1 A̱sulazuva a yuwan ta̱ adanshi na̱ Musa, u damma, 2 <<Vu tsupaa aza a Isra'ila e ekere a aza a Midiya. Na̱ a̱yi ndolo koto, vu ta̱ kuwa̱ reve vu cina nkaya ma̱ wu.>>

3 Reve Musa damma ama, <<I foɓo ama o ro a̱tsuma̱ a̱ ɗu a yuwan uvon na aza a Midiya adama a tsupaa A̱sulazuva. 4 A̱vu i lyungu ama ukpakukupa (1,000) uba̱ta̱ o uvon diga o ugundo suru wa Isra'ila.>> 5 A̱vu a ɗangula ama ukpakukupa kupa nu ukpakukupa ure (12,000). O to foɓo ama ukpakukupa (1,000) diga o ugundo wa aza a Isra'ila suru. 6 Musa lyungu le ta̱ uba̱ta̱ o uvon, ukpakukupa o ugundo suru, oɓolo na̱ Finiha ganu ulobo wa Eliyaza, za na tarai itana ya akiza diga a̱ A̱a̱'isa̱ oɓolo na avana adama e iroci yu uvon.

7 A̱vu a yuwan uvon na aza a Midiya cine A̱sulazuva a dammai Musa, a̱vu o una vali suru. 8 A̱tsuma̱ a aza a na o unai ele ɗa Ivi na̱ Rekem na̱ Zur na̱ Hur na̱ Reba ngono n ton ma Midiya. Waru o una ta̱ Balam ulobo wa̱ Beyo na̱ matsun me pe'eni. 9 A̱vu aza a Isra'ila e reme a̱ma̱ci na̱ muwun ma aza a Midiya, a̱vu a̱ pura̱ oɓolo e inan na̱ mgbele ni itana, ili i na a̱ pura̱i uba̱ta̱ o uvon. 10 A̱vu a̱ kula̱to ilyuci i na aza a Midiya a̱ ri nden suru oɓolo na̱ va̱la̱ta̱ le, 11 A̱ pura̱ ta̱ ili yu uvon suru ni ili i na a̱ tsura̱i o uvon suru, oɓolo na ama ni iliyamunga. 12 A̱vu a̱ ta̱wa̱a̱ na aza a na e remei ni ili i na a̱ pura̱i yu uvon ni ili i na a̱ tsura̱i o uvon uba̱ta̱ wa Musa, na̱ Eliyaza ganu, nu uba̱ta̱ wi iɓolo ya aza a Isra'ila, o uva̱la̱ta̱ wa agalaci wa̱ Mowa zuzu na̱ Urudu a̱ nka̱la̱la̱i na̱ Jeriko.

13 A̱vu Musa na̱ Eliyaza ganu, na azagbain a ama suru o uta̱ a ga'an ne ele a alanga o uva̱la̱ta̱. 14 Musa gba yuwan ta̱ upan lon na azagbain a̱ a̱soja, na̱ nan yali vu ukpakukupa kupa, na̱ nan yali vu ukpaku ukpaku, aza a na a̱ ka̱mba̱i diga uba̱ta̱ o uvon.

15 A̱vu we ece le u damma, <<Nye i zuwai i lyawai a̱ma̱ci'i wuma?>> 16 <<Cuwain, ele ɗa aza a na a̱ kuruyi a̱sa̱la̱ a Balam, waru ele ɗa a zuwai aza a Isra'ila a vadalayi A̱sulazuva ucina̱ e ili na i farai a Peyo, ɗaɗa gba mɓa̱la̱ n fabai ama a̱ A̱sulazuva. 17 Gogo she yu una mawun ma vali suru. Reve yu una ka na suru revei vali. 18 Amma esheli a na suru koto e revei ali shi i lyawa le wuma adama a aciya̱ɗu.

19 <<A̱tsuma̱ a̱ ɗu suru za na unai vuma ko u ju'wa̱in a̱kwa̱kwa̱ u ta̱ da̱nu ɗe a̱ca̱pa̱ o uva̱la̱ta̱ hali rana cindere. O urana wa ta'atsu na̱ we cindere ni i ciga i 'yuwan i ka̱mba̱to aciya̱ɗu na aza a na i remei cece. 20 I ka̱mba̱to a̱tugu a̱ ɗu cece oɓolo ni itana i na a yuwain na̱ kwan suru, ni itana ye eleme yi mgbele na̱ ya akpata.>>

21 Eliyaza ganu gba u damma ta̱ a̱soja a na a̱ 'ya̱wa̱i uba̱ta̱ o uvon, <<Apa nda ili i na a̱a̱ kuru adama a̱ wila̱ u na A̱sulazuva a cayi Musa: 22 Zinariya na̱ azurufa na̱ rumushili na̱ rumu na̱ kuza na̱ daluma, 23 ni ili i na suru akina a̱ tsu kula̱to shi ele ɗa yaa lapula pe a̱tsuma̱ a akina, reve o o'wo cece. Suru na̱ ne a̱ ta̱ ka̱mba̱to le cece a̱tsuma̱ a̱ mini mo uka̱mba̱tosu cece. Amma ili i na akina a̱ tsu kula̱to suru, a̱ ka̱mba̱to le cece a̱tsuma̱ a̱ mini'i. 24 I ta̱ za̱'wa̱ a̱tugu a̱ ɗu o urana we cindere adama yo o'wo cece. Na̱ a̱yi ndolo koto a̱vu i ka̱mba̱ o uva̱la̱ta̱.>>

25 A̱sulazuva a damma ta̱ Musa, 26 <<Na̱ a̱vu na̱ Eliyaza ganu, na̱ azagbain a 'wa, i te kece ama ni iliyamunga i na e remei suru. 27 I ne'eshen itana i na a usai uba̱ta̱ o uvon ba̱ta̱ re, i ca a̱soja a na a̱ 'ya̱wa̱i uba̱ta̱ o uvon akunda a̱ ta̱, akunda a̱ ta̱ gba i ca akapi a ama. 28 Diga pe a̱tsuma̱ a akunda a̱ a̱soja a na a̱ 'ya̱wa̱i uba̱ta̱ o uvon, i fara tawaa A̱sulazuva akunda e ili i na a̱ pura̱i uba̱ta̱ wu uvon. Za ta̱ diga a̱tsuma̱ o ukpakuton (500) biti, ko za va ama, ko za vi inan, ko za vu nloli, ko za vi ikyon, ko za vu mgbele. 29 Vu tara uɓatsulai wa akunda wa̱ a̱soja a nda, a̱vu vu ca Eliyaza ganu, wo o'wo ucasu wa̱ A̱sulazuva. 30 Diga a̱tsuma̱ a akunda e itana i na yo o'woi za va aza a Isra'ila, i tara pe za ta̱ diga a̱tsuma̱ a kupoton, ko za va ama, ko za vi inan, ko za vu nloli, ko za vi ikyon, ko za vu mgbele ko va akapi e iliyamunga i na i buwai. Vu ca nan Levi ele aza a na a̱a̱ ka̱lyuwusa̱ Oogodo a Uga'asusan.>> 31 A̱vu Musa na̱ Eliyaza ganu a yuwan cine A̱sulazuva a zuwai Musa yuwan.

32 Nda a̱bunda̱ e itana i na a̱soja a usai o uvon: ikyon ukpakukupa ukpakuta̱li nu ukpakukupa kupocindere nu ukpakukupa uton (675,000), 33 inan ukpakukupa kupocindere nu ukpakukupa ure (72,000), 34 nloli ukpakukupa kupota̱li nu ukpakukupa (61,000), 35 esheli a na koto e revei ali shi ukpakukupa mata'atsu nu ukpakukupa ure (32,000),

36 Akunda a na a cayi aza a na a̱ 'ya̱wa̱i uvon ele ɗa: ikyon ukpakukupa ukpaku uta'atsu nu ukpakukupa mata'atsu nu ukpakukupa ucindere, nu ukpakuton (337,500). 37 Diga a̱tsuma̱ e le a ɗa a tarai akunda a̱ A̱sulazuva ikyon ukpakuta̱li na̱ kupocindere no ozo o ton (675). 38 Inan waru ukpakukupa mata'atsu nu ukpakukupa uta̱li (36,000). Diga a̱tsuma̱ e le a ɗa a tarai akunda a̱ A̱sulazuva inan kupocindere ne ejere. 39 Nloli waru ukpakukupa mata'atsu nu ukpakuton (30,500). Diga a̱tsuma̱ e le a ɗa a tarai akunda a̱ A̱sulazuva kupota̱li na̱ za ta̱. 40 Esheli a na koto e revei ali shi ele ɗa ukpakukupa kupa nu ukpakukupa uta̱li (16,000), a̱tsuma̱ e le a ɗa a tarai akunda a̱ A̱sulazuva mata'atsu ne ejere.

41 A̱vu Musa ca Eliyaza ganu akunda a na a̱ ri va̱ A̱sulazuva, cine A̱sulazuva a dammai Musa.

42 Diga a̱tsuma̱ a akunda a aza a Isra'ila, aza a na Musa tawai diga a̱tsuma̱ a ama a na a̱ 'ya̱wa̱i uvon, 43 akunda a ama'a a̱yi ɗa ikyon ukpakukupa ukpaku uta'atsu nu ukpakukupa mata'atsu nu ukpakukupa ucindere nu ukpakuton (337,500). 44 Inan waru ukpakukupa ukpaku mata'atsu nu ukpakukupa uta̱li (36,000), 45 nloli waru ukpakukupa ukpaku mata'atsu nu ukpakuton (30,500). 46 Esheli waru ukpakukupa kupa nu ukpakukupa uta̱li (16,000). 47 Diga a̱tsuma̱ a akunda a ama a Isra'ila, Musa tara ta̱ za ta̱ a̱tsuma̱ a kupoton va ama ni iliyamunga cine A̱sulazuva a damma niyi, a̱vu u ca nan Levi aza a na a̱ ka̱lyuwusa̱ Oogodo Uga'asusan.

48 A̱vu azagbain a na a̱ shi aci o oɓolo oɓolo a̱ a̱soja, na̱ nan yali vu ukpakukupa kupa na̱ a̱za̱ o ukpaku ukpaku a̱ ta̱wa̱ ya Musa, 49 a̱vu a damma yi, <<A̱tsu agbashi a̱ wu tsu kece ta̱ a̱soja a na a̱ ri za̱la̱ tsu agba ko vuma ta̱ puwa̱n shi. 50 A̱yi ɗa nda tsu ta̱wa̱yi A̱sulazuva kucci itana i zinariya i na vuma suru a̱tsuma̱ a̱ tsu u tsura̱i, mpa̱ta̱ta̱ na̱ nshingi na̱ nkawani mu urotsu ni iliyatsuvu ni iliyinlu, adama tsu yuwan kucci matara mo ume mo unusu adama a aciya̱tsu a̱ ma̱ka̱ka̱n ma̱ A̱sulazuva.>>

51 Musa na̱ Eliyaza ganu a̱ ushi ta̱ zinariya diga e ekere e le ni itana zinariya na a̱ zuɗa̱i suru. 52 Zinariya nan yali vu ukpakukupa kupa na̱ nan yali vu ukpaku ukpaku na Musa na̱ Eliyaza a cayi A̱sulazuva une'e ume wa̱ yi u ɗa shekel ukpakukupa kupa nu ukpakukupa uta̱li nu ukpakucindere na̱ kupoton (16,750). 53 Soja biti u pura̱ ta̱ akunda e itana i na a̱ pura̱i uba̱ta̱ wu uvon adama a aciya̱yi. 54 Musa na̱ Eliyaza ganu a̱ ushi ta̱ zinariya e ekere a nan yali vu ukpakukupa kupa na̱ nan yali vu ukpaku ukpaku, a̱vu a̱ ta̱wa̱ ne ele a̱tsuma̱ o Oogodo o Uga'asusan adama o ucuwusan wa aza a Isra'ila a̱ ma̱ka̱ka̱n ma̱ A̱sulazuva.