1 <<Uwwai a̱ɗu aza a Isra'ila. I ta zama i pasa Urudu i uwa i usa nɗa n na n la'a nɗu ucira na̱ a̱bunda̱ waru, aza a na a̱ ri nden e ilyuci i gbagbain i na i ri na̱ kari vu uga'an lon. 2 Ama'a a̱ tu uga'an nu ucira, ugundo wa aza a Anaku, aza a na i revei ne ele, waru aza a na yu uwwai a yuwain adanshi e le a dammai, <Zane ɗa aa gura isawan a̱ ma̱ka̱ka̱n ma aza a Anaku?> 3 Amma i reve ana'an a na A̱sulazuva A̱sula̱ a̱ ɗu a̱yi ɗa za na aa pasasa elime a̱ ɗu tse elentsu a akina a na o tsu soɗu. U ta la'a le ucira a̱ ma̱ka̱ka̱n ma̱ ɗu, reve u soɗu le. Ne ɗa ya̱a̱ gba̱ra̱ le, reve waru i kototo le babu usa̱n, cine A̱sulazuva a yuwaan nɗu nzuwulai.

4 <<Nna̱ A̱sulazuva A̱sula̱ a̱ ɗu a̱ gba̱ra̱ le a̱ ma̱ka̱ka̱n ma̱ ɗu, she i jiyan o okolo a̱ ɗu, <Adama a̱ a̱ɓula̱ a̱ tsu a ɗa A̱sulazuva a̱ ta̱wa̱to ntsu pa adama tso o'wo ni iɗa i nda wan.> Ne ɗa shi, adama e iwuya yi nɗa n nda n ɗa A̱sulazuva a̱a̱ gba̱rusa̱ le a̱ ma̱ka̱ka̱n ma̱ ɗu.✝ 5 Adama a̱ a̱ɓula̱ ko e isa'ani yo okolo a̱ ɗu a ɗa i zuwai yaa uwa pe i usa iɗa'a shi, amma adama e iwuya yi nɗa n nda i ɗa A̱sulazuva A̱sula̱ a̱ ɗu a̱a̱ gba̱ra̱ le a̱ ma̱ka̱ka̱n ma̱ ɗu, adama u shiton adanshi a na u kucinayi nkaya n ɗu, Ibrahim ni Ishiyaku na̱ Yakubu. 6 Adama o ndolo, i reve a na adama a̱ a̱ɓula̱ a̱ ɗu a ɗa A̱sulazuva A̱sula̱ a̱ ɗu aa casu ɗu iɗa i sa'ani i nda wo o'wo za ɗu shi, adama a na a̱ɗu ama a aciyogbamu a ɗa.>>

7 I cuwan she yi icina cine i zuwai A̱sulazuva A̱sula̱ a̱ ɗu a yuwain upan a̱tsumona wan. Diga a mantsa ma na yu uta̱i e iɗa ya Masar hali i rawa pa nda i yuwusaan ta̱ A̱sulazuva aciyogbamu. 8 Ko a Horeb fo she na i zuwai A̱sulazuva a yuwain upan, hali u shi azama u kototo ɗu. 9 Ana n kumbai masasan adama n ushi aɓaci a atali a nzuwulai n na A̱sulazuva a yuwain na̱ a̱ɗu, n yuwan ta̱ ayin amunga na̱ rana amunga ɗe a masasa'an, n lyuwa ilyalya shi agba n sowo mini shi. 10 Reve A̱sulazuva a ca mu aɓaci a atali e re a na u yuwain iɗana na aakatsu a̱ yi. Adanshi a na A̱sulazuva a yuwain na̱ a̱ɗu a masasan suru diga a̱tsuma̱ a akina a̱ shi ta̱ ɗe a atali'i o urana wi iɓolo ya ama.

11 <<O ukosu wu rana amunga na ayin amunga'a, reve A̱sulazuva a ca mu aɓaci a atali e re'e, atali a nzuwulai'i. 12 Reve A̱sulazuva a damma mu, <'Yon vu jika̱ a̱ zura̱ a̱ cipa̱ diga pa, adama a na ama a na vu uta̱yi diga Masar a yuwan ta̱ ili yi idaba. A ɓatsushi ta̱ a lyawa ure u na n zuwa nle, a̱ zuɗa̱a̱ ta̱ aciyele a̱ma̱li a̱ rumu.>

13 <<Reve A̱sulazuva a dammisa mu, <Me ene ta̱ ama a nda, ama a ɗa aza a aciyogbamu! 14 Lyawa mu n kototo le, n tawa ala e le a̱tsuma̱ o uvaɗi. Reve mo o'woto wu iɗa i na i la'a nle ucira na̱ a̱bunda̱.>

15 <<Ɗaɗa n vadalai n cipa̱i diga a masasa'an a̱yi ubuwu a madala na akina. Aɓaci a atali e re a nzuwulai'i e ekere a̱ va̱. 16 Ana n ka̱lyuwa̱i, a̱vu me ene i yuwaan ta̱ A̱sulazuva A̱sula̱ a̱ ɗu unusu. I zuɗa̱a̱ ta̱ aciya̱ɗu a̱a̱ma̱li o uruma u ma̱dindim. I vadalashi ta̱ i lyawa ure u na A̱sulazuva a zuwa nɗu. 17 Reve n tara aɓaci a atali e re'e a̱vu n kpasu'wa le, a̱vu mu ɓoso le miri miri e esu a̱ ɗu.

18 <<Reve n vowison ma̱kpa̱ɓa̱ a̱ ma̱ka̱ka̱n ma̱ A̱sulazuva ayin amunga na̱ rana amunga. N lyuwa ilyalya shi agba n sowo mini shi tsu ufaru adama o unusu u na i yuwain suru, na i yuwain ili i iwuya e ekere a̱ A̱sulazuva, a̱vu i zuwa yi u yuwan upan. 19 Mu uwwa ta̱ wovon wu upan nu ulambu wu uyo'o u na A̱sulazuva a yuwain na̱ a̱ɗu, hali u shi u ciga u kototo ɗu. Agba reve A̱sulazuva o polisoo mu atsuvu.✝ 20 A̱sulazuva a yuwan ta̱ upan na̱ Haruna lon, hali u shi u ciga u kototo yi. Amma reve n yuwan ipati adama a yi a mantsa'a fo. 21 Reve n tara ili yu unusu i na i yuwai'in, ma̱dindim ma na i yuwain reve n kula̱to yi na akina. A̱vu mu ɓoso yi, mi ira yi n luɓa̱tsa̱ yi tsa̱ ma̱buta̱. Reve n kusha'wa ma̱buta̱'a̱ a̱tsuma̱ o uɗolu u na we yeneshe diga a masasa'an.

22 <<Ne ɗa waru i zuwai A̱sulazuva a yuwain upan a Tabera na̱ a Masa na̱ a Kibirot Hatava.

23 <<Waru ana A̱sulazuva a̱ lyungu nɗu diga Kadesh Baniya, a̱vu u damma, <Gawain i 'ya̱wa̱ i usa iɗa i na n ca nɗu.> Agba a̱vu i yuwaan adanshi a̱ A̱sulazuva A̱sula̱ a̱ ɗu aciyogbamu. I usu ili i na u dammai shi agba i yuwan tsutoni na̱ yi shi. 24 A̱ɗu aza a aciyogbamu a ɗa a̱ tyo e ekere a̱ A̱sulazuva diga a mantsa ma na n reve nɗu.

25 <<Ɗaɗa n voyin ma̱kpa̱ɓa̱ a̱ ma̱ka̱ka̱n ma̱ A̱sulazuva rana amunga na ayin amunga o ndolo, adama a na A̱sulazuva a̱ shi ta̱ a damma u to kototo ɗu. 26 Reve n yuwan avasa a̱ tyo uba̱ta̱ a̱ A̱sulazuva, a̱vu n damma, <A̱sulazuva Zagbain, she vu kototo ama a̱ wu, aza a na ele ɗa agadu a̱ wu wan, aza a na vu tsupayi na̱ tsugbain tsa̱ wu, aza a na vu uta̱yi e iɗa ya Masar nu ukere wu ucira wa̱ wu. 27 Vu cuwan na agbashi a̱ wu Ibrahim ni Ishiyaku na̱ Yakubu. She vu dama na aciyogbamu a ama a nda wan, ko ni iwuya i le ko unusu u le wan. 28 Na̱ ne ɗa shi, iɗa i na vu uta̱a̱ ntsu a ta damma, <<Adama a na A̱sulazuva a gura rawato le e iɗa i na u yuwain nzuwulai shi, waru adama a na u 'yuwan nle ɗaɗa wu uta̱a̱ nle adama wu una le a̱ a̱tsumona.>> 29 Agba ele ama a̱ wu a ɗa, agadu a̱ wu a na vu uta̱yi nu ucira u gbain wa̱ wu waru nu ukere wu ucira wa̱ wu.>