1 <<A mantsa mo ndolo reve A̱sulazuva a damma mu, <She'en aɓaci a atali e re tsa̱ a̱za̱ o ufaru, a̱vu vu gawan ya̱'a̱ va̱ a masasan. A̱vu vu yuwan aakpati a ɗanga. 2 N ta ɗana idanshi i na i shi a aɓaci a atali o ufaru aza a na vu ɓosoi. A̱vu vu zuwa le pe a aakpati'i.>

3 <<Ɗaɗa n yuwain aakpati a ɗanga a akashiya. Reve waru n she'en aɓaci a atali e re tsa̱ a̱za̱ o ufaru. Reve n kumba a gawan a masasan na atali e re'e e ekere a̱ va̱. 4 Reve A̱sulazuva a ɗana ɗe a aɓaci a atali'i tsi iɗana yu ufaru, wila̱ kupa na u yuwaan ɗu adanshi a masasan a̱tsuma̱ a akina o urana wi iɓolo. Reve A̱sulazuva a ca mu ele. 5 Reve n vadala n ka̱ra̱ a̱ cipa̱ a masasa'an, a̱vu n zuwa aɓaci a atali'i a aakpati a na n yuwain. Pe ɗa a̱ ri cine A̱sulazuva a zuwa numu.>>

6 A̱vu aza a Isra'ila e reme mmalu diga o oko'o a aza a Ya'akan a̱ tyo Mosera. Ɗe ɗa Haruna kuwa̱i reve a̱ ciɗo yi. A̱vu ulobo wa̱ yi Eliyaza reme ulinga u tsuganu o una̱ wa̱ yi. 7 Diga lo reve a̱ ka̱ra̱ a̱ tyo Gudugoda reve waru a̱ tyo Yotubata iɗa i na i ri na̱ ɗolu. 8 A mantsa mo ndolo reve A̱sulazuva a tawa ugundo wa̱ Levi adama o o'wo a̱za̱ e itana ya Akpati a Nzuwulai a̱ A̱sulazuva, e isawan a̱ ma̱ka̱ka̱n ma̱ yi a yuwan a̱ga̱nda̱, waru a zuwa aba'un na ala a̱ yi cine u ri hali a̱ tyo ana'an. 9 A̱yi ɗa i zuwai nan Levi a̱ ri na akunda ko agadu shi a̱tsuma̱ a̱ a̱za̱ e le, A̱sulazuva a̱yi ɗa agadu e le cine A̱sulazuva A̱sula̱ a̱ ɗu a damma nle.

10 <<N da̱na̱ ta̱ a masasan hali rana amunga na ayin amunga, tsu ufaru. Reve A̱sulazuva a uwwa mu a mantsa ma nda waru. Ifoɓi ya̱ yi i ɗa u kototo ɗu shi. 11 Reve A̱sulazuva a damma mu, <'Yon vu walaa ama elime, adama a uwa a tara agadu e iɗa i na n kucinai na maa ca nkaya le.>

12 <<Gogo gba aza a Isra'ila, nye i ɗa A̱sulazuva A̱sula̱ a̱ ɗu a cigai ya̱'a̱ ɗu? A̱yi ɗa yu uwwa wovon wa̱ A̱sulazuva A̱sula̱ a̱ ɗu, i yuwan mmalu o ure wa̱ yi, i ciga yi, i yuwaan A̱sulazuva A̱sula̱ a̱ ɗu a̱ga̱nda̱ no okolo a̱ ɗu suru na̱ wuma u ɗu suru. 13 Waru i toni ili i na u zuwai nu ure wa̱ yi u na maa casu ana'an adama i da̱nu lafiya.

14 <<Uwwai nda, zuva na̱ zuva va zuva nu uvaɗi ni ili i na i ri pe suru, za va̱ A̱sulazuva A̱sula̱ a̱ ɗu a ɗa. 15 Suru na̱ ne A̱sulazuva a zuwa ta̱ okolo ya nkaya n ɗu a̱vu u ciga le, a̱vu u ɗangwa ɗu limatan va̱ a̱ca̱pa̱ le diga a̱tsuma̱ a ama suru cine u ri ana'an. 16 Adama o ndolo i yuwan tsutoni na̱ A̱sulazuva, i da̱shi o'wo na aciyogbamu wan. 17 Adama a na A̱sulazuva A̱sula̱ a̱ ɗu A̱sula̱ a̱ musula̱ a ɗa na̱ Zagbain va azagbain, A̱sula̱ a gbain za vu ucira, ili i wovon, za na tsu roco aɗangulu shi, agba u tsu ushi utowusu wu una̱ shi. 18 U tsu isawaan ta̱ mkpa'an na̱ nruna̱, waru u ciga ta̱ mocin, u tsu ca yi ta̱ ilyalya na̱ a̱tugu. 19 I ciga omocin adama a na a̱ɗu fo omocin a ɗa i shi e iɗa ya Masar. 20 Yu uwwa wovon wa̱ A̱sulazuva A̱sula̱ a̱ ɗu. A̱yi ɗa yaa yuwaan a̱ga̱nda̱ reve i suraa yi, waru na ala a̱ yi a ɗa yaa kucina. 21 A̱yi ɗa ili yi ica i ɗu. A̱yi ɗa A̱sula̱ a̱ ɗu za na yuwaan nɗu ili i gbagbain i wovon i na ye enei ne esu a̱ ɗu. 22 Nkaya n ɗu n na n cipa̱i a̱ tyo Masar ele ɗa a̱ shi ama kupocindere suru suru, reve gogo nda A̱sulazuva a zuwa i yuwan a̱bunda̱ she damma italyo'o ya zuva.>>