1 Reve A̱sulazuva a damma Haruna, <<A̱vu, no olobo a̱ wu nu ugundo wa dada va̱ wu i ta tara ume wu nusu na a yuwain na i burai A̱a̱'isa̱, reve a̱vu no olobo a̱ wu goon i tara ume wu nusu na a yuwain na i burai ulinga u tsuganu. 2 Vu ta̱wa̱ na̱ a̱za̱ a̱ wu nan Levi, diga o ugundo wu nkaya ma̱ wu, o ɓolo ekere na̱ a̱vu, a kamba wu a mantsa ma na a̱vu no olobo a̱ wu yaa yuwusan ulinga o Oogodo o Uga'asusan. 3 A ta kamba wu, waru a ta yuwan ulinga wo Oogodoꞌo suru, amma she a rawa zuzu ni itana ya̱ a̱a̱'isa̱ ko i masa'a. Ko gba shi a̱vu ne ele i kuwa̱. 4 O to ɓolo ekere na̱ a̱vu reve waru a yuwusan ulinga wo Oogodo o Uga'asusa'an. Agba she za vu ugundo ro rawa zuzu na̱ a̱ɗu wan.

5 <<A̱ɗu ɗa ya̱a̱ da̱na̱ a yuwusan a̱ga̱nda̱ a̱ a̱a̱'isa̱, adama upan u da̱shi cipa̱ a aci a aza a Isra'ila wan. 6 A̱mu na aciya̱va̱ a ɗa n ɗangulai a̱za̱ a̱ ɗu nan Levi diga a̱tsuma̱ a aza a Isra'ila, uneꞌe e ekere a̱ ɗu, a ca ta̱ A̱sulazuva ele adama a yuwan ulinga o Oogodo o Uga'asusan. 7 Amma a̱vu no olobo a̱ wu a ɗa goon yaa yuwan ulinga u tsuganu wi ili i na i burai masa'a na̱ a̱tsuma̱ o umuna wu una̱ntsu. N ca ɗu ta̱ ulinga u tsuganu uneꞌe. Vuma ro ko'o na suru rawai zuzu na̱ a̱a̱'isa̱ a̱ to una yi.>>

8 Reve A̱sulazuva a damma Haruna, <<A̱mu na aciya̱va̱, n ca wu ta̱ ulinga wu uka̱lyuwusa̱ wu ucasu u na a̱ ta̱wa̱a̱ numu, ucasu wa akiza u na aza a Isra'ila a ca numu suru n ca wu ta̱ no olobo a̱ wu wo o'wo za ɗu na akunda a̱ ɗu suru suru. 9 A̱tsuma̱ o ucasu wa akiza a na a buwai a̱tsuma̱ a̱ kucci na a ca numu na akina, ele nda o to o'wo za ɗu, ko na̱ kucci vi ishina ɗa, ko kucci makuɗa ma̱ wila̱ ko kucci vu unusu ɗa. Ele ndolo o to o'wo akunda a̱ wu no olobo a̱ wu. 10 Uba̱ta̱ wa akiza u ɗa yaa tama yi. Mawun ma vali suru ma ta tama yi. Ili ya akiza i ɗa uba̱ta̱ wa̱ wu.>>

11 <<A̱yi nda waru za va̱ wu ɗa: upasu u na a cayi adama o ucasu u na aza a Isra'ila a casu mu kucci vu u'ya̱susa̱n, n ca ɗu ta̱ wo o'wo akunda a̱ ɗu suru suru, a̱vu no olobo a̱ wu ne esheli a̱ wu. Vuma na suru ri cece o u'wa wa̱ wu u ta gura tama yi.

12 <<Waru n ta casu ɗu ili i na i la'ai ulobonu aza a na aza a Isra'ila a ca numu, za mani'in ma̱ zetun, na̱ masayan ma̱ ina̱bi ma sa'avu, na̱ za vi ishina i na a cayi A̱sulazuva kucci winu wu ufaru. 13 Suru kucci winu wu ufaru wi itana yu una yi iɗa i le aza a na a̱a̱ ta̱wusa̱a̱ A̱sulazuva o to o'wo a̱za̱ a̱ wu. A̱tsuma̱ o u'wa wa̱ wu, suru za na ri cece u ta gura tama.>>

14 <<Ili i na suru a tawaa numu a̱tsuma̱ a Isra'ila za va̱ wu ɗa. 15 Umatsun wu ufaru wa̱ a̱a̱tsuma̱ suru za vuma na̱ za vi iliyamunga, za na a cayi A̱sulazuva za va̱ wu ɗa. Amma vu ta tsupaa mawun mo ufaru mo ulobo ma vuma na̱ mawun mo ufaru me iliyamunga ma na ma̱ ri cece shi. 16 Vu ta tsupaa le mantsa ma na a rawai woto u ta̱. Ikebe ya atsupu'u u to o'wo azurufa ton, una̱ta̱ na̱ makundatsu ma azurufa ma̱ a̱a̱'isa̱.>>

17 <<Amma mawun mo ufaru ma nan ko kyon ko megbele, vaa tsupaa le shi, a̱ ta̱ na akiza. Vu kyo'onu mpasa n le a masa'a, a̱vu waru vu kula̱to mani'in me le ucasu u na a yuwain na akina ma̱guru mo uyo'o e ekere a̱ A̱sulazuva. 18 Amma inama i le i to o'wo za va̱ wu, cine ma̱ka̱ka̱n na agutsu o ucasu wu u'ya̱susa̱n a̱ ri a̱za̱ a̱ wu. 19 Ili i na suru a tawai diga a̱tsuma̱ o ucasu wa akiza aza a na aza a Isra'ila a̱ ta̱wa̱yi A̱sulazuva, n ca wu ta̱ a̱vu no olobo a̱ wu ne esheli a̱ wu wo o'wo akunda a̱ ɗu hali hali. Akucunu a na a̱ ri n kuɗa ɗa shi a̱ ma̱ka̱ka̱n ma̱ A̱sulazuva e ekere a̱ wu na̱ limatan va̱ wu.>>

20 A̱vu A̱sulazuva a damma Haruna, <<Va̱a̱ tsura̱ agadu e iɗa i le shi, waru va̱a̱ tsura̱ akunda o ro a̱tsuma̱ e le shi. A̱mu ɗa akunda a̱ wu na agadu a̱ wu a̱tsuma̱ a aza a Isra'ila.

21 <<N ca ta̱ nan Levi za ta̱ a̱tsuma̱ a kupa suru va Isra'ila wo o'wo agadu e le, o una̱ wu ulinga wa̱ a̱ga̱nda̱ u na aa yuwusan ele o Oogodo o Uga'asusan. 22 Diga gogo a̱ tyo ɗe elime, she aza a Isra'ila a rawa zuzu no Oogodo o Uga'asusan wan, na̱ ne ɗa shi a ta tara ume wu unusu u le waru a̱ ta̱ kuwa̱. 23 Amma nan Levi a ɗa goon aa yuwan ulinga o Oogodoꞌo. A ta tara ume wu nusu na a yuwain i na i bura niyi. A̱yi nda a̱yi ɗa ili i na oo toni babu ukotu e ekere a limatan ve elime. A̱a̱ tsura̱ agadu a̱tsuma̱ a aza a Isra'ila shi. 24 O una̱ u ndolo, n ca ta̱ nan Levi za ta̱ a̱tsuma̱ a kupa u na aza a Isra'ila a̱ ta̱wa̱yi A̱sulazuva wo o'wo agadu e le. A̱yi ɗa i zuwai n yuwain adanshi adama e le, <A̱a̱ tsura̱ agadu a̱tsuma̱ a aza a Isra'ila shi.> >>

25 A̱sulazuva a yuwan ta̱ adanshi na̱ Musa u damma, 26 <<Yuwan adanshi na̱ nan Levi vu damma le: <Mantsa ma na i ushiyi za ta̱ a̱tsuma̱ a kupa e ekere a aza a Isra'ila, za na n ca nɗu agadu, ni i ciga i 'yuwan i ta̱wa̱a̱ na̱ za ta̱ a̱tsuma̱ a kupa ndolo kucci va̱ A̱sulazuva. 27 A ta tara ucasu u ɗu tsi ishina diga o osoroto ko masayan diga uba̱ta̱ u mokpoko. 28 Ne tsunda tsa ɗa waru ya̱a̱ ta̱wa̱a̱ A̱sulazuva nu ucasu diga a̱tsuma̱ a za ta̱ na i ushiyi e ekere a aza a Isra'ila. Diga a̱tsuma̱ a za ta̱ a̱tsuma̱ a kupa nda i ta ca Haruna ganu akunda a̱ A̱sulazuva. 29 Ni i ciga i 'yuwan i ta̱wa̱a̱ na akunda a̱ A̱sulazuva ili i na i la'ai ulobonu na akiza a̱tsuma̱ e ili i na a ca nɗu suru.>

30 <<Vu damma nan Levi, <A mantsa ma na yaa ca upasu u na u la'ai ulobonu, a ta tara ucasu u ɗu tsi ishina diga o osoroto ko masayan diga uba̱ta̱ u mokpoko. 31 A̱ɗu na̱ 'wa ɗu suru i ta gura lyuwa akapi a na a buwai ko te ɗa, adama a na atsupu e melen ma̱ ɗu ma ɗa mo ulinga a̱tsuma̱ o Oogodo o Uga'asusan. 32 Ni i ta̱wa̱a̱ nu upasu u na u la'ai ulobonu a̱tsuma̱ a̱ yi ya̱a̱ da̱na̱ nu unusu a̱tsuma̱ e ili i nda shi, ni i yuwan ne ya̱a̱ lungusa̱ ucasu wa akiza wa aza a Isra'ila shi, waru ya̱a̱ kuwa̱ shi.> >>