1 Reve A̱sulazuva a yuwan adanshi na̱ Musa na̱ Haruna u damma, 2 <<Kecei ali o ugundo wa̱ Koha ko'o a̱tsuma̱ o umatsun u nan Levi o una̱ wu gundo le na̱ matsun vu nkaya n le. 3 I kece ali aza a na a̱ ri na a'wan mata'atsu a̱ tyo kupoton aza a na a rawai a yuwan ulinga o Oogodo o Uga'asusan. 4 Apa nda ulinga u limatan va̱ Koha o Oogodo o Uga'asusan: ugoloɓuso wi ili i na i la'ai akiza. 5 A mantsa ma na ya̱a̱ 'yon diga o uva̱la̱ta̱, Haruna no olobo a̱ yi a ta uwa pe o oogodo'o, reve a̱ ba̱ɗa̱ umuna u na wee gesheshe Upasu u na u La'ai Akiza, reve a pala Akpati a Nzuwulai na̱ a̱yi. 6 Reve a pala yi na̱ kwan va̱ a̱giri'i a na a̱ sukuta̱i a̱vu waru a pala zuva va̱ yi nu umuna u mini ma̱ bulu. Reve o oto yi aɗanga o utanusu wa̱ yi.

7 <<A̱vu o polo umuna u mini ma̱ bulu zuva va apada o opopofu a na a tawai a̱ nge'en. Reve a zuwa ntaɗa na̱ mpara na asa'atsu na̱ ndele adama a̱ kucci vi ili yo oso. Opopofu a na a̱ tsu da̱na̱ lo uzuwu a̱ ta̱ da̱na̱ ɗe uzuwu. 8 Reve a pala ili i nda nu umuna u shili, reve a pala le na̱ kwan va̱ a̱giri'i a na a̱ sukuta̱i. Reve o oto yi aɗanga o utanusu wa̱ yi. 9 A̱vu a tara umuna u mini ma̱ bulu a pala wisawatan u fitila, oɓolo ni ifitila ya̱ yi na̱ makkana mo ukimususa̱n wa akina na̱ mutaɗa ma̱ yi na̱ muden m mani'in ma na a̱ tsu tsuwa̱a̱n yi. 10 Reve a katala wisawatan u fitila'a oɓolo ni itana ya̱ yi wupalu na̱ kwan va̱ a̱giri'i a na a̱ sukuta̱i, a̱vu a zuwa yi a akpata a na a tsu tanu yi.

11 <<A ta pala masa'a ma zinariya'a nu umuna u mini ma̱ bulu, reve a pala yi na̱ kwan va̱ a̱giri'i a na a̱ sukuta̱i. A̱vu o oto yi aɗanga o utanusu wa̱ yi.

12 <<A ta tara itana i na a yuwusan ulinga ne ele a̱ a̱a̱'isa̱, reve a katala le nu umuna u mini ma̱ bulu. A̱vu a pala le na̱ kwan va̱ a̱giri'i a na a̱ sukuta̱i, a̱vu a zuwa le a akpata a na a tsu tanu le.

13 <<A̱ ta̱ pura̱ okomo a masa'a'a reve a pala masa'a'a nu umuna wu shili u ma̱ɗiya̱. 14 Reve a zuwa ɗe itana i na a yuwusaan ulinga a masa'a'a suru, ele nda, ataɗa a akina ni ikune ya akatsu ni isheburu na akwanu a gbagbain, itana yu ulinga a masa'a'a suru. Reve a pala yi na̱ kwan va̱ a̱giri'i a na a̱ sukuta̱i. Reve o oto yi aɗanga o utanusu wa̱ yi. 15 Na̱ Haruna no olobo a̱ yi o koto wupalu wu uba̱ta̱ wa akiza'a ni itana yu uba̱ta̱'a̱ suru mantsa ma na oɓolo a cigai a̱ 'yon, reve ugundo wa̱ Koha a̱ ta̱wa̱ a̱ tanu le. Agba she a̱ ju'wa̱n ili ya akiza wan adama a̱ kuwa̱ wan. Ele nda ele ɗa itana yo Oogodo o Uga'asusan i na ugundo wa̱ Koha waa tanu.

16 <<Eliyaza ulobo wa Haruna ganu ɗa a̱a̱ da̱na̱ a̱ ka̱lyuwusa̱ mani'in me ifitila ni ili i ma̱guru na̱ kucci vi ishina na a tsu casu kuci na̱ mani'in mo utsusun. A̱yi ɗa wa̱a̱ da̱na̱ a̱ ka̱lyuwusa̱ oogodoꞌo ma̱ɓula̱ ma̱ yi ni ili i ri pe suru, oɓolo nu uba̱ta̱ wa akiza ni itana yu ulinga ya̱ yi.>>

17 Reve A̱sulazuva a yuwan adanshi na̱ Musa na̱ Haruna u damma, 18 <<She i lyawa ugundo wa̱ Koha u koto a̱tsuma̱ a nan Levi wan. 19 Apa nda cine yaa yuwan ne ele adama a̱ kuwa̱ wan na a rawa zuzu ni itana i na i la'ai akiza wan: Haruna no olobo a̱ yi a ɗa a uwa pe reve a ca za suru ulinga u na waa yuwan ni ili i na waa tanu. 20 Amma she a̱za̱ a̱ Koha a uwa adama e ene itana ya akiza wan ta̱wa̱ a̱ kuwa̱ wan.>>

21 Reve A̱sulazuva a yuwan adanshi na̱ Musa, u damma, 22 <<Kece ali o ugundo wa Gashon o una̱ wu gundo le na̱ matsun vu nkaya n le. 23 Diga aza a na a̱ ri na a'wan mata'atsu a̱ tyo kupoton nu umatsun, vu ɗana le aza a na suru a rawai a yuwan ulinga o Oogodo o Uga'asusan.

24 <<Apa nda ulinga wu umatsun wa Gashon, a̱tsuma̱ a mayan ma̱ a̱ga̱nda̱ nu utanusu wi itana: 25 Ele ɗa aa tanu Oogodo o Uga'asusan na apalutsu a̱ yi, za va̱ a̱tsuma̱ na̱ za va alanga na apalutsu a kwan va̱ a̱giri'i a na a̱ sukuta̱i a na a̱ ri zuva va̱ yi nu umuna wu una̱ntsu wo Oogodo o Uga'asusa'an. 26 Ele ɗa waru aa tanu umuna wa agalaci na̱ za vu u'uwata wu una̱ntsu wa agalaci u na u ka̱nda̱ruwa̱i Oogodo o Uga'asusan na̱ masa'a na amunga e le ni itana yu ulinga i le suru. Reve olobo a Gashon a yuwan ne ele ili i na wu ntsayi a yuwan ne ele. 27 Ulinga wu ugundo wa Gashon suru u to o'wo e ili i na Haruna no olobo a̱ yi a dammai, ili i na aa tanu ni ili i na aa yuwan suru. I ca le ulinga u na aa yuwan suru. 28 A̱yi nda a̱yi ɗa ulinga wu umatsun wu ugundo wa Gashon o Oogodo o Uga'asusan. Ulinga u na aa yuwan suru Itama ulobo wa Haruna ganu ɗa oo roco le ili i na aa yuwan.

29 <<Vu kece ali o ugundo wa Merari o una̱ wu gundo le na̱ matsun vu nkaya n le. 30 Vu kece le diga aza a a'wan mata'atsu a̱ tyo a'wan kupoton, aza a na a rawai a yuwan ulinga o Oogodo o Uga'asusan. 31 Apa nda ili i na a zuwa nle aa tanusu a̱tsuma̱ a̱ a̱ga̱nda̱ o Oogodo o Uga'asusan: akpata o Oogodo o Uga'asusan na aɗanga a̱ yi na atsura a̱ yi na̱ nkyun ma̱ yi, 32 oɓolo na atsura a na a̱ ka̱nda̱ruwa̱i agalaci na̱ nkyun n le, na akatsu e le na amunga e le oɓolo ni itana yu ulinga i le suru ni ili i na i ri oɓolo ne ele suru. Vuma suru vu zuwaa yi ili i na waa tanu. 33 A̱yi nda a̱yi ɗa ulinga wu umatsun wu ugundo wa Merari na a̱a̱ da̱na̱ a yuwusan a̱tsuma̱ o Oogodo o Uga'asusan. Itama ulobo wa Haruna ganu ɗa o roco le cine aa yuwan.>>

34 Reve Musa na̱ Haruna na azagbain a ama e kece umatsun wa̱ Koha o una̱ wu matsun le na̱ matsun vu nkaya n le. 35 E kece le ta̱ diga aza a na a̱ ri a'wan mata'atsu nu umatsun a̱ tyo kupoton, aza a na a rawai a yuwan ulinga o Oogodo o Uga'asusan. 36 A̱bunda̱ e le a rawa ta̱ ama ukpakukupa ure nu ukpakucindere na̱ kupoton (2,750). 37 A̱yi nda a̱yi ɗa ukecu wu matsun va̱ Koha, aza a na a rawai a yuwan ulinga o Oogodo o Uga'asusan, aza a na Musa na̱ Haruna kecei cine A̱sulazuva a zuwai Musa yuwan.

38 Reve e kece umatsun wa Gashon o una̱ wu matsun le na̱ matsun vu nkaya n le, 39 diga za va a'wan mata'atsu nu umatsun a̱ tyo kupoton, aza a a rawai a yuwan ulinga o Oogodo o Uga'asusan. 40 E kece le ta̱ o una̱ wu matsun le na̱ matsun vu nkaya n le ama ukpakukupa ure nu ukpakuta̱li na̱ mata'atsu (2,630). 41 A̱yi nda a̱yi ɗa a̱bunda̱ a matsun va Gashon, aza a na a rawai a yuwan ulinga o Oogodo o Uga'asusan, aza a na Musa na̱ Haruna e kecei cine A̱sulazuva a zuwai Musa yuwan.

42 Reve e kece umatsun wa Merari o una̱ wu matsun le na̱ matsun vu nkaya n le, 43 diga aza a na a̱ ri na a'wan mata'atsu nu umatsun a̱ tyo kupoton, aza a na a rawai a yuwan ulinga o Oogodo o Uga'asusan. 44 A̱bunda̱ a matsun le ɗa ama ukpakukupa uta'atsu nu ukpakure (3,200). 45 A̱yi nda a̱yi ɗa mekece mo matsun va Merari, aza a na Musa na̱ Haruna kecei cine A̱sulazuva a zuwai Musa yuwan.

46 Ne ɗa Musa na̱ Haruna na azagbain a Isra'ila e kecei nan Levi suru, o una̱ wu matsun le na̱ matsun vu nkaya n le, 47 diga za na ri na a'wan mata'atsu a̱ tyo kupoton nu umatsun, aza a na a rawai a yuwan ulinga o Oogodo o Uga'asusan. 48 A̱bunda̱ e le a ɗa ama ukpakukupa kunla̱ nu ukpakuton na̱ kupakunla̱ (8,580). 49 Cine A̱sulazuva a zuwai Musa yuwan, a ca ta̱ vuma suru ulinga u na waa yuwan ni ili i na waa tanu. Ne ɗa e kece nle cine A̱sulazuva a zuwai Musa.