1 A̱vu Musa damma azagbain o gundo va Isra'ila, apa ili i na A̱sulazuva a dammai, 2 <<Na̱ vali yuwan akucunu na̱ A̱sulazuva ko u yuwan nzuwulai, ko u damma u ta yuwan ili i ro, she u bula̱ a yuwan ili i na u dammai u ta yuwan wan, u ciga u 'yuwan u shiton ili i na u dammai nu una̱ wa̱ yi.

3 <<Na̱ usheli ma na ma buwai o u'wa wa dada va̱ yi ma yuwan akucunu a̱ tyo a̱ A̱sulazuva ko u zuwa aciya̱yi u ta yuwan ili i ro, 4 na̱ dada va̱ yi gba uwwa ili i na u dammai ko akucunu a na u yuwain agba u damma yi ili i ro shi, akucunu a na u yuwain suru na̱ nzuwulai n na u yuwain suru e isawan ta̱. 5 Amma na̱ dada va̱ yi uwwa a̱vu u putsa yi a na wu uwwa niyi, ko akucunu a na u yuwain ko nzuwulai n na u yuwain ee isawan shi, A̱sulazuva a̱ ta̱ ba̱ɗa̱ yi adama a na dada va̱ yi putsa niyi.

6 <<Nu u yuwan lolo a̱yi na akucunu ko cina u yuwan adanshi nu una̱ wa̱ yi babu majiyan za na wu nla̱i aciya̱yi, 7 na̱ vali va̱ yi uwwa adama e le agba u damma ili i ro shi, to, akucunu na̱ nzuwulai n ndolo a na u tarayi aciya̱yi e isawan ta̱. 8 Amma na̱ vali va̱ yi putsa yi a mantsa ma na wu uwwai, o una ta̱ akucunu na̱ nzuwulai n ndolo n na u yuwayin aciya̱yi babu majiyan, A̱sulazuva a̱ ta̱ ba̱ɗa̱ yi.

9 <<Akucunu a na ma̱runa̱ ko za na kakasai lolo yuwain suru, a̱ ta̱ lo yi.

10 <<Na̱ ka na ri na̱ lolo yuwan akucunu ko wu nla̱ aciya̱yi na̱ nzuwulai ma akucunu, 11 na̱ vali va̱ yi uwwa a ɗa a akucunu'u agba u damma ili i ro shi waru u putsa yi shi, to, akucunu na̱ nzuwulai n na u yuwain suru a̱ ta̱ lo yi. 12 Amma na̱ vali va̱ yi una le a mantsa ma na wu uwwai, to, ko akucunu ko nzuwulai n ta̱ mee isawan shi. Vali va̱ yi putsa ta̱ ɗe, A̱sulazuva a̱ ta̱ ba̱ɗa̱ yi. 13 Vali va̱ yi ta̱ nu ucira u zuwa wo o'wo amayun, ko waru wu una akucunu ko nzuwulai n na wu nla̱yi aciya̱yi. 14 Amma na̱ vali va̱ yi damma ili i ro shi suru suru, to, u usu ta̱ akucunu a̱ yi suru ko nzuwulai n na wu nla̱yi aciya̱yi. U usu le ta̱ a na u dammai ili shi ana wu uwwa nle. 15 Amma na̱ wu uwwa yi, a̱vu na̱ a̱ca̱pa̱ wu una le, to, vali'i a̱yi ɗa waa tara ume wu unusu wu ka'a.>>

16 Ele nda ele ɗa ili i na a̱a̱ kuru i na A̱sulazuva a dammai Musa adama a akucunu a na a̱ ri a vali na̱ ka va̱ yi, na akucunu a na a̱ ri ya dada na̱ mawun mo usheli ma na ma buwai nden o u'wa wa̱ yi.