1 A̱sulazuva a yuwan ta̱ adanshi na̱ Musa u damma, 2 <<Yuwan adanshi na aza a Isra'ila vu damma le, <Ni i uwa e iɗa i na maa ca ɗu wo o'wo ɗu uda̱na̱ta̱, 3 na̱ yaa ca A̱sulazuva kucci na aa yuwan na akina, kucci'i u to o'wo diga o oɓolo e inan ko e ikyon, ko e mgbele. Na̱ kucci vu ukula̱tosu ɗa, ko kucci vu ushitosun wa akucunu, ko za vu ucasu nu ucigu wo okolo, ko kucci va̱ a̱buki a na a zuwai, adama u ca A̱sulazuva ma̱guru mo uyo'o, 4 suru za na aa ca cu'un kucci ndolo a̱ tyo e ekere a̱ A̱sulazuva, u ta ca waru kucci vi ishina. Kucci vi ishina'a u to o'wo ukunzuwu u ta̱ a̱tsuma̱ a kupa u yira i lashi, za na o umbai na̱ meden ma̱ ta̱ ma mani'in ma̱ zetun. 5 Waru na̱ waa ca mokyokyon ma̱ ta̱ kucci vu ukula̱tosu u ɓolo yi na̱ meden ma̱ ta̱ ma̱ masayan ma̱ ina̱bi adama a̱ kucci vi ili yo oso.

6 << <Na̱ kucci'i za va̱ a̱a̱giri'i ɗa u ɓolo yi na̱ kucci vi ishina nu ukunzuwu ure a̱tsuma̱ a kupa u yira i lashi uja̱mba̱ru na̱ meden ma̱ ta̱ wu ukunzuwu uta'atsu u mani'in ma̱ zetun. 7 Waru adama a̱ kucci vi ili yo oso, u ca meden ma̱ ta̱ wu ukunzuwu uta'atsu ma masayan, ili i ma̱guru mo uyo'o e ekere a̱ A̱sulazuva.

8 << <Na̱ kucci vu ukula̱tosu'u za moggono ma nan ma ɗa ko kucci ro, adama o ushitosun wa akucunu, ko kucci vu nden m muwwulai a̱ tyo e ekere a̱ A̱sulazuva, 9 u to ɓolo moggono ma na'an na̱ makundatsu ma ta'atsu a̱tsuma̱ a kupa i yira i lashi uja̱mba̱ru nu uɓatsulai u meden ma mani'in. 10 Waru u ta ca akapi e meden a masayan kucci vi ili yo oso. U to o'wo kucci na a yuwain na akina, ili i ma̱guru mo uyo'o e ekere a̱ A̱sulazuva. 11 <<Ne tsunda tsa ɗa oo foɓo ogono a nan ko a̱giri'i, ko mugiri'i ko mugbgbele. 12 Ne ɗa vaa yuwan na̱ za ta̱ suru, cine vu foɓoi a̱bunda̱ e le suru.>>

13 << <Umatsun wi iɗa wa Isra'ila suru u ta̱ kuru wila̱ u nda mantsa ma na waa casu kucci na a cayi na akina, kucci ma̱guru ma̱ uyo'o e ekere a̱ A̱sulazuva. 14 Na̱ mocin na ri oɓolo na̱ a̱ɗu, ko za na ta̱wa̱i pe na̱ nden suru suru, u ciga u ca kucci na a tsu ca na akina, kucci ma̱guru e ekere a̱ A̱sulazuva, a̱yi fo u ta yuwan cine i yuwain tsoyi. 15 Ama e iɗa'a suru oɓolo no omocin a na a̱ ri pe nden e iɗa'a a̱ ta̱ da̱na̱ na̱ wila̱ u ta̱. A̱yi nda u to o'wo ɗu wila̱ babu ukotu nu umatsun we elime. A̱ɗu no omocin a na a̱ ri nden a̱tsuma̱ a̱ ɗu, i to o'wo una̱ta̱ e ekere a̱ A̱sulazuva. 16 Wila̱ ni ili i na a̱a̱ kuru i ta̱ i ɗa, nu umatsun wi iɗa ko mocin na ri nden a̱tsuma̱ a̱ ɗu.> >>

17 A̱vu A̱sulazuva a yuwan adanshi na̱ Musa u damma, 18 <<Vu yuwan adanshi na aza a Isra'ila vu damma le: <Ni i uwa e iɗa i na maa tara ɗu a̱ tyo, 19 mantsa ma na i gasai itana yu uɗuma̱ yi iɗa'a, i tawa ozo o ro kucci a̱ tyo e ekere a̱ A̱sulazuva. 20 I ta̱wa̱a̱ ne emeshen a na a yuwain na̱ yira i na i fara irai, i ta̱wa̱ na̱ a̱yi tsu ucasu diga o osoroto. 21 Diga gogo hali a limatan ve elime i ta ca A̱sulazuva kucci nda i yira yu ufaru yi itana ya̱ a̱ɗuma̱ a̱ ɗu.

22 << <Gogo gba na̱ wo o'wo babu ucigu i kuɗa̱ a̱ kuru wila̱ u na A̱sulazuva a cayi Musa, 23 ili i na A̱sulazuva a ca nɗu o una̱ wa Musa suru, diga urana u na A̱sulazuva a ca nle hali a̱ tyo limatan ve elime, 24 waru na a yuwan ili i nda babu ucigu, ama e iɗa'a a̱ ri nu urevu wa̱ yi shi, iɗa'a suru a ta ca kucci moggono ma nan kucci vu ukula̱tosu ili i ma̱guru mo uyo'o e ekere a̱ A̱sulazuva, oɓolo na̱ kucci vi ishina na̱ kucci vi ili yo oso cine a zuwai, na̱ ma̱ga̱ji adama a̱ kucci vu unusu. 25 Ganu ta ca kucci matara mo ume mo unusu adama a ama a Isra'ila suru. Waru a ta yuwaan le gafura. Adama a na nu ucigu u ɗa shi, a̱vu gba a̱ ta̱wa̱a̱ A̱sulazuva na̱ kucci vu ukula̱tosu vu unusu u na a yuwain na akina. 26 A ta yuwaan ama a Isra'ila no omocin a na a̱ ri pe na̱ nden a̱tsuma̱ e le gafura, adama a na ama'a suru a yuwan ta̱ unusu babu ucigu u le.

27 << <Na̱ vuma ta̱ ɗa goon yuwain unusu babu ucigu, u ta̱ ta̱wa̱a̱ na̱ megbgbele ma aa'wan a̱ ta̱ nu umatsun adama a̱ kucci vu unusu. 28 Ganu ta ca kucci matara mo ume mo unusu e ekere a̱ A̱sulazuva adama a vuma na yuwain unusu babu ucigu, reve gba na a yuwan kucci matara mo ume mo unusu adama a̱ yi a ta yuwaan yi gafura. 29 Wila̱ u ta̱ u ɗa a̱yi ɗaɗa waru goon adama a vuma na yuwain unusu babu ucigu, ko a̱yi umatsun wi iɗa za va Isra'ila u ɗa ko mocin na ri na̱ nden a̱tsuma̱ a̱ ɗu ɗa.

30 << <Amma za na suru yuwain unusu nu ucigu wa̱ yi, ko a̱yi umatsun wi iɗa u ɗa ko mocin ɗa, u yuwaan ta̱ A̱sulazuva unusu u gbain, a̱ ta̱ tawa yi a̱tsuma̱ a ama. 31 Adama a na u goro ta̱ adanshi a̱ A̱sulazuva, a̱vu u kuɗa wila̱ wa̱ yi, a̱ ta̱ gba a tawa yi, unusu wa̱ yi u ta̱ a aci a̱ yi.> >>

32 Mantsa ma na aza a Isra'ila a̱ da̱na̱i a̱tsumona, e reme ta̱ vuma ro o ɓolotosu ɗanga urana wa Ashibi. 33 Aza a na e reme niyi o ɓolotosu ɗanga'a, a tara yi ta̱ a̱ tyo ya Musa na̱ Haruna ni iɓolo ya ama suru. 34 A̱vu a̱ ɓa̱ru yi uba̱ta̱ u ro, adama a na koto ne'en e reve ili na aa yuwan na̱ a̱yi shi. 35 A̱vu A̱sulazuva a damma Musa, <<O una vuma'a, iɓolo ya ama'a suru a vuvara yi o ugyuru wu uva̱la̱ta̱.>> 36 A̱vu iɓolo ya ama'a suru o uta̱a̱ yi ɗe o ugyuru wu uva̱la̱ta̱, a̱vu a vuvara yi na atali hali u kuwa̱, cine A̱sulazuva a dammai Musa.

37 A̱vu A̱sulazuva a yuwan adanshi na̱ Musa u damma, 38 <<Yuwan adanshi na aza a Isra'ila vu damma le, hali a̱ tyo limatan ve elime i ta̱ zula̱ alagba e elentsu a amuna a̱ ɗu, a̱vu i zuwa a̱punda̱ a̱ mini ma̱ bulu e elentsu suru. 39 I yuwan alagba'a na ya̱a̱ da̱na̱ a̱ ka̱lyuwusa̱, ne ɗa ya̱a̱ da̱na̱ a cuwusan na̱ wila̱ wa̱ A̱sulazuva, adama i kuru le, adama i yuwan tsushakala ni ili i na maluwa mo okolo a̱ ɗu ne esu a̱ ɗu a cigai wan. 40 Ne ɗa ya̱a̱ da̱na̱ a̱ kurusu wila̱ u va̱ suru, a̱vu yo o'wo na akiza e ekere a̱ A̱sula̱ a̱ ɗu. 41 A̱mu ɗa A̱sulazuva A̱sula̱ a̱ ɗu, za na uta̱a̱ nɗu diga e iɗa ya Masar adama mo o'wo A̱sula̱ a̱ ɗu. A̱mu ɗa A̱sulazuva A̱sula̱ a̱ ɗu.>>