1 A̱vu A̱sulazuva a damma Musa ɗe a agalaci a̱ Mowa asana na̱ Urudu a̱ nka̱la̱la̱i na̱ Jeriko u damma, 2 <<Damma aza a Isra'ila a ca nan Levi ilyuci i na a̱a̱ da̱nu a̱tsuma̱ a agadu a na aza a Isra'ila a̱a̱ tsura̱. Waru a ca le uba̱ta̱ wa alyuna uka̱nda̱ruwu ni ilyuci'i. 3 Adama a̱ tsura̱ ilyuci i na a̱a̱ da̱nu, ni iɗa ya alyuna adama e inan i le na akapi e iliyamunga i na a̱ ri ne ele suru. 4 Washin wu uba̱ta̱ wa alyuna u na u ri uka̱nda̱ruwu ni ilyuci i na yaa ca nan Levi, u ta rawa udasuwu ukpakukupa nu ukpakuton (1,500) uka̱nda̱ruwu nu uɓaɓu u lyuci'i. 5 A̱ca̱pa̱ a̱ lyuci'i i rito udasuwu ukpakukupa uta'atsu (3,000) upasu wa asana, udasuwu ukpakukupa uta'atsu (3,000) upasu wu uyagi, nu udasuwu ukpakukupa uta'atsu (3,000) upasu wa̱ a̱livu, waru udasuwu ukpakukupa uta'atsu (3,000) upasu wu ugana, lyuci'i u da̱na̱ e memere. Uba̱ta̱ u nda u to o'wo le uba̱ta̱ wa alyuna adama e ilyuci'i.>>

6 <<A̱tsuma̱ e ilyuci i na yaa ca nan Levi a̱za̱ a̱ ta̱li o to o'wo ilyuci i mapa'an, uba̱ta̱ u na za na unai vuma a suma a̱ tyo. Babu na̱ ne a̱ ta̱ da̱shi ca le ilyuci i gbagbain amunga ne ejere. 7 Suru suru i ta ca nan Levi ilyuci amunga na̱ kunla̱, oɓolo nu uba̱ta̱ wa alyuna u le. 8 Ilyuci i na yaa ca nan Levi diga a̱tsuma̱ e iɗa i na aza a Isra'ila a̱ tsura̱i a ta ca o una̱ wa agadu wu ugundo biti. I tara ilyuci ya̱ a̱bunda̱ diga o ugundo u na u ri ne ele a̱bunda̱, amma i tara meketeci a̱tsuma̱ a aza a na a̱ ri na̱ a̱yi wa'a.>>

9 A̱vu A̱sulazuva a damma Musa: 10 Yuwan adanshi na ama a Isra'ila vu damma le, <<Mantsa ma na i pasai Urudu a̱ tyo e iɗa ya Ka'ana, 11 i ɗangulaa aciya̱ɗu ilyuci i na yoo o'wo ɗu upa'atan uba̱ta̱ u na za na unai vuma nu ucigu wa̱ yi shi waa suma a̱ tyo. 12 Ilyuci'i i to o'wo ɗu upa'atan diga e ekere a za na aa zama u tsupa, adama ta̱wa̱ o una za na a zuwusa wu unai vuma'a kafu wi isawan a̱ ma̱ka̱ka̱n ma ama na aa yuwaan yi uge'etosu wan. 13 I ɗangula ilyuci i ta̱li i na yoo o'wo ɗu upa'atan. 14 I ca ilyuci i ta'atsu yu upa'atan e eɓele a̱ Urudu aza a ta'atsu waru e eɓele a Ka'ana. 15 Ilyuci i ta̱li i nda o to o'wo upa'atan wa aza a Isra'ila, no omocin na akapi a ama a na a̱ ri nden oɓolo ne ele, adama za na suru unai za ro nu ucigu shi u ta gura suma a̱ 'ya̱wa̱ ɗe.>> 16 << <Amma na̱ vuma ga̱la̱ za ro na̱ rumu hali u kuwa̱, wo o'wo ta̱ za mona. A̱ to una fo za mona'a. 17 Ko na̱ za ro vara nanza na aatali hali u kuwa̱, wo o'wo ta̱ za mona. A̱ to una fo za mona'a. 18 Ko na̱ za faba nanza na aaɗanga hali u kuwa̱, wo o'wo ta̱ za mona. A̱ to una fo za mona'a. 19 Imaci i zuzu yi za na o unai na waa ciga u tsupaa mpasa mu za va̱ yi, u to una za mona'a nu u cina yi. 20 Ne ɗa na̱ nanza adama a n'yuwunlai u vawan a̱vu u sapa nanza, ko u vara nanza hali u kuwa̱, 21 ko a̱tsuma̱ a̱ i'ima̱ u lapa nanza na̱ lyukuku hali u kuwa̱, a̱ to una vuma ndolo, a̱yi za mona ma ɗa. Za na cigai u tsupaa mpasa mu za va̱ yi u to una za mona'a nu u cina yi.

22 << <Amma na̱ za ro una vuma a̱tsuma̱ e i'ima̱ shi, ko u keɓe yi nu ucira shi, ko na̱ mavara nu ucigu shi, 23 ko we ene yi shi, a̱vu u vara yi na aatali a na oo una yi a̱vu gba u kuwa̱, to, a na u ri ma'yuwatan ma̱ yi shi, waru u ri na̱ majiyan ma na waa amaton yi shi, 24 iɓolo ya ama i ta yuwaan le uge'etosu na̱ a̱yi za na unai vuma na̱ za na cigai u tsupaa mpasa mu za va̱ yi. A ta yuwaan le uge'etosu'u na̱ wila̱ u na a zuwai u nda. 25 Iɓolo ya ama i te geshe za na unai vuma'a, diga e ekere a za na cigai u tsupaa mpasa mu za va̱ yi'i. A̱ ta̱ ka̱mbuwa̱ za na unai vuma'a a̱ lyuci mapa'an ma na u sumai a̱ tyo. U ta̱ da̱nu pe hali she mantsa ma na ganu gbain na a̱ tsuwa̱yin mani'in ma akiza kuwa̱i.

26 << <Agba na̱ mantsa mo ro za na unai vuma'a wu uta̱ o utyo u lyuci mapa'an na u sumai a̱ tyo, 27 reve za na cigai u tsupaa mpasa mu za va̱ yi cina yi a alanga a̱ lyuci'i, za na cigai u tsupaa mpasa mu za va̱ yi'i u ta gura una yi, agba wa̱a̱ da̱na̱ nu unusu shi. 28 Adama a na za na unai vuma'a nu u ciga u 'yuwan wi isawan pe a̱ lyuci'i hali she na̱ ganu gbain kuwa̱. Na̱ ganu gbai'in kuwa̱ u ta gura ka̱mba̱ e iɗa ya̱ yi.

29 << <Ili i na a zuwai nda u ta̱ da̱na̱ a aci a̱ ɗu diga a mantsa hali a tyo mantsa, uba̱ta̱ u na i da̱nuyi suru.

30 << <Za na unai vuma suru a̱ to una yi na ama o ro o roco e ene yi ta̱, a̱ to una yi o una̱ wu urevu u na aza a na a̱ shi lo a dammai. Amma she o una nanza o una̱ wa adanshi a vuma ta̱ wan.

31 << <She i ushi ikebe adama a atsupu a wuma wu za mona wan, za na ntsayi u kuwa̱, na a ciga a 'yuwan o una yi. 32 Ne ɗa waru she i ushi ikebe adama a wawa za na sumai a̱ tyo a̱ lyuci mapa'an wan, ta̱wa̱ u ta̱wa̱ u ka̱mba̱ u da̱nu e iɗa ya̱ yi kafu ganu gbain kuwa̱ wan. 33 She i ka̱mbuwa̱ iɗa i na i ri nden idaba wan. Adama a na wocosu wu mpasa u tsu ka̱mba̱to ta̱ iɗa idaba, agba kucci matara mo ume mo unusu lo na aa yuwan adama e iɗa i na o ocoi mpasa'a shi, she na̱ mpasa mu za na ocoi mpasa'a. 34 She yo o'woto iɗa i na i ri na̱ nden idaba wan. Adama a na a̱mu A̱sulazuva n ta̱ nden e memere ma ama a Isra'ila.> >>