1 A̱sulazuva a yuwan ta̱ adanshi na̱ Musa A̱tsumona a Sinai, o woto wu ufaru a aa'wan e ire ana o uta̱i e iɗa ya Masar, u damma, 2 <<Zuwa aza a Isra'ila a yuwan A̱buki a Mapasa a mantsa ma na a zuwa niyi. 3 O urana wa kupa na̱ a̱za̱ a̱ na̱shi u woto u nda nu ulivu, i ta yuwan a̱buki'i a mantsa ma na a zuwai. I yuwan yi o ure u na a zuwai na̱ wila̱ wa̱ yi.>>

4 Ɗaɗa Musa dammai aza a Isra'ila a yuwan A̱buki a Mapasa'a. 5 Reve a yuwan ne a̱ A̱tsumona a Sinai nu ulivu o urana wa kupa na̱ a̱za̱ a̱ na̱shi o woto wu ufaru. Cine A̱sulazuva a zuwai Musa ne ɗa aza a Isra'ila a yuwain.

6 Agba ozo o ro e le a yuwan A̱buki a Mapasa o urana u ndolo'o shi adama a na a̱ shi ta̱ idaba na a̱ ju'wa̱in a̱kwa̱kwa̱. Ɗaɗa a̱ ta̱wa̱i ya Musa na̱ Haruna o urana u ndolo'o. 7 Reve a damma yi, <<Tsu ta̱ idaba adama a na tsu ju'wa̱in a̱a̱kwa̱kwa̱, agba adama a̱ nye a 'yasan tsu a̱ ta̱wa̱a̱ na̱ kucci va̱ A̱sulazuva oɓolo na akapi a aza a Isra'ila a mantsa ma na a zuwai?>>

8 Reve Musa usu le, <<Piriyi she na̱ mu uwwa ili i na A̱sulazuva aa damma adama a̱ ɗu.>>

9 Reve A̱sulazuva a yuwan adanshi na̱ Musa u damma, 10 <<Damma aza a Isra'ila, no ozo o ro a̱ ɗu ko ozo o ro a̱tsuma̱ o umatsun u ɗu o o'wo idaba adama a na a̱ ju'wa̱in a̱a̱kwa̱kwa̱, ko a̱ 'ya̱wa̱i mmalu, a ta gura yuwan A̱buki a Mapasa a̱ tyo e ekere a̱ A̱sulazuva. 11 A ta yuwan a̱buki'i o urana wa kupa na̱ a̱za̱ a̱ na̱shi o woto we ire nu ulivu. A ta tama nama va̱ a̱buki'i oɓolo no opopofu a na a̱ ri na̱ wolilo shi na̱ a̱vu'un o okono. 12 She a lyawa akapi a asa wan ko a kuɗa eetele a̱ yi wan. Mantsa ma na aa yuwan A̱buki a Mapasa na ciga a 'yuwan a̱ kuru wila̱ꞌa̱ suru. 13 Amma na̱ vuma na ri cece agba u 'ya̱wa̱ mmalu shi, u kuɗa̱ a yuwan A̱buki a Mapasa, a ta tawa vuma ndolo diga a̱tsuma̱ a ama a̱ yi adama a na u ta̱wa̱a̱ na̱ kucci va̱ A̱sulazuva a mantsa ma na wu ntsayi shi. Vuma ndolo ta tara ume wu unusu wa̱ yi.

14 <<Mocin na ri na̱ nden a̱tsuma̱ a̱ ɗu za na cigai u yuwan A̱buki a Mapasa a̱tyo e ekere a̱ A̱sulazuva, u ta yuwan yi o ure u na a zuwai na̱ wila̱ wa̱ yi. Vu ta ca mocin nu umatsun u lyuci suru wila̱ u ta̱.>>

15 Urana u na a̱ shuwa̱i Oogodo o Uga'asusan, reve eleshe a pala yi. Diga ulivu hali she usana eleshe a na a palai oogodoꞌo u rotso ta̱ akina. 16 Ne ɗa u da̱na̱i kuci, eleshe'e a tsu pala yi ta̱ nu urana, reve na ayin u rotso akina. 17 A mantsa ma na suru eleshe'e a̱ 'yoyin diga o oogodoꞌo, reve aza a Isra'ila fo a̱ 'yon. Reve uba̱ta̱ u na eleshe'e a̱ va̱la̱i suru, lo ɗa aza a Isra'ila a̱a̱ va̱la̱. 18 Nu udammu wa̱ A̱sulazuva, reve aza a Isra'ila a̱ 'yon, waru nu udammu wa̱ yi reve a̱ va̱la̱. Nne eleshe'e a̱ ri zuva vo oogodoꞌo a̱ tsu da̱na̱ ta̱ o uva̱la̱ta̱'a̱. 19 Ko na̱ shi eleshe'e a jima zuva vo oogodoꞌo, aza a Isra'ila a tsu yuwan ta̱ tsutoni na adanshi a̱ A̱sulazuva, a̱ tsu 'yon shi. 20 Mantsa mo ro eleshe'e a̱ tsu da̱na̱ ta̱ zuva vo oogodoꞌo rana meketeci, reve o udammu wa̱ A̱sulazuva a̱ da̱na̱ pe uva̱lu. Reve waru o udammu wa̱ A̱sulazuva a̱ 'yon. 21 Mantsa mo ro eleshe'e e te isawan ta̱ zuva vo oogodoꞌo diga ulivu a̱ tyo usana, reve nu u 'yon nu usana, a̱vu ele fo a̱ 'yon. Ko nu urana u ɗa ko na ayin, a mantsa ma na eleshe'e a̱ 'yoyin biti reve ele fo a̱ 'yon. 22 Ko ne eleshe'e e isawan ta̱ zuva vo oogodoꞌo ayin e re ko woto ko aa'wan, aza a Isra'ila a̱ tsu da̱na̱ ta̱ o uva̱la̱ta̱ a̱a̱ 'yon shi. Amma nu u 'yon reve a̱ 'yon. 23 Nu udammu wa̱ A̱sulazuva u ɗa a̱ tsu va̱la̱, reve waru a̱ 'yon nu udammu wa̱ yi. A̱ kuru ta̱ ili i na A̱sulazuva a zuwai e ili i na u dammai e ekere a Musa.