1 A̱yi nda a̱yi ɗa aba'un a na Musa vuma va̱ A̱sula̱ zuwayi aza a Isra'ila kafu ukwisa̱ wa̱ yi. 2 U damma,

<<A̱sulazuva a̱ ta̱wa̱ ta̱ diga Sinai

reve u roco le aciya̱yi a Seyi.

Reve wi ikana diga a Masasan ma Faran.

A̱vu u ta̱wa̱ oɓolo nu ukpakukupa kupa wa aza a akiza,

ne elentsu a akina a madala o ukere u sa'ani wa̱ yi.

3 Amayun u ciga ta̱ ama a̱ yi,

aza a akiza suru a̱ ta̱ o ukere wa̱ wu.

Elime a ana a̱ wu a ɗa a̱a̱ kingyosu,

waru diga uba̱ta̱ wa̱ wu u ɗa a̱ ushishi ili i na aa yuwan.

4 Wila̱ u na Musa ca ntsu,

ili ya agadu o oɓolo a ama a Yakubu.

5 A̱sulazuva o'wo ta̱ mogono ma Jeshurun*

a mantsa ma na azagbain a ama o ɓolotoi,

oɓolo na̱ gundo va aza a Isra'ila.>>

6 Reve Musa damma, <<Lyawa Roben da̱na̱ wuma u kuwa̱ wan,

amma ama a̱ yi o o'wo wa'a.>>

7 Reve u damma ili i nda adama a Yahuza,

<<A̱sulazuva vu uwwa mesun ma Yahuza,

vu ta̱wa̱ na̱ a̱yi uba̱ta̱ wa ama a̱ yi.

Vu yuwan uvon nu ukere wa̱ wu adama e le.

Vo o'wo ikambi ya̱ yi e ekere a n'yuwatan ma̱ yi!>>

8 Adama a̱ Levi a̱vu u damma,

<<Tumim na̱ Urim va̱ wu

aza a vuma na vu rocoi isa'ani i ɗa,

za na vu lyungwa̱i a Masa

za na vu yuwain mpolo na̱ a̱yi uba̱ta̱ u mini ma Meriba.

9 Za na dammai dada na̱ mma va̱ yi,

<N tara ɗu ili i ro shi.>

Reve u wasan a̱za̱ a̱ yi

na̱ muwun ma̱ yi.

Amma u kuru ta̱ adanshi a̱ wu

reve u guza̱ akucunu a̱ wu.

10 O to roco Yakubu ure wa̱ wu, Isra'ila

waru wila̱ wa̱ wu.

A̱ ta̱ tsun ili i ma̱guru a̱ ma̱ka̱ka̱n ma̱ wu

na̱ kucci vu ukula̱tosu suru a masa'a ma̱ wu.

11 A̱sulazuva vu zuwaa ili i na u ri na̱ a̱yi aba'un,

reve vu ushi ulinga we ekere a̱ yi.

Vu minjira ucira wa aza a na a̱ 'yoyin nla̱ngi na̱ a̱yi

na aza a na a 'yuwan niyi, hali aa gura 'yon waru shi.>>

12 Adama a Banyami a̱vu u damma,

<<Lyawa macigata ma̱ A̱sulazuva ma̱ da̱nu lafiya a̱tsuma̱ a̱ yi,

adama na u tu uka̱nda̱ruwu na̱ yi urana ma̱ɓula̱,

waru macigata ma̱ A̱sulazuva ma̱ da̱na̱ nden e memere ma̱ nlingu ma̱ yi.>>

13 Adama a̱ Isuhu waru reve u damma,

<<Lyawa A̱sulazuva a zuwaa iɗa ya̱ yi aba'un

nu une'e u sa'ani diga zuva na a'iza

na̱ za mini ma̱ a̱ru'un ma na ma̱ ri za̱la̱,

14 ni ili i na i la'ai ulobonu i na urana u tsu ca,

ni ili i na i la'ai ulobonu i na woto u tsu ca,

15 ni ili i na i la'ai ulobonu i na akuci a nsasan mu ufaru n tsu ca,

na aba'un a agaɗi a na a̱ ri nu ukotu shi,

16 ni ili i na i la'ai ulobonu yu uvaɗi ma̱ɓula̱ ma̱ yi,

ni isa'ani yi za na cipa̱i o molopu ma madala.

Lyawa ele nda suru a̱ da̱nu a aaci a̱ Isuhu,

a̱ cin vu za na a tawai a̱tsuma̱ a̱ a̱za̱ a̱ yi.

17 Tsugbain tsa̱ yi tsa̱ ta̱ tsa limatan vu ufaru vo ogono a nan,

avana a̱ yi waru tsa avana a yacin.

Ne ele ɗa wa̱a̱ zuma̱ nɗa, suru nle,

hali a̱ tyo ukosu wu uvaɗi.

Ne ɗa ama ukpakukupa kupa wa Ifiramu a̱ ri.

Ne ɗa ama ukpakukupa kupa wa Manase a̱ ri.>>

18 Reve adama a Zebulun u damma,

<<Yuwan ma̱za̱nga̱ Zebulun, a̱ mota̱a̱ ma̱ wu*,

Isaka waru o ogodo a̱ wu.

19 E te ɗe ama a̱ ta̱wa̱ a masasan.

Ɗe ɗa aa ca kucci na ri mejege,

adama a na o to rono diga a aba'un a mala

nu utsuru wu usokowu u wuyun.>>

20 Adama a Gadu u damma ta̱,

<<Za va aba'un a ɗa za na da̱shiyi upasu wa Gadu.

Gadu tsu von ta̱ tsu kamu,

reve wu kara ekere hali na̱ mokkoto ma aaci.

21 U ɗangulaa ta̱ aciya̱yi iɗa i na i la'ai ulobonu.

Ɗe ɗa akunda a zagbain a̱ ri uzuwu.

A mantsa ma na azagbain a ama o ɓolotoi,

u yuwan ta̱ ili ya̱ a̱ɓula̱ ya̱ A̱sulazuva,

u kuru ta̱ wila̱ u na a cayi aza a Isra'ila.>>

22 Adama a Dan reve u damma,

<<Dan mawun ma kamu ma ɗa,

za na aa 'yawusan diga Bashan.>>

23 Adama a Nafutali a̱vu u damma,

<<Nafutali ta̱ tapu ni isa'ani ya̱ A̱sulazuva,

waru u ta̱ tapu na aba'un a̱ yi,

u ta tara agadu o upasu wu uyagi u mala.>>

24 Adama a Asha waru reve u damma,

<<Asha ɗa la'ai aba'un a̱tsuma̱ a̱ a̱za̱ a̱ yi,

lyawa u tsura̱ isa'ani e ekere a̱ a̱za̱ a̱ yi.

Waru lyawa u tsupu ana a̱ yi a mani'in.

25 Lyawa na̱ntsu lyuci va̱ wu vo o'wo vi irumu na̱ rumushili.

Ucira wa̱ wu wo koto shi hali she na̱ vu kuwa̱.>>

26 <<Za ro lo tsa̱ A̱sula̱ a̱ Jeshurun shi,

za na aa walasa zuva tsa̱ra̱ u kamba wu,

za na cipa̱i diga zuva a̱tsuma̱ a tsugbain tsa̱ yi.

27 A̱sula̱ a na a̱ ri nu ufaru shi a̱yi ɗa uda̱na̱ta̱ wa̱ wu,

waru za̱la̱ va̱ wu ekere o ucira a̱ yi e te keɗe wu,

Reve u gba̱ra̱ n'yuwatan a̱ ma̱ka̱ka̱n ma̱ wu

a̱vu u damma, <Kototo le!>

28 Adama o ndolo a ɗa Isra'ila ri nden lafiya.

Ugundo wa Yakubu u ta̱ nden gbaga

e iɗa i na i ri ni ishina na̱ masayan ma sa'avu,

waru zuva va̱ yi ta̱ ɗa̱wusa̱ a'iza.

29 Za va aba'un a ɗa vu ri Isra'ila!

Zane ɗa ri tsa̱ ɗu,

ama a na A̱sulazuva a wawai?

A̱yi ɗa a̱ra̱ga̱ a̱ ɗu ni ikambi i ɗu,

na̱ matsun me pe'eni ma tsugbain ma̱ ɗu.

N'yuwatan n ɗu n ta̱ kingyo a̱ ma̱ka̱ka̱n ma̱ ɗu.

A̱ɗu gba i ta dasa cina̱ le.>>