1 <<O urana wu ufaru o woto we cindere i yuwan iɓolo ya akiza, agba she i yuwan ulinga u na i tsu yuwusan wan. Urana u wivulu wa avana u ɗa. 2 I ca kucci vu ukula̱tosu u moggono ma nan ma̱ ta̱, oɓolo na̱ a̱a̱giri'i a̱ ta̱, na̱ mugiri'i n cindere aza a na a̱ ri na a'wan a̱ ta̱ ta̱, ili i ma̱guru mo uyo'o e ekere a̱ A̱sulazuva, suru nle a̱ da̱na̱ usa̱du wan. 3 Oɓolo na̱ moggono ma na'an i ca kucci vi ishina nkundatsu n ta'atsu n efa a̱tsuma̱ a kupa i yira i lashi i na a̱ ja̱mba̱ra̱i na̱ mani'in, oɓolo na̱ a̱a̱giri'i i ca nkundatsu n re a̱tsuma̱ a kupa. 4 Oɓolo na̱ ma̱giri'i suru i ca makundatsu ma̱ ta̱ a̱tsuma̱ a kupa. 5 I ta ca ma̱ga̱ji ma̱ ta̱ adama a̱ kucci vu unusu, adama a yuwan kucci matara mo ume mo unusu ma̱ ɗu. 6 Ele nda uda̱shiyi u ɗa a̱tsuma̱ a̱ kucci vu woto na̱ kucci vu ukula̱tosu vu usana suru na̱ kucci vi ishina i le, na̱ kucci vi ili yo oso cine a zuwai. Kucci na a yuwain na akina a ɗa ili ma̱guru mo uyo'o e ekere a̱ A̱sulazuva.

7 <<O urana wa kupa o woto we cindere i yuwan iɓolo ya akiza. I ciga i 'yuwan i tara akuli agba yaa yuwan ulinga shi. 8 I ta ca A̱sulazuva kucci vu ukula̱tosu ili i ma̱guru mo uyo'o, moggono ma̱ nan ma̱ ta̱, na̱ a̱a̱giri'i a̱ ta̱, na̱ mugiri'i n cindere aza a na a̱ ri na aa'wan a̱ ta̱ ta̱. Ele nda suru a̱ da̱na̱ usa̱du wan. 9 Oɓolo na̱ moggono ma na'an i ca kucci vi ishina nkundatsu n ta'atsu n efa a̱tsuma̱ a kupa i yira i lashi i na a̱ ja̱mba̱ra̱i na̱ mani'in. Oɓolo na̱ a̱a̱giri'i waru i ca nkundatsu n re a̱tsuma̱ a kupa. 10 Oɓolo na̱ ma̱giri'i ma̱ ta̱ a̱tsuma̱ a̱za̱ e cindere suru i ca makundatsu ma̱ ta̱ a̱tsuma̱ a kupa. 11 Waru i ca ma̱ga̱ji ma̱ ta̱ adama a̱ kucci vu unusu, babu na̱ kucci matara mo ume mo unusu na̱ kucci vu ukula̱tosu u na a tsu yuwusan urana suru, oɓolo na̱ kucci vi ishina va̱ yi, na̱ kucci vi ili yo oso le.

12 <<O urana wa kupa no ozo o ton o woto we cindere, i yuwan iɓolo ya akiza, amma she i yuwan ulinga wu urana suru wan. I yuwan a̱buki a̱ tyo uba̱ta̱ wa̱ A̱sulazuva hali rana cindere. 13 I ta ca kucci vu ukula̱tosu, kucci na a yuwain na akina, ili i ma̱guru mo uyo'o a̱ tyo e ekere a̱ A̱sulazuva. I ca kucci vu ukula̱tosu vu muggono mi inan kupa na aza a ta'atsu, na̱ a̱giri'i e re na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱. Ele nda suru a̱ da̱na̱ usa̱du wan. 14 Oɓolo na̱ moggono ma̱ ta̱ suru va kupa na aza a ta'atsu'u i ca kucci vi ishina nkundatsu n ta'atsu n efa i yira i lashi i na a̱ ja̱mba̱ra̱i na̱ mani'in. Oɓolo na̱ a̱a̱giri'i a̱ ta̱ suru ve ejere'e i ca nkundatsu n re a̱tsuma̱ a kupa. 15 Oɓolo na̱ ma̱giri'i suru va kupa na̱ a̱za̱ a̱ na̱shi'i i ca makundatsu ma̱ ta̱ a̱tsuma̱ a kupa. 16 I ɓolo na̱ ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru na̱ kucci vi ishina oɓolo na̱ kucci vi ili yo oso.

17 <<O urana we ire wa̱ a̱buki'i i foɓo muggono mi inan kupa ne ejere, na̱ a̱giri'i e re oɓolo na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱, suru nle aza a na a̱ ri usa̱du shi. 18 Kucci suru vu muggono mi inan, na̱ a̱giri'i oɓolo na̱ mugiri'i, i yuwan le na̱ kucci vi ishina oɓolo na̱ kucci vi ili yo oso o una̱ wa̱ a̱bunda̱ e ili i na a zuwai. 19 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru oɓolo na̱ kucci vi ishina na̱ kucci vi ili yo oso i le.

20 <<O urana wa ta'atsu wa̱ a̱buki'i i ca muggono mi inan kupa na̱ za ta̱, na̱ a̱giri'i e re, na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱, waru a̱ da̱na̱ usa̱du wan. 21 Oɓolo na̱ muggono mi inan, na̱ a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 22 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

23 <<O urana wa̱ na̱shi wa̱ a̱buki'i, i ta ca muggono mi inan kupa, oɓolo na̱ a̱giri'i e re, na̱ mugiri'i kupa na̱ a̱za̱ a̱ na̱shi aza a na a̱ ri a'wan a̱ ta̱ ta̱ aza a na a̱ ri usa̱du shi. 24 Oɓolo na̱ muggono mi ina'an, na̱ a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 25 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

26 <<O urana wa tawun wa̱ a̱buki'i, i ta ca muggono mi inan kucci, na̱ a̱giri'i e re na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱ waru a̱ da̱na̱ usa̱du wan. 27 Oɓolo no ogono e inan, na̱ a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 28 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

29 <<O urana wa̱ ta̱li wa̱ a̱buki'i, i ta ca muggono mi inan kunla̱ na̱ a̱giri'i e re, na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱, waru a̱ da̱na̱ usa̱du wan. 30 Oɓolo na̱ muggono mi ina'an, na̱ a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 31 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

32 <<O urana we cindere wa̱ a̱buki'i, i ta ca muggono mi inan n cindere na̱ a̱giri'i e re, na̱ mugiri'i kupa na̱ a̱za̱ a̱ na̱shi aza a na a̱ ri na a'wan a̱ ta̱ ta̱, waru a̱ da̱na̱ usa̱du wan. 33 Oɓolo na̱ muggono mi ina'an, na̱ a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 34 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

35 <<O urana wa̱ kunla̱ i ɓoloto, amma she i yuwan ulinga u na i tsu yuwusan kuci wan. 36 I ta ca kucci na a yuwain na akina ili i ma̱guru mo uyo'o a̱ tyo e ekere a̱ A̱sulazuva, kucci vu ukula̱tosu vu moggono ma nan, na̱ a̱a̱giri'i a̱ ta̱, na̱ mugiri'i n cindere aza a na a̱ ri na a'wan a̱ ta̱ ta̱ waru aza a na a̱ ri usa̱du shi. 37 Oɓolo na̱ moggono ma na'an, na̱ a̱a̱giri'i na̱ mugiri'i, i ca kucci vi ishina le na̱ kucci vi ili yo oso o una̱ wa̱ a̱bunda̱ e ili i na a zuwai. 38 I ca ma̱ga̱ji ma̱ ta̱ adama a̱ kucci vu unusu, babu na̱ kucci vu ukula̱tosu vu urana suru, oɓolo na̱ kucci vi ishina va̱ yi na̱ kucci vi ili yo oso.

39 <<Ele nda ele ɗa kucci na yaa ca A̱sulazuva a mantsa ma na yaa yuwusan a̱buki a na a zuwai, babu na̱ kucci ɗu na yaa yuwan adama i shiton akucunu a̱ ɗu, nu une'e u na yaa yuwan na asuvu o uyo'o adama a̱ kucci vu ukula̱tosu, na̱ kucci vi ishina, na̱ kucci vi ili yo oso, na̱ kucci muwwulai.>>

40 Musa damma ta̱ aza a Isra'ila ili i na A̱sulazuva a damma niyi suru.