1 Reve tsu vadala tsu reme ure a̱ tyo a̱tsumona nu ure u Mala ma̱ Shili, cine A̱sulazuva a damma numu. Reve tsu yuwan rana va̱ a̱bunda̱ a̱ ka̱nda̱ruwusa̱ iɗa ya agaɗi ya Seyi.

2 Reve A̱sulazuva a damma mu, 3 <<I jima ta̱ a̱ka̱nda̱riya̱ e iɗa ya agaɗi i nda. Vadalai a̱ tyo upasu wu ugana. 4 Vu damma ama adanshi a nda: <I ta azama yu utula̱i ni iɗa yi mmaci n ɗu, umatsun wa Isuwa aza a na a̱ ri nden a Seyi. A ta uwwa wovon u ɗu, amma i yuwan ugbozu. 5 She i zami le nla̱ngi wan, adama a na maa ca ɗu ko iɗa i ta̱ i le shi, ko i na i rawai na yaa dasa anana a̱ ɗu shi. N ca ta̱ ɗe Isuwa upasu wa agaɗi wa Seyi wo o'wo za va̱ yi. 6 I ta tsula ilyalya i na yaa lyuwa na̱ mini ma na yoo sowo ya̱'a̱ le na̱ azurufa.> >>

7 <<A̱sulazuva A̱sula̱ a̱ ɗu a zuwaa ta̱ ulinga we ekere a̱ ɗu suru aba'un. U reve ta̱ na̱ mmalu n ɗu a̱tsuma̱ a̱ a̱tsumona a gbain a nda. A'wan amunga a nda A̱sulazuva A̱sula̱ a̱ ɗu o to oɓolo na̱ a̱ɗu, waru i lamba ko ili shi.>>

8 Ɗaɗa tsu ka̱ra̱i tsu kanzu'wai a̱za̱ a̱ tsu ugundo wa Isuwa, aza a na a̱ ri nden Seyi. Tsu vadala ta̱ diga o ure wa Araba nu ure wa Ela na̱ Eziyon Geba. Reve tsu saɓa a̱ tyo a̱ a̱tsumona a̱ Mowa.

9 <<Reve A̱sulazuva a damma mu, <She i damaton a̱za̱ a̱ Mowa wan agba she i zami le uvon wan, adama a na maa ca ɗu ko upasu u ro wi iɗa i le shi. N ca ta̱ ɗe ugundo wa̱ Lutu iɗa ya Ar wo o'wo za le.>

10 <<Aza a Emim a ɗa a̱ shi nden ɗe, ama o ucira na̱ a̱bunda̱, uga'an she damma aza a Anaku. 11 Tsa ama a Anaku, ele fo a tara le ta̱ aza a Refaya, amma a̱za̱ a̱ Mowa a̱ tsu ɗe le ta̱ aza a Emim. 12 Aza a Horiya a ɗa a̱ shi nden a Seyi. Amma ugundo wa Isuwa u gba̱ra̱ le ta̱. O una ta̱ aza a Horiya a na a fara da̱nuwa̱ nle lo, reve a̱ da̱nu uba̱ta̱ u le cine Isra'ila yuwain ni iɗa i na A̱sulazuva a ca nle wo o'wo za le.>>

13 <<Reve A̱sulazuva a damma, <Gogo 'yoyin i pasa Uka̱ri wa Zere.> Ɗaɗa tsu pasai uka̱ri'i. 14 A yuwan ta̱ a'wan mata'atsu na̱ kunla̱ diga a mantsa ma na tsu lyawai Kadesh Baniya a̱ tyo mantsa ma na tsu pasai Uka̱ri wa Zere. Hali she na aza a na a rawai uvon suru a̱ kuwa̱i o uva̱la̱ta̱ cine A̱sulazuva a kucinaa nle. 15 Ukere wa̱ A̱sulazuva u shi ta̱ a̱ nla̱ngi ne ele, hali she na u kototo nle suru suru diga o uva̱la̱ta̱'a̱.

16 <<Reve ana aza a na a rawai uvo'on a̱tsuma̱ a ama a̱ kuwa̱i suru, 17 a̱vu A̱sulazuva a damma mu, 18 <Ana'an i ta pasa nu utyo wa̱ Mowa nu ure wa Ar. 19 A mantsa ma na i rawai uba̱ta̱ wa aza a Amon, she i damaton le ko i zami le uvon wan, adama a na maa ca ɗu ko upasu u ro wi iɗa wa aza a Amon shi. N ca ta̱ ugundo wa̱ Lutu a̱yi woo o'wo za le.>

20 <<Uba̱ta̱'a̱ waru a̱ shi ta̱ a tara yi uba̱ta̱ wa aza a Refaya u ɗa, aza a na a̱ shi nden lo. Amma aza a Amon a̱ tsu ɗe le ta̱ aza a Zamzumi. 21 Ele ama o ucira a ɗa a̱ shi na̱ a̱bunda̱, waru nu uga'an tsa aza a Anaku. A̱sulazuva o kototo le ta̱ a̱ ma̱ka̱ka̱n ma aza a Amon, aza a na a̱ gba̱ra̱ nle reve a̱ da̱nu lo. 22 Ne ɗa waru A̱sulazuva a yuwayin ugundo wa Isuwa aza a na a̱ shi na̱ nden a Seyi, ana u kototoi aza a Horiya a̱ ma̱ka̱ka̱n me ele. Reve a̱ gba̱ra̱ le a̱vu a̱ da̱nu uba̱ta̱'a̱ hali na ana'an. 23 Amma aza a Aviya, aza a na a̱ shi na̱ nden a̱ mulyuci ma Gaza, ele aza a Karita a na o uta̱i Kafato, a̱vu o kototo le reve a̱ da̱nu uba̱ta̱'a̱.>>

24 <<Reve A̱sulazuva a damma, <'Yoyin i reme ure i pasa Uɗolu wa Anon. A̱yi ɗa ndolo n ca nɗu Sihon za va Amoriya mogono ma Heshibon ni iɗa ya̱ yi e ekere a̱ ɗu. Farai a̱ ka̱mba̱tosu yi za ɗu i reme uvon na̱ a̱yi. 25 Diga ana'an n ta fara a zuwusa meje'en ma̱ lipu na̱ wovon u ɗu e iɗa suru a̱tsuma̱ o uvaɗi. Nna a uwwa alabari a̱ ɗu e te je'en lipu reve a da'wan.>

26 <<Reve n lyungu nlingata diga a̱ a̱tsumona a Kedemo a̱ tyo ya Sihon mogono ma Heshibon e izami yi nden ma alafiya, n damma, 27 <Lyawa tsu, tsu utula̱i ni iɗa ya̱ wu. Tsu ta̱ kuru o ure mejege, tsaa ɓatsa usa'ani ko ugula̱ shi. 28 Ilyalya i na tsaa lyuwa na̱ mini mo oso tsu ta tsupa na̱ azurufa. Vu lyawa tsu tsu dasa o utula̱i ni iɗa ya̱ wu goon, 29 cine ugundo wa Isuwa aza a na a̱ ri na̱ nden Seyi na̱ a̱za̱ a̱ Mowa a na a̱ ri nden a Ar a yuwaan ntsu, hali tsu pasa Urudu a̱ tyo e iɗa i na A̱sulazuva A̱sula̱ a̱ tsu aa casu tsu.> 30 Amma a̱vu Sihon mogono ma Heshibon ma putsa tsu o utula̱i. Adama a na A̱sulazuva A̱sula̱ a̱ ɗu a zuwaa yi ta̱ aciyogbamu no okolo o ugbawu adama u ca ɗu a̱yi e ekere a̱ ɗu, cine u yuwain gogo.>>

31 <<Reve A̱sulazuva a damma mu, <A̱yi ɗa nda, n fara ta̱ a casu ɗu Sihon ni iɗa ya̱ yi, farai a lyuwusa iɗa ya̱ yi wo o'wo za ɗu.>

32 <<Reve ana Sihon uta̱i na ama a̱ yi adama u yuwan uvon na̱ a̱tsu a Jaha, 33 a̱vu gba A̱sulazuva A̱sula̱ a̱ tsu a ca tsu a̱yi, reve tsu lyuwa yi no olobo a̱ yi oɓolo na ama a̱ yi suru. 34 A mantsa'a reve tsu usa ilyuci ya̱ yi suru, reve tsu kototo le suru suru, ali na̱ a̱ma̱ci na̱ muwun. Tsu lyawa ko za la'a shi. 35 Amma iliyamunga nu utsuru wi ilyuci i na tsu lyuwai, ele ɗa goon tsu pura̱yi aciya̱tsu. 36 Diga Arowa za na ri a̱ nge'en mu Uɗolu wa Anon, na̱ diga a̱ lyuci na ri o uɗolu'u waru, hali a̱ tyo Giliyadu, ko lyuci ta̱ la'a ucira u tsu shi. A̱sulazuva, A̱sula̱ a̱ tsu a ca tsu ta̱ ele suru. 37 She iɗa ya ama a Amon ɗa goon tsu rawai zuzu shi, ni iɗa i na i ri a̱ nge'en mu uɗolu wa Jabo ni ilyuci yi iɗa ya agaɗi, na̱ ba̱ta̱ na suru A̱sulazuva, A̱sula̱ a̱ tsu a putsa ntsu.>>