1 Mantsa ma na a̱ da̱na̱i Hazero, Maryamu na̱ Haruna a yuwusaan ta̱ Musa adanshi a avama adama a ka va̱ yi usheli wa̱ Kush na u zuwai. 2 A̱vu a damma, <<Musa ɗa goon A̱sulazuva a yuwain adanshi na̱ a̱yi? A̱tsu gba, u yuwan adanshi na̱ a̱tsu fo shi?>> A̱vu gba A̱sulazuva a uwwa ili i na aa dansa.

3 Musa gba za vu uvotowun wu ugbozu u ɗa lon, za na la'ai koyan o urewesu wu uvaɗi u nda uvotowun wu ugbozu.

4 Babu usa̱n a̱vu A̱sulazuva a damma Musa na̱ Haruna na̱ Maryamu, <<Uta̱i i 'ya̱wa̱ o Oogodo o Uga'asusan a̱ɗu ama a ta'atsu.>> A̱vu a̱ 'ya̱wa̱ mataꞌatsu me le. 5 A̱vu A̱sulazuva a̱ cipa̱ a̱tsuma̱ o oɓolo e eleshe, wi isawan o una̱ntsu wo oogodoꞌo, a̱vu u ɗe Haruna na̱ Maryamu. A̱vu a rawa zuzu nu una̱ntsu wo oogodoꞌo. Ana ele ra a̱ ta̱wa̱i elime, 6 a̱vu A̱sulazuva a damma, <<I polo atsuvu na adanshi a̱ va̱, a̱mu ɗa A̱sulazuva.>>

<<Na̱ vumava̱sula̱ pe a̱tsuma̱ a̱ ɗu,

n tsu roco yi ta̱ aciya̱va̱ a̱tsuma̱ a alavu alavu,

n tsu yuwaan yi ta̱ adanshi a̱tsuma̱ a alavu.

7 Ne ɗa n tsu yuwan adanshi na aagbashi a̱ va̱ Musa shi,

n te inda yi na̱ a̱ɓula̱ o u'wa u va̱ suru.

8 N tsu yuwan ta̱ adanshi na̱ a̱yi esu esu,

a alanga eteshe, agba a̱tsuma̱ e irumbu shi.

A̱yi u tsee ene ta̱ oroci a̱ va̱.

Nye i zuwai yu uwwai wovon

u na yaa yuwan adanshi a avama a aci aagbashi a̱ va̱ Musa shi?>>

9 A̱vu A̱sulazuva a yuwan upan ne ele lon, a̱vu u ꞌyon u lyawa le. 10 Mantsa ma na oɓolo e eleshe'e a̱ 'yoyin zuva vo oogodoꞌo, reve mɓa̱la̱ mu ukutu n remeshi Maryamu, a̱vu ukwan wa̱ yi u u'ura̱na̱ tsa̱ tsikilu. Ana Haruna vadalai u ka̱lyuwa̱ niyi, a̱vu we ene ukutu u reme yi ta̱. 11 A̱vu Haruna damma Musa, <<Zagbain va̱, n te ipati ya̱ wu she vu ca tsu a̱tsuma̱lima̱ adama o unusu u tsulo tsa na tsu yuwain wan. 12 She vu lyawa yi wo o'wo tsa̱ mereɓu ma na a matsain nu upasu u lipu va̱ yi ushamu wan.>>

13 A̱vu Musa showen A̱sulazuva u damma, <<A̱sula̱, n te ipati ya̱ wu vu ka̱mba̱to yi gbaga!>>

14 Amma A̱sulazuva a damma ta̱ Musa, <<Na̱ shi aa damma dada va̱ yi tsuwa̱n yi ta̱ ma̱tsa̱n o urewesu, u shi a yuwan rana cindere a uwwusa wono shi? To vu uta̱a̱ yi diga pe o uva̱la̱ta̱ u yuwan rana cindere a alanga. Na a yuwan ne a ta gura ka̱mbuwa̱ yi pe.>> 15 A̱vu o uta̱a̱ Maryamu diga pe o uva̱la̱ta̱ hali rana cindere. Agba ama a̱ ꞌyon uba̱ta̱'a̱ shi, she na a̱ ka̱mbuwa̱ niyi.

16 Ana a yuwain ne a̱vu ama'a a̱ ꞌyon diga Hazero a̱vu a̱ va̱la̱ A̱tsumona a Faran.