1 Reve Balam damma Balak, <<Suwaa numu musa'a n cindere pa, a̱vu i foɓoo mu ogono e inan e cindere na̱ a̱giri'i e cindere.>> 2 Balak yuwan ta̱ cine Balam dammai, a̱vu ele ra a ca kucci vo oogono a nan na̱ a̱a̱giri'i a̱ masa'a suru.

3 A̱vu Balam damma Balak, <<Vi isawan lo zuzu na̱ kucci vu ukula̱tosu va̱ wu, a̱mu gba n ta̱ ka̱ra̱ me ene ko A̱sulazuva a̱ ta̱ ta̱wa̱ u ga'an na̱ a̱mu. Ili i na u roco numu suru n ta damma wu.>> A̱vu Balam ka̱ra̱ a̱ 'ya̱wa̱ zuva va agaɗi.

4 A̱sula̱ a ga'an ta̱ na̱ Balam, a̱vu Balam damma, <<N foɓo ta̱ musa'a n cindere, a masa'a suru n ca ta̱ ɗe kucci vo oogono a nan na̱ a̱a̱giri'i.>>

5 A̱vu A̱sulazuva a zuwa ikaka o una̱ wa Balam u damma, <<Ka̱mba̱ uba̱ta̱ wa Balak vu ca yi ikaka i nda.>>

6 Ɗaɗa Balam ka̱mba̱i uba̱ta̱ wa̱ yi a̱vu u cina yi mishin zuzu na̱ kucci va̱ yi, oɓolo na azagbain a̱ Mowa suru. 7 Apa ikaka i na Balam ca yi,

<<Balak ta̱wa̱to mu ta̱ diga Aram,

mogono ma̱ Mowa diga a nsasan ma asana. U damma,

<Ta̱wa̱, vu yuwaan mu Yakubu una̱,

ta̱wa̱ vu yuwaan aza a Isra'ila udammu wi iwuya.> 8 Aza a na koto A̱sula̱ a yuwayin una̱ shi,

cine tsa ɗa maa yuwaan le una̱?

Cine tsa ɗa maa yuwaan aza a na koto A̱sula̱ a yuwayin udammu wi iwuya shi udammu wi iwuya?

9 Diga zuva va atali a ɗa me ene nle,

a agaɗi a ɗa n cinkaya nle.

Me ene ta̱ ama a na a̱ ri nden ko'o

waru a tara aciyele una̱ta̱ na akapi a nɗa n ro shi.

10 Zane ɗa aa gura kece ugundo wa Yakubu aza a na a̱ ri a̱bunda̱ cine vu revei ma̱buta̱?

Zane ɗa aa gura kece uɓatsulai wa̱ na̱shi wa ama a Isra'ila?

Lyawa numu n kuwa̱ ukwa̱ wa̱ a̱za̱ a̱ a̱ɓula̱,

lyawa ukosu u va̱ wo o'wo tsa̱ a̱za̱ e le!>>

11 Reve Balak damma Balam, <<Nye i ɗa vu yuwaan numu tsunda? N ta̱wa̱to wu ta̱ vu yuwaan n'yuwatan n va̱ una̱, agba vu yuwan ili shi, amma a̱vu vu zuwaa le aba'un!>>

12 A̱vu Balam usu, <<Na̱ n ciga n 'yuwan n damma ili i na A̱sulazuva a zuwai o una̱ u va̱ shi?>>

13 Ɗaɗa Balak damma niyi, <<Ta̱wa̱ vu kuru mu a̱ tyo uba̱ta̱ u ro tsa̱ra̱ ve ene ele, vu te ene aza a na a la'ai zuzu na̱ a̱vu, amma vaa gura ene le suru shi. A̱vu vu yuwaan mu ele una̱.>> 14 A̱vu u tara yi a̱ tyo a atsusa a Zofi ɗe zuva va Pisiga, ɗe ɗa u suwai musa'a n cindere a̱vu u ca kucci vo oogono a nan na̱ a̱a̱giri'i a masa'a suru.

15 A̱vu Balam damma Balak, <<Isawan pa zuzu na̱ kucci va̱ wu a̱mu gba n 'ya̱wa̱ ɗe n ga'asan na̱ A̱sulazuva.>>

16 A̱vu A̱sulazuva a ga'an na̱ Balam reve u zuwa ikaka o una̱ wa̱ yi u damma, <<Ka̱mba̱ uba̱ta̱ wa Balak a̱vu vu ca yi ikaka i nda.>>

17 A̱vu u ka̱mba̱ uba̱ta̱ wa Balak reve u cina yi mishin zuzu na̱ kucci va̱ yi, oɓolo na̱ azagbain a̱ Mowa. A̱vu Balak ece yi, <<Ili i ne i ɗa A̱sulazuva a dammai?>>

18 A̱vu Balam damma ikaka ya̱ yi:

<<'Yon, Balak, vu zuwa atsuvu,

vu uwwa mu, a̱vu ulobo wa Zipo.

19 A̱sula̱ vuma ɗa shi a na waa yuwan epen,

ko vaɗilima̱, a na waa vadala okolo a̱ yi.

Nu u damma u tsu yuwan shi?

Nu u yuwan nzuwulai u tsu shiton shi?

20 N ushi ta̱ udammu n zuwa aba'un,

u zuwa ta̱ aba'un, waru maa gura vadala yi shi.

21 Iwuya koto i cina Yakubu shi,

koto e ene a̱tsuma̱lima̱ a̱tsuma̱ a Isra'ila shi.

A̱sulazuva A̱sula̱ e le o to oɓolo ne ele,

a ta yuwusan yisaali i ma̱za̱nga̱ i na a̱yi mogono me ele ma ɗa.

22 A̱sula̱ a ɗa o uta̱ nle a̱tsuma̱ a Masar,

u ta̱ nu ucira u yacin.

23 Tsuboci tse reme Yakubu shi,

babu ucira wa̱ a̱guma̱ u na waa gura reme Isra'ila.

A ta yuwan adanshi a aci a Yakubu na̱ Isra'ila,

<Ka̱lyuwa̱ ili i na A̱sula̱ a yuwain!>

24 Ama a Isra'ila a̱ ta̱ 'yosun cine vu revei kamu vu ka, a̱ 'ya̱sa̱n ta̱ aciyele cine vu revei kamu na tsi ivuwan shi she nu u reme ilyalya ya̱ yi, a̱vu waru wu peɗe mpasa mi ili i na u remei.>>

25 A̱vu Balak damma Balam, <<Nna̱ vaa yuwaan le una̱ shi, to, she vu zuwaa le aba'un wan ko ke'en!>>

26 Amma Balam usu ta̱, <<N damma wu na̱ n ciga n 'yuwan n yuwan ili i na suru A̱sulazuva a dammai shi?>>

27 Reve Balak damma Balam, <<Ta̱wa̱, n 'ya̱wa̱to wu uba̱ta̱ u ro. Ko u ta gura zuwa A̱sula̱ a uwwa uyo'o u lyawa wu vu yuwaan mu ele una̱ diga ɗe.>> 28 A̱vu Balak tara Balam a̱ tyo zuva va̱ Peyo, za na ri a̱ nka̱la̱la̱i na̱ a̱tsumona.

29 A̱vu Balam damma, <<Suwaa mu musa'a n cindere pa, a̱vu vu foɓoo mu ogono e inan e cindere oɓolo na̱ a̱giri'i e cindere.>> 30 Balak yuwan ta̱ cine Balam dammai, reve u ca kucci vo oogono a nan na̱ a̱a̱giri'i a masa'a suru.