1 A̱sulazuva a yuwan ta̱ adanshi na̱ Musa na̱ Haruna u damma, 2 <<A̱yi nda a̱yi ɗa ure u wila̱ u na A̱sulazuva a zuwai: Damma aza a Isra'ila a̱ ta̱wa̱a̱ ɗu na̱ manan ma̱ shili za na ri usa̱du ko u ri na aalana shi, waru koto a̱ kuruwa̱ yi a̱a̱gba̱la̱ e iluma shi. 3 A ca Eliyaza ganu a̱yi, a̱vu o uta̱a̱ yi a̱ca̱pa̱ o uva̱la̱ta̱, a̱vu a paɗa yi a̱ ma̱ka̱ka̱n ma̱ yi. 4 Eliyaza ganu ta daɓa mpasa ma̱ yi na aakatsu a̱ yi a̱vu wu kyo'onu yi toto ucindere a̱ tyo elime o Oogodo o Uga'asusan. 5 A̱vu a̱ kula̱to manan ma̱ shili'i a̱yi a̱ a̱ka̱nla̱, a̱ kula̱to ukwan wa̱ yi ni inama ya̱ yi na̱ mpasa ma̱ yi na̱ a̱ya̱n a̱ yi. 6 Ganu ta tara ɗanga sida no osondori na̱ a̱punda̱ a̱ shili, reve u vari le a̱tsuma̱ a manan ma̱kula̱ꞌa̱. 7 Na a yuwan ne, a̱vu ganu zuza̱'wa̱ a̱tugu a̱ yi a̱vu waru u sumba̱ na̱ mini. Reve u ta̱wa̱ o uva̱la̱ta̱, agba u ta̱ da̱na̱ idaba hali she ulivu. 8 Vuma na kula̱to niyi'i fo u ta̱ za̱'wa̱ a̱tugu a̱ yi a̱vu u sumba̱ na̱ mini, a̱vu a̱yi fo u ta̱ da̱na̱ idaba hali she ulivu.>>

9 <<Vuma na ri cece u ta̱ pura̱ okomo a na'an, a̱vu u tsun yi uba̱ta̱ u na u ri cece ɗe a̱ca̱pa̱ o uva̱la̱ta̱. Aza a Isra'ila a ta zuwa okomo'o adama a yuwan ulinga na̱ a̱yi a̱ mini ma̱ wuza̱'u, za vu uka̱mba̱tosu cece ɗa diga o unusu. 10 Vuma na pura̱i okomo a mana'an, a̱yi fo nu u ciga u 'yuwan wu za̱'wa̱ a̱tugu a̱ yi, a̱yi fo u ta̱ da̱na̱ idaba hali she ulivu. A̱yi nda a̱yi ɗa ili i na a aza a Isra'ila no omocin a na a̱ ri nden a̱tsuma̱ e le a̱ ri n yuwusan babu ukotu.

11 <<Suru za na ju'wa̱in vuma na kuwa̱i, u ta̱ da̱na̱ idaba hali rana cindere. 12 U ta̱ ka̱mba̱to aciya̱yi cece na̱ mini'i o urana wa ta'atsu no o urana we cindere, reve wo o'wo cece. Agba nu u ka̱mba̱to aciya̱yi cece o urana wa ta'atsu no o urana we cindere shi, woo o'wo cece shi. 13 Za na suru ju'wa̱in a̱a̱kwa̱kwa̱ a vuma a̱vu u kuɗa̱ a̱ ka̱mba̱to aciya̱yi cece u lungusa̱ ta̱ Oogodo o Uga'asusan A̱sulazuva. Na a ciga a 'yuwan a tawa vuma ndolo a̱tsuma̱ a Isra'ila. Adama a na o kyo'onuwo yi mini ma̱ wuza̱'u shi, u ti idaba, waru idaba ya̱ yi i ta̱ da̱na̱ oɓolo na̱ a̱yi.>>

14 <<Apa nda wila̱ u na a̱a̱ kuru na̱ vuma kuwa̱ a̱tsuma̱ o Oogodo: Za na suru uwai a̱tsuma̱ o Oogodoꞌo na̱ za na ri pe suru o to o'wo idaba hali rana cindere. 15 Waru upondo u na u ri ni ikpa̱ta̱tsu ukpa̱towu shi a̱yi fo u to o'wo idaba.

16 <<Za na suru ri a alanga na u ju'wa̱in vuma na o unai na̱ matsun me pe'eni ko vuma na yuwain ukwa̱ wa̱ A̱sula̱, ko za na ju'wa̱in eetele a vuma ko ason, u to o'wo idaba hali rana cindere.>> 17 <<Adama a̱ ka̱mbuwa̱ za na ri idaba cece, e kene okomo pe a̱tsuma̱ o okomo o uka̱mba̱tosu cece a̱ tsun e meden, a̱vu a̱ tsun pe mini ma sa'ani. 18 Reve vuma na ri cece u tara osondori, a̱vu u tsupu yi a̱ mini'i reve wu kyo'onu oogodoꞌo ni itana i na i ri pe suru na ama a na a̱ ri pe. Reve fo wu kyo'onu za na suru ju'wa̱in eetele a vuma ko ason ko vuma na o unai ko za na kuwa̱i ukwa̱ wa̱ A̱sula̱. 19 Vuma na ri cece u to kyo'onu vuma na ri cece shi o urana wa ta'atsu no o urana we cindere. Reve o urana we cindere u ka̱mba̱to yi cece. Vuma na a̱ ka̱mba̱toi cece'e u ta̱ za̱'wa̱ a̱tugu a̱ yi a̱vu u sumba̱ na̱ mini, u ta̱ gba a̱ ka̱mba̱ cece o ulivu u ndolo. 20 Agba na̱ vuma na ri idaba u kuɗa̱ a̱ ka̱mba̱to aciya̱yi cece, a ta tawa yi a̱tsuma̱ a ama, adama a na u lungusa̱ ta̱ a̱a̱'isa̱ a̱ A̱sulazuva. O kyo'onuwo yi mini mo uka̱mba̱tosu cece shi, waru u ta̱ idaba.>> 21 A̱yi nda a̱yi ɗa wila̱ u na ya̱a̱ da̱na̱ a̱ kurusu babu ukotu. <<Vuma na o kyo'onusu mini mo uka̱mbuwusa̱ cece u ta̱ fo a̱ za̱'wa̱ a̱tugu a̱ yi. Waru za na ju'wa̱in mini mo uka̱mba̱tosu cece u to o'wo idaba hali she ulivu. 22 Ili i na za na ri idaba suru ju'wa̱in u to o'wo idaba, za na suru waru ju'wa̱n niyi u to o'wo idaba hali she ulivu.>>