1 Reve Musa ɗe ama a Isra'ila suru wira̱ u ta̱. A̱vu u damma,

<<Zuwai atsuvu ulobonu yu uwwa ili i na a zuwai na̱ wila̱ u na maa dansaa ɗu ana'an. I reve le waru i yuwan tsutoni ne ele ulobonu. 2 A̱sulazuva A̱sula̱ a̱ tsu a yuwan ta̱ akucunu na̱ a̱tsu a Masasan ma Horeb. 3 Na̱ nkaya n tsu n ɗa A̱sulazuva a yuwain akucunu a nda shi, amma na̱ a̱tsu ɗa, a̱tsu na tsu ri pa wuma ana'an suru. 4 A̱sulazuva a yuwan ta̱ adanshi na̱ a̱ɗu esu ne esu a̱tsuma̱ a akina a masasan. 5 A mantsa mo ndolo, mi isawan ta̱ e memere ma̱ ɗu na̱ A̱sulazuva adama n ka̱mbuwa̱ ɗu adanshi a̱ A̱sulazuva, adama a na i shi ta̱ a uwwusa wovon wa akina'a i gura kumba masasa'an shi. A̱vu u damma,

6 <<A̱mu ɗa A̱sulazuva A̱sula̱ a̱ ɗu, za na uta̱a̱ nɗu e iɗa ya Masar, diga e iɗa i tsugbashi.

7 <<Ya̱a̱ da̱na̱ na̱ musula̱ n ro shi, she a̱mu.

8 <<She i yuwaan aciya̱ɗu ma̱sula̱ mo ro oroci e ili i ro ɗe zuva ko pa o uvaɗi ko a̱tsuma̱ a̱ mini za̱la̱ wan. 9 She i ka̱ɗa̱ta̱wa̱ le ko i yuwaan le a̱ga̱nda̱ wan, adama a na a̱mu A̱sulazuva A̱sula̱ a̱ ɗu A̱sula̱ a̱ tsushu'un a ɗa. N tsu ca ta̱ muwun oforo adama o unusu wu mbara hali a̱ tyo mantsa ma ta'atsu na̱ mantsa ma̱ na̱shi wa aza a na a 'yuwan numu. 10 Amma n tsu roco ta̱ icigi hali mantsa ukpakukupa kupa a̱ tyo e ekere a aza a na a ciga numu, reve a̱ kuru wila̱ u va̱.

11 <<She i yuwan ulinga na ala a̱ A̱sulazuva A̱sula̱ a̱ ɗu pere m pere wan, adama a na A̱sulazuva aa lyawa za na yuwain ulinga na ala a̱ yi pere m pere fa̱a̱n shi.

12 <<I cuwan nu urana wa Ashibi, i tara yi na akiza, cine A̱sulazuva A̱sula̱ a̱ ɗu a zuwa nɗu. 13 Rana ta̱li ɗa yaa yuwan ulinga u ɗu suru. 14 Amma urana we cindere urana wa Ashibi a ɗa e ekere a̱ A̱sulazuva A̱sula̱ a̱ ɗu. A̱tsuma̱ a̱ yi yaa yuwan ulinga u ro shi, ko a̱ɗu ko mawun mo ulobo ma̱ ɗu ko usheli u ɗu ko aagbashi a vali ko a ka, ko nan ɗu ko mololi ma̱ ɗu ko iliyamunga i ro i ɗu, ko omocin a na a̱ ri nden e ilyuci i ɗu, adama agbashi a̱ ɗu a ali na̱ a̱ma̱ci e ivuwan fo tsa̱ ɗu. 15 I cuwan a̱ɗu agbashi a ɗa i shi e iɗa ya Masar. Reve A̱sulazuva A̱sula̱ a̱ ɗu o uta̱a̱ ɗu pe nu ukere wu ucira. Adama o ndolo A̱sulazuva A̱sula̱ a̱ ɗu a zuwa ɗu ta̱ i guza̱ urana wa Ashibi.

16 <<I ca dada na̱ mma ɗu tsugbain, cine A̱sulazuva A̱sula̱ a̱ ɗu a zuwa nɗu i yuwan, adama i jima waru i da̱nu lafiya a̱tsuma̱ e iɗa i na A̱sulazuva A̱sula̱ a̱ ɗu aa casu ɗu.

17 <<She yu una vuma nu ucigu u ɗu wan.

18 <<She i yuwan tsipere wan.

19 <<She i yuwan wivu wan.

20 <<She i damma ili i na i revei shi e ekere o moron ma̱ nden ma̱ ɗu wan.✝

21 <<She i zuwa esu a̱ ɗu a ka moron ma̱ nden ma̱ ɗu wan. Waru she i zuwa okolo a̱ ɗu o u'wa ko e iɗa i moron ma̱ nden ma̱ ɗu ko a aagbashi a̱ yi a vali ko a ka wan, ko a nan ko o mololi ma̱ yi wan, ko e ili i ro i moron ma̱ nden ma̱ ɗu wan.✝

22 <<Idanshi i nda i ɗa A̱sulazuva a dammai iɓolo i gbain i ɗu ɗe a masasan nu uɗyo u gbain diga a̱ a̱tsuma̱ a akina, ne eleshe ni irumbu pici. Reve u ɗana le a aɓaci a atali e re a̱vu ca mu ele, waru u da̱shi ili i ro ɗe shi.

23 <<Ana yu uwwai uɗyo'o diga e irumbu'u, a mantsa ma na masasa'an u da̱na̱i a madala na akina, reve azagbain o gundo ɗu na̱ mbara n ɗu suru a̱ ta̱wa̱ ya̱'a̱ va̱. 24 Reve a damma, <A̱sulazuva A̱sula̱ a̱ tsu o roco tsu ta̱ tsugbain nu ucira wa̱ yi. Waru tsu uwwa ta̱ uɗyo wa̱ yi diga a̱tsuma̱ a akina. Ana'an tsu reve ta̱ A̱sula̱ a ta yuwan adanshi na̱ vuma, reve vuma buwa wuma. 25 Adama o ndolo nye yaa zuwa tsu kuwa̱ gogo? Akina a gbain a nda o to soɗu tsu. Na̱ tsu da̱shi uwwa uɗyo wa̱ A̱sulazuva A̱sula̱ a̱ tsu, tsu ta̱ kuwa̱. 26 Adama a na vaɗilima̱ ne ɗa vu uwwai ɗe uɗyo wa̱ A̱sula̱ a wuma a yuwusan adanshi diga a̱tsuma̱ a akina, cine tsu uwwai, reve u la'a? 27 Vu 'ya̱wa̱ zuzu reve vu uwwa ili i na A̱sulazuva A̱sula̱ a̱ tsu aa damma. Reve vu ta̱wa̱ vu damma tsu ili i na u damma nuwu suru. Tsu ta uwwa, a̱vu tsu kuru.>

28 <<Reve gba A̱sulazuva a uwwa adanshi a̱ ɗu a mantsa ma na i yuwain adanshi na̱ a̱mu. Reve u damma mu, <Mu uwwa ta̱ ili i na ama a nda a damma nuwu. Ili i na a dammai suru u lobono ta̱. 29 A damma a̱ ta̱ na̱ cu'un vo okolo a nda, a na aa uwwa wovon u va̱, a̱vu a̱ kuru wila̱ u va̱ kuci, adama ili i wala le mejege ne ele na̱ muwun n le babu ukotu! 30 <<'Ya̱wa̱, vu damma le, a̱ ka̱mba̱ o ogodo e le.>> 31 Amma a̱vu vi isawan pa na̱ a̱mu adama n damma wu ili i na n zuwai ni ili i na a̱a̱ kuru na̱ wila̱ u na voo rito le, adama a̱ kuru le a̱tsuma̱ e iɗa i na maa casu le wo o'wo za le.> >>

32 <<Adama o ndolo i ka̱mbuwa̱ ugbozu i yuwan ili i na A̱sulazuva A̱sula̱ a̱ ɗu a zuwa nɗu, she i ɓatsa usa'ani ko ugula̱ wan. 33 I kuru ure u na A̱sulazuva A̱sula̱ a̱ ɗu a zuwa nɗu suru, adama i da̱na̱ wuma waru i lyuwa elime, waru i yuwan rana va̱ a̱bunda̱ a̱tsuma̱ e iɗa i na yoo o'wo za ɗu.>>