1 <<I kuru ili i na maa casu ɗu ana'an, adama i da̱nu wuma i bala, a̱vu i uwa i usa iɗa i na A̱sulazuva a a tarayi nkaya n ɗu akucunu. 2 I cuwan na̱ cine A̱sulazuva A̱sula̱ a̱ ɗu a̱ kuruyi na̱ a̱ɗu a mmalu n ɗu a̱ a̱tsumona a̱tsuma̱ a a'wan amunga a nda, adama u ka̱ɗa̱to ɗu reve u lyungwa̱ ɗu tsa̱ra̱ u reve ili i na i ri o okolo a̱ ɗu. Ko i ta̱ kuru ili i na u zuwai ko gba shi. 3 U ka̱ɗa̱to ta̱ okolo a̱ ɗu ana u lyawa nɗu na ambulu, reve u lyuwato ɗu na̱ mana ili i na ko a̱ɗu ko nkaya n ɗu n revei shi, tsa̱ra̱ u roco ɗu a na ni ilyalya i ɗa goon vuma a̱a̱ da̱na̱ wuma shi. Agba na adanshi a na suru o uta̱i o una̱ wa̱ A̱sulazuva.✝ 4 A̱tsuma̱ a a'wan amunga o ndolo a̱tugu a̱ ɗu a kutsa shi, waru ana a̱ ɗu a tsutsa shi. 5 I reve a̱tsuma̱ o okolo a̱ ɗu a na cine vuma tsu ɓara mawun ma̱ yi ne ɗa A̱sulazuva A̱sula̱ a̱ ɗu aa ɓarasa ɗu. 6 Adama o ndolo i kuru ili i na A̱sulazuva A̱sula̱ a̱ ɗu a dammai. I yuwan mmalu a̱tsuma̱ e re va̱ yi a uwwusa wovon wa̱ yi. 7 Adama a na A̱sulazuva A̱sula̱ a̱ ɗu a̱ ta̱ ta̱wa̱tosu ɗu a̱tsuma̱ e iɗa i sa'ani, iɗa i na i ri na̱ ɗolu mini meyene, ne esu a̱ mini a na o utusa̱ o uka̱ri na agaɗi. 8 Iɗa i na i ri na̱ yitabo no oroci a yitabo na ataci a̱ ina̱bi na̱ ɗanga vu ubiri na̱ ɗanga muwun m peme, iɗa yi ɗanga mani'in ma̱ zetun ni ishiki, 9 iɗa i ɗa a na yaa lyuwa ilyalya pere, uba̱ta̱ u na yaa lamba ili shi. Iɗa i na atali a̱ yi irumu i ɗa uba̱ta̱ u na ya̱a̱ ka̱pa̱ rumushili a agaɗi a̱ yi.

10 <<Nni i lyuwa i cuwa̱n, i cuwa A̱sulazuva A̱sula̱ a̱ ɗu adama e iɗa i sa'ani i na u ca nɗu. 11 I ka̱mbuwa̱ ugbozu she yi icina na̱ A̱sulazuva A̱sula̱ a̱ ɗu wan, na ya̱a̱ kuɗa̱ a̱ kuru ili i na u dammai na̱ wila̱ wa̱ yi ni ili i na u zuwai a na maa dansaa ɗu ana'an. 12 Adama ta̱wa̱ i lyuwa i cuwa̱n, i suwa 'wa sa'ani a̱vu i da̱nu pe, 13 reve a mantsa ma na oɓolo e inan ni ikyon na̱ mgbele n ɗu m balai, a̱vu azurufa na̱ zinariya ɗu yuwan a̱bunda̱, reve ili i na i ri ne ele suru a̱ da̱shi a̱bunda̱, 14 reve okolo a̱ ɗu e reme afalu. A̱vu yi icina na̱ A̱sulazuva A̱sula̱ a̱ ɗu za na uta̱a̱ nɗu e iɗa ya Masar e iɗa i tsugbashi. 15 U kuru ta̱ na̱ a̱ɗu na̱ a̱tsumona a gbain o wovon, iɗa yu u'yewu i babu mini, iɗa yi iyo i wuya na agashi. A̱vu u ca ɗu mini diga a aatali o ugbamu. 16 U ca ɗu ta̱ mana i lyuwa a̱tsumona, ili i na nkaya n ɗu koto n shi n revei shi, tsa̱ra̱ u ka̱ɗa̱to ɗu waru u lyungwa̱ ɗu, adama na̱ a̱ca̱pa̱ ili i wala ɗu mejege. 17 She i damma o okolo a̱ ɗu, <Tsugbain tsa̱ va̱ nu ucira wu ukere u va̱ u ɗa u ta̱wa̱a̱ numu nu utsuru u nda wan.> 18 Amma i cuwan na̱ A̱sulazuva A̱sula̱ a̱ ɗu, adama a na a̱yi ɗa u ca nɗu ukadu u na ya̱a̱ tsura̱ utsuru, adama u shiton akucunu a̱ yi a na u kucinayi nkaya n ɗu, cine u ri ana'an.

19 <<Nni yi icina na̱ A̱sulazuva A̱sula̱ a̱ ɗu, reve i kuru musula̱ n ro a̱vu i yuwaan le a̱ga̱nda̱ i ka̱ɗa̱ta̱wa̱ le, n to ronuso ɗu atsuvu ana'an na amayun o to kototo ɗu. 20 Tsu nɗa n na A̱sulazuva o kototoi elime a̱ ɗu, ne ɗa ya̱a̱ kuwa̱, adama a na i yuwain tsutoni na adanshi a̱ A̱sulazuva A̱sula̱ a̱ ɗu shi.>>