbain a aci e le. 26 Fagiye ulobo wo Okiran a̱yi ɗa zagbain ve eɓele o ugundo wa Asha. 27 Ahira ulobo wa Enan a̱yi ɗa zagbain ve eɓele o ugundo wa Nafutali. 28 A̱yi nda a̱yi ɗa ugeru wu mmalu wo oɓolo a Isra'ila a mantsa ma na a̱ 'yoyin e remei ure suru.

29 Reve Musa damma Hoba ulobo wa Reyuwe va Midiya, a̱sha̱wa̱le a Musa, <<Tsu ta̱ 'yon a̱ tyo uba̱ta̱ u na A̱sulazuva a dammai, <N ta ca ɗu a̱yi.> Ta̱wa̱ tsu 'ya̱wa̱i oɓolo tsu ta̱ ɓa̱na̱ wu ulobonu, adama a na A̱sulazuva a yuwaan ta̱ Isra'ila nzuwulai mi isa'ani.>>

30 Reve u usu, <<O'o, ma̱a̱ 'ya̱wa̱ shi, n ta̱ ka̱mba̱ e iɗa i va̱ uba̱ta̱ wa ama a̱ va̱.>>

31 Amma Musa damma ta̱, <<Yuwan ankuri she vu lyawa tsu wan, adama a na vu reve ta̱ uba̱ta̱ u na tsa̱a̱ va̱la̱ a̱tsumona, vu to rono tsu aɗanga. 32 Waru na̱ vu kuru tsu, tsu ta̱ ne'eshen ili i sa'ani i na A̱sulazuva a ca ntsu biti oɓolo na̱ a̱vu.>>

33 Ɗaɗa aza a Isra'ila a̱ 'yoyin diga a masasan ma̱ A̱sulazuva, reve a yuwan mmalu mu rana ta'atsu. Akpati a Nzuwulai a̱ A̱sulazuva a ɗa a walaa nle elime a mantsa ma ayin a ta'atsu o ndolo adama u zamiya le uba̱ta̱ u na ee ivuwan. 34 Waru eleshe a̱ A̱sulazuva a̱ da̱na̱ ta̱ zuva le nu urana a mantsa ma na a̱ 'yoyin diga o uva̱la̱ta̱. 35 A mantsa ma na suru akpati'i a̱ 'yoyin, Musa tsu damma ta̱,

<<Yon A̱sulazuva!

Lyawa n'yuwatan ma̱ wu m bete'we,

aza a na a 'yuwan nuwu a suma a̱ ma̱ka̱ka̱n ma̱ wu.>>

36 Reve a mantsa ma na u cipa̱i biti, a̱vu u damma,

<<A̱sulazuva,

ka̱mba̱ uba̱ta̱ wa ama a Isra'ila ukpakukupa kupa a na a̱ ri n kece shi.>>