1 Ele nda ele ɗa ugundo wa Haruna na̱ Musa a mantsa ma na A̱sulazuva a yuwain adanshi na̱ Musa a Masasan ma Sinai. 2 Apa nda ala o olobo a Haruna: Nadab mawun mo ufaru na̱ Abihu na̱ Eliyaza na̱ Itama. 3 Ele nda ele ɗa ala o olobo a Haruna, nan ganu na a̱ tsuwa̱yin mani'in na a tawai adama a yuwan a̱ga̱nda̱ a tsuganu. 4 Amma Nadab na̱ Abihu a̱ kuwa̱ ta̱ a̱ ma̱ka̱ka̱n ma̱ A̱sulazuva adama a na a cayi A̱sulazuva kucci va akina a na a ntsayi shi A̱tsumona a Sinai, agba a lyawa olobo shi. Adama o ndolo Eliyaza na̱ Itama ɗa yuwain ulinga u tsuganu a mantsa ma wuma wa Haruna dada le.

5 Reve A̱sulazuva a yuwan adanshi na̱ Musa u damma, 6 <<Ta̱wa̱ na ama o ugundo wa̱ Levi a̱ ma̱ka̱ka̱n ma Haruna ganu, adama a kamba yi. 7 A ta yuwaan yi ulinga na ama a Isra'ila suru a̱ ma̱ka̱ka̱n mo Oogodo o Uga'asusan. 8 O to goloɓo itana yo Oogodo o Uga'asusan. Reve a yuwan ulinga adama a ama a Isra'ila o ure wa̱ a̱ga̱nda̱ o oogodo'o. 9 Ili i na nan Levi aa yuwan a̱yi ɗa a yuwaan Haruna no olobo a̱ yi ulinga. 10 Vu zuwa Haruna no olobo a̱ yi a yuwan a̱ga̱nda̱ a tsuganu. Agba nna̱ vuma ro ko'o rawa zuzu na̱ a̱a̱'isa̱'a̱ a̱ to una yi.>>

11 Reve A̱sulazuva a yuwan adanshi na̱ Musa u damma, 12 <<N tara ta̱ nan Levi a̱tsuma̱ a aza a Isra'ila o una̱ wu ulobo wu ufaru suru ma na ma fara kpa̱tu'wa̱i umatsutsun wa aza a Isra'ila. Nan Levi o to o'wo a̱za̱ a̱ va̱, 13 adama a na mawun mo ufaru suru za va̱ ɗa. Urana u na mu unai muwun mu ufaru suru e iɗa ya Masar, n tawaa ta̱ aciya̱va̱ mawun mo ufaru ma Isra'ila suru, ko vaɗilima̱ ko vi iliyamunga. O to o'wo a̱za̱ a̱ va̱. A̱mu ɗa A̱sulazuva.>>

14 Reve A̱sulazuva a yuwan adanshi na̱ Musa a̱ A̱tsumona a Sinai u damma, 15 <<Vu kece ugundo wa̱ Levi o una̱ wu umatsun na̱ tsukaya tse le. Vu kece ulobo suru za na ri woto u ta̱ nu umatsun a gawan.>> 16 Ɗaɗa Musa kece nle cine A̱sulazuva a damma niyi.

17 Apa nda ala o olobo a̱ Levi:

Gashon na̱ Koha na̱ Merari.

18 Apa nda ala o olobo a Gashon o umatsun u le:

Libini na̱ Shimeyi.

19 Apa nda ala o olobo a̱ Koha o umatsun u le:

Amuram na̱ Iza na̱ Heburon na̱ Uziye.

20 Olobo a Merari waru o umatsun u le ele ɗa:

Mali na̱ Mushi. Ele ɗa mmaci ma̱ Levi o umatsun u le.

21 O ugundo wa Gashon u ɗa umatsun wa Libini na̱ Shimeyi o uta̱i. Ele ɗa aza a Gashon. 22 A̱bunda̱ e le suru a ali aza a na a̱ ri woto u ta̱ nu umatsun a gawan aza a na e kecei ele ɗa ukpakukupa ucindere nu ukpakuton (7,500). 23 Umatsun wa Gashon u ɗa wa̱a̱ va̱la̱ a̱livu a̱ca̱pa̱ o Oogodo o Uga'asusan. 24 Eliyasa ulobo wa Laye a̱yi ɗa zagbain vu u'wa wa Gashon. 25 Ulinga wu umatsun wa Gashon o Oogodo o Uga'asusan a̱yi ɗa ugoloɓuso wo oogodo'o na aapalutsu a̱ yi, nu umuna wu una̱ntsu wa̱ yi, 26 nu umuna wu ukowo nu umuna wu una̱ntsu wa agalaci a na a̱ ka̱nda̱ruwa̱i Oogodo o Uga'asusan na̱ masa'a na amunga ni ili i na suru a tsu yuwaan ulinga ne ele.

27 O ugundo wa̱ Koha u ɗa umatsun wa Amuram na̱ Izaha na̱ Heburon na̱ Uziye o uta̱i. Ele nda ele ɗa ugundo wa̱ a̱za̱ a̱ Koha. 28 A̱bunda̱ e le suru a ali aza a na a̱ ri woto u ta̱ nu umatsun a gawan ele ɗa ukpakukupa kunla̱ nu ukpakuta̱li (8,600). Ele ɗa a̱za̱ o ugoloɓuso wa̱ a̱a̱'isa̱. 29 Umatsun wu ugundo wa̱ Koha u ɗa a̱a̱ va̱la̱ upasu wu uyagi wo Oogodo o Uga'asusan. 30 Elizafan ulobo wa̱ Uziye u ɗa zagbain vu umatsun wa̱ Koha. 31 Ulinga u le a̱yi ɗa o goloɓo Akpati a Nzuwulai na apada na̱ wisawatan wi ifitila na̱ musa'a ni itana yu ulinga ya̱ a̱a̱'isa̱ i na a tsu yuwaan a̱ga̱nda̱, nu umuna ni ili i na a tsu yuwaan ulinga ne ele suru. 32 Eliyaza ulobo wa Haruna ganu a̱yi ɗa zagbain va azagbain vu ugundo wa̱ Levi. A̱yi ɗa a ɗangwai aci a aza a na o goloɓuso Oogodo o Uga'asusan. 33 O ugundo wa Merari u ɗa umatsun wa Mali na̱ Mushi o uta̱i. Ele ɗa ugundo wa Merari. 34 A̱bunda̱ e le suru a ali aza a na a̱ ri woto u ta̱ nu umatsun a gawan ele ɗa ukpakukupa uta̱li nu ukpakure (6,200). 35 Zagbain vu umatsun wa Merari a̱yi ɗa Zuriye ulobo wa Abihayi. Ele ɗa a̱a̱ va̱la̱ upasu wu ugana wo Oogodo o Uga'asusan. 36 Ulinga u na a ɗangwa nle a yuwan a̱yi ɗa ugoloɓuso wa akpata a̱ nge'en mo oogodoꞌo na aɗanga a̱ yi ni ikyun ya̱ yi ni itana i le suru, ni itana i na aa yuwusan ulinga ne ele suru. 37 Ele ɗa waru oo goloɓo atsura a na a̱ ka̱nda̱ruwa̱i oogodoꞌo na̱ nkyun n le ni irumu i ma̱shuwa̱ ma̱ le na amunga e le.

38 Musa na̱ Haruna no olobo a̱ yi ele ɗa a̱a̱ va̱la̱ elime o oogodoꞌo na asana upasu u na urana u tsu uta̱. Ele ɗa a̱a̱ da̱na̱ o goloɓuso a̱a̱'isa̱'a̱ o una̱ wa aza a Isra'ila. Na̱ vuma ro ko'o rawa zuzu no oogodoꞌo a̱ to una yi. 39 A̱bunda̱ a nan Levi a na A̱sulazuva a zuwai Musa na̱ Haruna e kece diga a matsun le ali woto u ta̱ nu umatsun a gawan ele ɗa ama ukpakukupa ushin nu ukpakukupa ure (22,000).

40 Reve A̱sulazuva a damma Musa, <<Kece muwun mu ufaru mo olobo ma aza a Isra'ila suru diga woto u ta̱ nu umatsun a gawan, reve vu gere ala e le. 41 Reve vu taraa mu nan Levi suru o una̱ u muwun mu ufaru ma aza a Isra'ila, ni iliyamunga i nan Levi o una̱ wu umatsun wu ufaru wi iliyamunga ya aza a Isra'ila. A̱mu ɗa A̱sulazuva.>>

42 Ɗaɗa Musa kecei muwun mu ufaru ma ali ma aza a Isra'ila suru cine A̱sulazuva a zuwa niyi u yuwan. 43 A̱bunda̱ a̱ muwun mu ufaru ma ali suru aza o woto u ta̱ nu umatsun a gawan a na a ɗanai na ala e le ele ɗa ukpakukupa ushin nu ukpakukupa ure nu ukpakure na̱ kupocindere na aza a ta'atsu (22,273).

44 Reve A̱sulazuva a yuwan adanshi na̱ Musa u damma, 45 <<Tara nan Levi o una̱ u muwun mu ufaru ma ali ma aza a Isra'ila suru, ni iliyamunga i nan Levi o una̱ wi iliyamunga ya aza a Isra'ila. Nan Levi o to o'wo a̱za̱ a̱ va̱. A̱mu ɗa A̱sulazuva. 46 Muwun mu ufaru ma aza a Isra'ila n la'a ta̱ nan Levi na ama ukpakure na̱ kupocindere na aza a ta'atsu (273) adama o ndolo a tsupaa akapi a na a la'ayi'i. 47 Vu ushi azurufa ton adama a vuma ta̱ biti u makundatsu ma̱ a̱a̱'isa̱. Za na ri nu ume u gera ushin. 48 Reve vu ca Haruna no olobo a̱ yi ikebe ya atsupu'u.>>

49 Ɗaɗa Musa ushiyi ikebe ya atsupu i muwun mu ufaru ma aza a Isra'ila aza a na a pasai a̱bunda̱ a ama a na nan Levi a tsupayi'i. 50 U ushi ta̱ ikebe ukpakukupa nu ukpakuta'atsu na̱ kupota̱li no ozo o ton (1,365) u makundatsu ma̱ a̱a̱'isa̱ e ekere e le. 51 Reve Musa ca Haruna no olobo a̱ yi ikebe ya atsupu'u, cine A̱sulazuva a damma niyi u yuwan.