1 Reve esheli a Zelofeha, ulobo wa Hefa ulobo wa Giliyadu, ulobo wa Maki ulobo wa Manase, ulobo wa̱ Isuhu, a̱ ta̱wa̱ zuzu. Ala e le a ɗa, Mala na̱ Nowa na̱ Hogula na̱ Milika na̱ Tiriza. 2 A̱vu e isawan elime a Musa na̱ Eliyaza ganu, na azagbain ni iɓolo ya ama suru o una̱ntsu wo Oogodo o Uga'asusan a̱vu a damma, 3 <<Dada tsu kuwa̱ ta̱ a̱tsumona. U da̱na̱ a̱tsuma̱ a̱za̱ e itoni ya̱ Kora, aza a na a̱ 'ya̱sa̱yin A̱sulazuva aci shi. U kuwa̱ ta̱ adama o unusu wa aciya̱yi. Agba u ri na̱ muwun mo olobo shi. 4 Adama a̱ nye aala a dada tsu a̱a̱ kuwa̱ a̱tsuma̱ o ugundo wa̱ yi adama a na u ri na̱ mawun mo ulobo shi? Vu ca tsu akunda agadu a dada tsu, tsi imaci ya̱ yi.>>

5 Reve gba Musa 'ya̱wa̱ na adanshi e le uba̱ta̱ wa̱ A̱sulazuva. 6 A̱vu A̱sulazuva a damma Musa, 7 <<Ili i na esheli a Zelofeha aa dansa mejege ma ɗa. Na̱ vu ciga vu 'yuwan vu ca le a agadu a dada le cine vu ca yi imaci ya̱ yi. Vu zuwa agadu a̱ yi wo o'wo za le.

8 <<Reve vu damma aza a Isra'ila, <Na̱ vuma kuwa̱ agba u lyawa ulobo shi, i vadala agadu a̱ yi a̱ tyo yo usheli wa̱ yi. 9 Waru nu u ri nu usheli shi, i ca muwun ma̱ a̱na̱wun ma̱ yi agadu a̱ yi. 10 Waru nu u ri na̱ muwun ma̱ a̱na̱wun shi, i ca muwun ma̱ a̱na̱wun ma dada va̱ yi agadu a̱ yi. 11 Agba na̱ dada va̱ yi ri na̱ muwun ma̱ a̱na̱wun shi, i ca imaci yu ugundo wa̱ yi i na i la'ai zuzu, adama wo o'wo na̱ a̱yi. A̱yi nda a̱yi ɗa woo o'wo wila̱ ni ili i na aza a Isra'ila a̱a̱ da̱na̱ a̱a̱ kurusu, cine A̱sulazuva a zuwayi Musa.> >>

12 Urana u ro, reve A̱sulazuva a damma Musa, <<Kumba zuva masasan ma Abarim, reve vu ka̱lyuwa̱ iɗa i na maa ca aza a Isra'ila. 13 Nna̱ ve ene vu koto, vu ta̱ kuwa̱ cine zakpara va̱ wu Haruna kuwa̱i, 14 adama a na ana iɓolo ya ama i yuwain aciyogbamu a̱ mini ma Meriba zuzu na̱ lyuci va Kedesh A̱tsumona a̱ Zin, a̱ɗu ra i 'yuwan ta̱ a yuwan tsutoni ni ili i na n dammai. I ca mu tsugbain tsa akiza a̱ ma̱ka̱ka̱n ma ama uba̱ta̱ u ndeɗe shi.>> A̱yi nda a̱yi ɗa mini ma Meriba Kedesh A̱tsumona a̱ Zin.

15 Reve Musa usu A̱sulazuva, 16 <<Lyawa A̱sulazuva, A̱sula̱ a wuma wu vaɗi suru u ɗangwaa ama a Isra'ila zagbain va aci a ama a nda. 17 Vu ca le vuma na aa gura walaa le elime o uvon, adama ama a̱ A̱sulazuva o o'wo she damma ikyon babu za va a aguɓa wan.>>

18 Reve A̱sulazuva a damma Musa, <<Vu tara Josuwa ulobo wa̱ Nun, vuma na ri na̱ ruhu va̱ A̱sula̱, vu kuruwa̱ yi ekere. 19 Vu zuwa yi wi isawan a̱ ma̱ka̱ka̱n ma Eliyaza ganu ni iɓolo ya ama suru reve vu tawa yi e esu e le. 20 Vu ca yi ucira wa̱ wu adama iɓolo ya aza a Isra'ila suru a yuwaan yi tsutoni. 21 U te isawan a̱ ma̱ka̱ka̱n ma Eliyaza ganu, za na aa zamiya yi a̱sa̱la̱ nu ulinga na̱ Urim e ekere a̱ A̱sulazuva. Nu udammu wa̱ yi u ɗa aza a Isra'ila oo uta̱ a̱ 'ya̱wa̱ uvon, waru nu udammu wa̱ yi u ɗa a̱ ka̱mba̱, a̱yi oɓolo ni iɓolo ya aza a Isra'ila suru.>> 22 Musa gba yuwan ta̱ cine A̱sulazuva a damma niyi. U tara ta̱ Josuwa a̱vu u zuwa yi wi isawan a̱ ma̱ka̱ka̱n ma Eliyaza ganu ni iɓolo ya ama suru. 23 Reve u kuruwa̱ yi ekere a̱vu u tawa yi adama o ulinga, cine A̱sulazuva a dammai o una̱ wa Musa.