1 <<A mantsa ma na ve enei nan ko kyon vu za va̱ wu puwa̱yin she vu tawa esu a̱ wu wan, amma vu reve vu guɓa yi ta̱ a̱ ka̱mba̱ uba̱ta̱ wu za vi ili. 2 Agba na̱ za vi ili'i u ri na̱ nden zuzu na̱ a̱vu shi ko gba vu reve yi shi, vu tara yi a̱ tyo o u'wa wa̱ wu a̱vu vu ɓana yi a cina mantsa ma na waa zami yi. A̱vu vu ca yi. 3 Vu yuwan ne a mantsa ma na ve enei mololi ko a̱tugu a za va̱ wu ko ili i na i puwa̱n niyi, she vu tawa esu wan.

4 <<A mantsa ma na ve enei mololi ko nan vu za va̱ wu riya̱i o ure, she vu tawa esu a̱ wu wan. Vu kamba vu 'ya̱sa̱n yi.

5 <<She ka vo oto itana ya ali wan, ko vali oto itana ya̱ a̱ma̱ci wan, adama a na A̱sulazuva A̱sula̱ a̱ ɗu e te inda idaba yi za na aa yuwusan ne.

6 <<A mantsa ma na ve enei yikinda i manunu a̱ nge'en mu ure, ko zuva vu uɗanga ko e iɗa, agba mma le tu uva̱pu a̱ muwun ma̱ yi ko e ipiri yo okowo a̱ yi, she vu pura̱ mma na̱ muwu'un wan. 7 Vu ta gura tara muwun, amma a̱vu vu lyawa mma le u ka̱ra̱, adama vu tsura̱ asuvu nden waru vu jima.

8 <<A mantsa ma na vu suwai u'wa u sa'avu, vu suwaa yi ugeshete adama vu ta̱wa̱ nu unusu u wocosu wu mpasa o u'wa wa̱ wu na̱ vuma ro riya̱ diga o ukwa̱'a̱ wa̱ wu wan.

9 <<She vu cu'wa̱n icu'un yi icu'un i re a̱tsuma̱ o uɗuma̱ wa̱ ina̱bi wa̱ wu wan, na̱ vu yuwan ne, icu'un i na vu cu'wa̱in goon ɗa va̱a̱ lungusa̱ shi amma hali oɓolo na̱ muwun mu uɗuma̱ u ina̱bi fo a̱ ta̱ la̱nga̱.

10 <<She vu ɓolo nan na̱ mololi iluma wan.

11 <<She vo oto a̱tugu na a ɗavai na̱ ulu uja̱mba̱ru no okoro wan.

12 <<I yuwaan a̱tugu a na yoo otosu alagba a̱ na̱shi a̱ nge'en n na̱shi.

13 <<A mantsa ma na vali zuwai ka a̱vu u von na̱ a̱yi, agba u ciga yi waru shi, 14 a̱vu u da̱na̱ a yuwusan adanshi e epen a aci a̱ yi, a̱vu u lungusa̱ ala a̱ yi, a dansa, <N zuwa ta̱ ka nda, a mantsa ma na n voyin na̱ a̱yi, agba n tsura̱ ta̱ iroci i na u revei ɗe vali.> 15 A̱vu dada na̱ mma vu usheli'i a̱ ta̱wa̱ ni iroci i na yoo roco a na koto u shi u revei vali shi uba̱ta̱ wu mbara o una̱ntsutsu u lyuci. 16 A̱vu dada vu usheli'i u damma mbara'a, <N ca ta̱ vuma nda usheli u va̱ lolo, agba u 'yuwan yi ta̱.> 17 Agba gogo u lyungusa̱ yi ta̱ ala, u damma, <N cina usheli u ɗu a na koto u revei vali shi.> Amma n ta̱ ni iroci i na moo roco usheli u va̱ koto u reve vali shi. Adama o ndolo a̱vu nan dada vu usheli'i a̱ ba̱ruwa̱ umuna wi iroci'i elime a mbara n lyuci'i. 18 A̱vu mbara'a n tara vuma'a a faba yi. 19 A̱vu a lyuwa yi ugana u tsupa ukunzuwu u azurufa ukpaku (100) u ca nan dada vu usheli'i, adama a na vuma nda ca ta̱ za va Isra'ila za na koto revei vali shi ala a vama. Agba u ta buwa ka va̱ yi, waa kasa na̱ a̱yi shi, hali ukwisa̱ wa̱ yi.

20 <<Amma na adanshi o ndolo amayun a ɗa, waru e ene iroci i na usheli'i u kuɗa̱i e reve vali shi, 21 a̱vu a tara yi o uta̱ o una̱ntsu wu u'wa wa dada va̱ yi, a̱vu ama a̱ lyuci le a vara yi na atali hali o una yi. Adama a na u yuwan ta̱ ili i wono a̱tsuma̱ a Isra'ila a na wo o'woi ashakala a̱yi ubuwu a̱tsuma̱ o u'wa wa dada va̱ yi. Ne ɗa yaa tawa iwuya a̱tsuma̱ a̱ ɗu.

22 <<Ne e reme vali ro a yuwusan tsipere na̱ ka vu za ro, vali'i na̱ ka ndolo suru a̱ ta̱ o una le. Ne ɗa yaa tawa iwuya a̱tsuma̱ a Isra'ila.

23 <<Na̱ a̱tsuma̱ a̱ lyuci vali cina usheli u na koto u revei vali shi, agba u ta̱ ne egeɓe a na woo lo a̱vu u von na̱ a̱yi, 24 a̱vu i tara le ra a̱ tyo o una̱ntsutsu u lyuci u ndolo adama a vara le na atali hali a̱ kuwa̱ adama a na usheli'i u da̱na̱ ta̱ pe a̱tsuma̱ a̱ lyuci agba u saala adama a wawa yi shi, waru adama a na vuma ndolo lungusa̱ ta̱ egeɓe a nanza. Ne ɗa yaa tawa iwuya a̱tsuma̱ a Isra'ila.

25 <<Amma na a atsusa a ɗa vuma cinai usheli u na u ri ne egeɓe a na oo olo, a̱vu u von na̱ a̱yi nu ucira, vuma na yuwain ne ɗa goon oo una. 26 She i yuwan ili nu usheli'i wan, adama a na u yuwan unusu u na u rawai a na wa̱a̱ kuwa̱ shi. Adama a na addama a nda una̱ta̱ u ɗa u ri na̱ za vuma na cinai moron ma̱ nden ma̱ yi reve u reme wu una yi. 27 Adama a na vuma'a u cina ta̱ usheli'i a atsusa, amma ko na usheli'i wo oruwoi babu za na aa wawa yi.

28 <<Na̱ vuma cina usheli u na koto u revei vali shi za na koto a yuwain adanshi o lolo va̱ yi shi, reve u von na̱ a̱yi nu ucira reve e reme le, 29 u ta tsupa dada vu usheli'i ukunzuwu u azurufa kupoton. Waru u ta zuwa usheli'i, adama a na u lyungusa̱ yi ta̱. Agba waa kakasa lolo na̱ a̱yi shi she ukwisa̱ wa̱ yi.

30 <<Vuma aa zuwa ka va dada va̱ yi shi, she u zuwa dada va̱ yi o wono wan.>>