1 Ana mɓa̱la̱ n ndolo n kotoi, a̱vu A̱sulazuva a damma Musa na̱ Eliyaza ulobo wa Haruna ganu, 2 <<I kece aza a Isra'ila suru gundo gundo aza a na a'wan e le a rawai ushin a gawan, aza na a rawai a̱ 'ya̱wa̱ uvon.>> 3 A̱vu Musa na̱ Eliyaza ganu a yuwaan aza a Isra'ila adanshi a agalaci a̱ Mowa zuzu na̱ Urudu a̱ nka̱la̱la̱i na̱ Jeriko, a̱vu a damma, 4 <<I kece ama a na a̱ ri na a'wan ushin a gawan, cine A̱sulazuva a dammai Musa.>> Ele nda ele ɗa aza a Isra'ila a na o uta̱i a̱tsuma̱ a Masar: 5 Ugundo wa̱ Roben, mawun mo ufaru ma Isra'ila, olobo a̱ yi ele ɗa Hanok na̱ Palu, 6 na̱ Hezeron na̱ Karmi. 7 Ele nda ele ɗa gundo va̱ Roben, a̱bunda̱ a aza a na e kecei e le ɗa ukpakukupa amunga nu ukpakukupa uta'atsu nu ukpaku ucindere na mata'atsu (43,730).

8 Eliyabu ɗa ulobo wa Palu, 9 olobo a Eliyabu ele ɗa Nemu, na̱ Datan oɓolo na̱ Abiram. Datan oɓolo na̱ Abiram ele ɗa aza a na ama a ɗangwai aza a na a̱ 'ya̱sa̱yin Musa na Haruna aci waru a̱ ta̱ pe a̱tsuma̱ aza a na o toniyi Kora ana a̱ 'ya̱sa̱yin A̱sulazuva aci. 10 A̱vu iɗa i kpa̱tu'wa̱ reve u soɗu le oɓolo na̱ Kora, za na otoni a̱ yi a̱ kuwa̱i mantsa ma na akina a̱ kula̱toi ama ukpakure na̱ kupoton (250). Reve o o'wo ili i na yoo rono ama atsuvu.

11 Agba muwun ma̱ Kora n kuwa̱ suru shi. 12 Ugundo wa Saminu olobo o umatsun u le ele ɗa:

Nemuwe na̱ Yamin na̱ Yakin,

13 na̱ Zera na̱ Shawulu.

14 Ele nda ele ɗa umatsun wu gundo va Saminu: a̱bunda̱ a aza a na e kecei ele ɗa ama ukpakukupa ushin nu ukpakukupa ure nu ukpakure (22,200).

15 Umatsun wa Gadu na̱ gundo le ele ɗa:

Zepo na̱ Hagi na̱ Shuni

16 na̱ Ozini na̱ Eri,

17 na̱ Arodi na̱ Areli.

18 Ele nda ele ɗa gundo va Gadu, aza a na e kecei ele ɗa ama, ukpakukupa amunga nu ukpakuton (40,500).

19 Er na̱ Onan ele ɗa olobo a Yahuza, amma gba a̱ kuwa̱ ta̱ a̱tsuma̱ a Ka'ana.

20 Apa akapi o umatsun wa Yahuza na̱ gundo le:

Shela na̱ Pere na̱ Zera,

21 na̱ Hezeron na̱ Hamu.

22 Ele nda ele ɗa gundo va Yahuza. A̱bunda̱ a aza a na e kecei ele a ɗa ama ukpakukupa kupocindere nu ukpakukupa uta̱li nu ukpakuton (76,500).

23 Apa umatsun wa Isaka na̱ gundo le:

Tola na̱ Puwa,

24 na̱ Jashu na̱ Shimiron.

25 Ele nda ele ɗa gundo va Isaka, a̱bunda̱ a aza a na e kecei ele ɗa ama ukpakukupa kupota̱li nu ukpakukupa una̱shi nu ukpakuta'atsu (64,300).

26 Apa umatsun wa Zebulun na̱ gundo le:

Sere na̱ Elon na̱ Yaleye.

27 Ele nda ele ɗa gundo va Zebulun, a̱bunda̱ a aza a na e kecei ele ɗa ama ukpakukupa kupota̱li nu ukpakuton (60,500).

28 Apa umatsun wa̱ Isuhu na̱ gundo le, Manase na̱ Ifiramu:

29 Apa umatsun wa Manase: Manase ɗa dada va Maki. Maki ɗa dada va Giliyadu,

za na o'woi ugundo wa Giliyadu.

30 Apa umatsun wa Giliyadu:

olobo ele ɗa Abiyeza

na̱ Helek,

31 na̱ Asiriyel

na̱ Shekem,

32 na̱ Shemida na̱ Hefa.

33 Zelofeha ulobo wa Hefa u da̱na̱ no olobo shi, esheli a ɗa a̱ da̱na̱ niyi goon, apa ala e le, Mala na̱ Nowa na̱ Hogula na̱ Milika oɓolo na̱ Tiriza.

34 Ele nda ele ɗa gundo va Manase, a̱bunda̱ a aza a na e kecei ele a ɗa ama ukpakukupa kupoton nu ukpakukupa ure nu ukpakucindere (52,700.)

35 Apa umatsun wa Ifiramu na̱ gundo le:

Shutela na̱ Beke na̱ Taha.

36 Ugundo wa Eran wu uta̱ ta̱ o umatsun wa Shutela.

37 Ele nda ele ɗa gundo va Ifiramu, a̱bunda̱ a aza a na e kecei e le a ɗa ama ukpakukupa mata'atsu nu ukpakukupa ure nu ukpakuton (32,500.)

Ele ɗa umatsun wa̱ Isuhu na̱ gundo le.

38 Apa umatsun wa Banyami na̱ gundo le:

Bela na̱ Ashibe na̱ Ahiram

39 na̱ Shufam, na̱ Hupaham.

40 Ugundo wa Bela wu uta̱ ta̱ o umatsun wa Ardu na̱ Na'ama.

41 Ele nda ele ɗa gundo va Banyami, a̱bunda̱ a aza a na e kecei ele a ɗa ama, ukpakukupa amunga nu ukpakukupa uton nu ukpakuta̱li (45,600.)

42 Apa umatsun wa Dan na̱ gundo le, Shuham.

A̱yi nda a̱yi imaci yu ugundo wa Dan.

43 A̱bunda̱ a aza a na e kecei o ugundo wa Shuham suru ele ɗa ama, ukpakukupa kupota̱li nu ukpakukupa una̱shi nu ukpakuna̱shi (64,400.)

44 Umatsun wa Asha na̱ gundo le ele ɗa:

Imna na̱ Ishivi na̱ Beriya.

45 Waru umatsun wa Beriya ele ɗa: Heba na̱ Malikiye.

46 Asha da̱na̱ ta̱ na̱ mawun mo usheli ma na ma̱ ri na aala Sera.

47 Ele nda ele ɗa gundo va Asha, a̱bunda̱ a aza a na e kecei ele a ɗa ama, ukpakukupa kupoton nu ukpakukupa uta'atsu nu ukpakuna̱shi (53,400.)

48 Apa umatsun wa Nafutali na̱ gundo le, Yazeye na̱ Guni,

49 na̱ Yeza na̱ Shilem.

50 Ele nda ele ɗa gundo va Nafutali, a̱bunda̱ a aza a na e kecei ele a ɗa ama, ukpakukupa amunga nu ukpakukupa uton nu ukpakuna̱shi (45,400.)

51 A̱yi nda a̱yi ɗa a̱bunda̱ a ali a Isra'ila aza a na e kecei ele ɗa ama, ukpakukupa ukpakuta̱li nu ukpakukupa ukpaku nu ukpakucindere na̱ mata'atsu (601,730.)

52 Reve A̱sulazuva a damma Musa, 53 <<E ne'eshen iɗa'a yo o'wo le ili ya agadu cine a̱bunda̱ a ala e le a̱ ri. 54 Ugundo u na u ri a̱bunda̱ lon vu ca le agadu a̱ a̱bunda̱, ugundo u na waru u ri a̱bunda̱ shi a ca yi wa'a. Ugundo suru u ta̱ ushi agadu a̱ yi o una̱ wa aza a na e kecei. 55 I reve i ne'eshen ta̱ iɗa'a na̱ mazuwa ma agita. Ili i na ugundo suru u tarai a̱yi ɗa o una̱ wa aala e elentsu a̱ yi. 56 Agadu suru e te ne'eshen yi na̱ mazuwa ma agita e ekere o ugundo wa̱ a̱bunda̱ na aza a na a̱ ri a̱bunda̱ shi.>>

57 Apa nan Levi aza a na e kecei na̱ gundo le:

Gashon na̱ Koha na̱ na̱ Merari.

58 Apa waru gundo nan Levi o umatsun wa Libini:

Heburon na̱ Mali,

Mushi na̱ Kora.

Koha ɗa dada va Amuram. 59 Amuram zuwa ta̱ Jocebe o umatsun wa̱ Levi, za na a matsayin Levi a̱tsuma̱ a Masar. U matsaan ta̱ Amuram Haruna na̱ Musa na̱ mawun ma̱ a̱na̱wun mo usheli me le Maryamu.

60 Haruna ɗa matsain Nada oɓolo na̱ Abihu, na̱ Eliyaza na̱ Itama. 61 Agba Nada na̱ Abihu a̱ kuwa̱ ta̱ ana a cayi kucci na akina a na a ntsayi shi a̱ ma̱ka̱ka̱n ma̱ A̱sulazuva. 62 Nan Levi ali a na e kecei, aza a na a rawai woto ko ula'awu suru a rawa ta̱ ama ukpakukupa ushin nu ukpakukupa uta'atsu (23,000.) E kece le oɓolo na akapi a aza a Isra'ila shi adama a na a ca le agadu oɓolo ne ele shi.

63 Ele ɗa aza a na Musa na̱ Eliyaza nan ganu e kecei a mantsa ma na e kecei aza a Isra'ila a agalaci a̱ Mowa zuzu nu Uɗolu wa̱ Urudu a̱ nka̱la̱la̱i na̱ Jeriko. 64 Amma a̱tsuma̱ a aza a na e kecei, babu za na shi buwai a̱tsuma̱ e mekece mo ufaru ma na Musa na̱ Haruna ganu a yuwain a mantsa ma na a̱ da̱na̱i A̱tsumona a Sinai. 65 Adama a na A̱sulazuva a damma ta̱ ɗe aza a Isra'ila suru, <<E reve, a̱ ta̱ kuwa̱ a̱tsumona.>> A̱tsuma̱ e le babu za na la'ai she Keleb ulobo wa̱ Jefune na̱ Josuwa ulobo wa̱ Nun.