1 A̱sulazuva a yuwan ta̱ adanshi na̱ Musa u damma, 2 <<Yuwan adanshi na̱ Haruna vu damma yi, a mantsa ma na vaa zuwa ifitila i cindere'e, vu zuwa le cine aa ca ekan elime o uba̱ta̱ u wisawatan u fitila'a.>>

3 Reve Haruna yuwan ne, u zuwa ifitila'a cine aa ca ekan elime a wisawatan wi ifitila'a, cine A̱sulazuva a dammai Musa. 4 Apa nda cine a rumai wisawatan wi ifitila'a: a ruma yi ta̱ na̱ zinariya, diga e ikyun ya̱ yi a̱ tyo o mukkoto mo oroci a̱ yipa̱lu ya̱ yi. A yuwan yi ta̱ cine A̱sulazuva o rocoi Musa.

5 Reve A̱sulazuva a yuwan adanshi na̱ Musa u damma: 6 <<Vu tara nan Levi a̱tsuma̱ a ama a Isra'ila, reve vu ka̱mba̱to le cece. 7 Apa nda cine va̱a̱ ka̱mba̱to le cece: Vu kyo'onu le mini mo uka̱mba̱tosu cece. Reve vu zuwa le a puna lipu le suru nu utanu, reve waru a̱ za̱'wa̱ a̱tugu e le. Ne ɗa a̱a̱ ka̱mba̱to aciyele cece. 8 Reve a̱ ta̱wa̱a̱ na̱ moggono ma nan ma̱ ta̱ oɓolo na̱ kucci vi ishina va̱ yi vu yira i lashi uja̱mba̱ru na̱ mani'in, reve waru a̱ ta̱wa̱a̱ na̱ moggono me ire adama a̱ kucci vu unusu. 9 Reve vu ta̱wa̱ na̱ nan Levi e isawan elime o Oogodo o Uga'asusan. A̱vu vu ɓoloto ama a Isra'ila suru. 10 Na̱ vu ta̱wa̱ ne ele a̱ ma̱ka̱ka̱n ma̱ A̱sulazuva, reve ama a Isra'ila'a suru a̱ kuruwa̱ le ekere. 11 Reve Haruna ta̱wa̱ na̱ nan Levi a̱ ma̱ka̱ka̱n ma̱ A̱sulazuva tsa̱ kucci vu u'ya̱susa̱n na aza a Isra'ila a cayi, adama a̱ da̱na̱ ufoɓu u na a yuwaan A̱sulazuva a̱ga̱nda̱.

12 <<Reve nan Levi a̱ kuru ekere e le a aci e ina'an. A̱vu vu yuwan kucci vu unusu na̱ za ta̱, za ve ire waru gba kucci vu ukula̱tosu a̱ tyo e ekere a̱ A̱sulazuva, adama a̱ kucci matara mo ume mo unusu u nan Levi. 13 Reve vu zuwa nan Levi e isawan a̱ ma̱ka̱ka̱n ma Haruna no olobo a̱ yi, reve vu ca A̱sulazuva ele tsa̱ kucci vu u'ya̱susa̱n. 14 Ne ɗa vaa tawa nan Levi ko'o diga a akapi a ama a Isra'ila, reve nan Levi'i o o'wo a̱za̱ a̱ va̱.

15 <<A mantsa ma na vo o'wotoi nan Levi cece, reve vu ta̱wa̱ ne ele tsa̱ kucci vu u'ya̱susa̱n, reve a uwa pe a yuwan ulinga o Oogodo o Uga'asusan. 16 Adama a na a ca mu ta̱ ele suru suru diga a̱tsuma̱ a ama a Isra'ila. N tara le ta̱ o o'wo a̱za̱ a̱ va̱ o una̱ wu umatsun wu ufaru, mawun mo ufaru mo ulobo ma ka va Isra'ila suru. 17 Adama a na umatsun wu ufaru wa aza a Isra'ila suru za va̱ ɗa, ko vuma ko iliyamunga. A mantsa ma na mu unai umatsun wu ufaru wi iɗa ya Masar suru, n tawa le ta̱ adama a̱ va̱. 18 N tara ta̱ nan Levi o una̱ wu umatsun wu ufaru wu ulobo wa Isra'ila suru. 19 Waru n ca ta̱ Haruna no olobo a̱ yi nan Levi une'e adama a yuwan a̱ga̱nda̱ o Oogodo o Uga'asusan o una̱ wa aza a Isra'ila. Waru a yuwan kucci matara mo ume mo unusu adama e le tsa̱ra̱ mɓa̱la̱ n reme le wan, nna a rawa zuzu na̱ a̱a̱'isa̱.>>

20 Ne ɗa Musa na̱ Haruna na ama a Isra'ila suru a yuwain na̱ nan Levi cine A̱sulazuva a dammai Musa. 21 Reve nan Levi o o'woto aciyele cece, a̱vu a̱ za̱'wa̱ a̱tugu e le. Reve Haruna ta̱wa̱ ne ele tsa̱ kucci vu u'ya̱susa̱n a̱ ma̱ka̱ka̱n ma̱ A̱sulazuva, a̱vu u ca kucci matara mo ume mo unusu adama e le adama wo o'woto le cece. 22 Ana o kotoi, reve nan Levi a uwa o Oogodo Uga'asusan tsa̱ra̱ a yuwan ulinga u le za̱la̱ va Haruna no olobo a̱ yi, cine A̱sulazuva a dammai Musa adama a nan Levi, ne ɗa a yuwain.

23 A̱sulazuva a yuwan ta̱ adanshi na̱ Musa, u damma, 24 <<A̱yi nda u ta̱ a aci a nan Levi, vali na ri na a'wan ushin no ozo o ton ko u pasai, u ta̱ ta̱wa̱ u yuwan ulinga o Oogodo o Uga'asusan. 25 Amma na a rawa a'wan kupoton, e te ivuwan o ulinga u le, a buwa a yuwan ulinga shi. 26 A ta gura kamba a̱za̱ e le ulinga a̱tsuma̱ o Oogodo o Uga'asusan, amma ele na aciyele oo o'wo aci o ulingaꞌa shi. Ne tsunda tsa ɗa vaa ca nan Levi ulinga u le.>>