1 Nan ganu aza a na ele ɗa nan Levi, ugundo wa̱ Levi suru, a̱a̱ ushi akunda ko agadu e iɗa oɓolo na akapi a ama a Isra'ila shi. A ta lyuwa kucci na a̱a̱ ta̱wusa̱a̱ A̱sulazuva va akina, adama a na a̱yi ɗa agadu e le. 2 A̱a̱ tsura̱ agadu e iɗa oɓolo na akapi a ama a̱za̱ e le shi, A̱sulazuva a ɗa agadu e le cine u yuwaan nle nzuwulai.

3 Apa nda ili i na yoo o'wo agadu a nan ganu a̱tsuma̱ e ili i na ama aa casu kucci, ko nan ko kyon: uvatsu nu ugbaguzu ni iliya̱tsuma̱. 4 I ta ca le kucci vu ufaru vi ishina i ɗu, oɓolo na̱ masayan ma sa'avu ma̱ ina̱bi ma̱ ɗu, na̱ mani'in hali ne eleme e ikyon i ɗu aza a na a punai. 5 Adama a na A̱sulazuva A̱sula̱ a̱ ɗu a ɗangwa le ta̱ ɗe na̱ muwun n le a̱tsuma̱ o gundo suru e isawan a̱vu a yuwan a̱ga̱nda̱ a ala a̱ A̱sulazuva babu ukotu.

6 <<Na̱ vuma na ri Levi 'yon u lyawa lyuci ɗu uba̱ta̱ u na u ri na̱ nden ko te ɗa a̱tsuma̱ a Isra'ila, nu u ta̱wa̱ nu ucigu wa̱ yi uba̱ta̱ u na A̱sulazuva a ɗangwai, 7 u ta gura yuwan ulinga a̱tsuma̱ a ala a̱ A̱sulazuva A̱sula̱ a̱ yi cine a̱za̱ a̱ yi nan Levi a yuwusan a̱ga̱nda̱ ɗe a̱ ma̱ka̱ka̱n ma̱ A̱sulazuva. 8 U ta̱ tsura̱ akunda e ilyalya ya̱ yi una̱ta̱ na akapi a nan Levi, ko na u ushiyi ikebe a̱tsuma̱ a agadu e itana i na a̱za̱ o u'wa e le a winai.>>

9 <<A mantsa ma na i uwai a̱tsuma̱ e iɗa i na A̱sulazuva A̱sula̱ a̱ ɗu aa casu ɗu, she i toni ili yi idaba cine a̱za̱ e iɗa o ndolo aa yuwusan ɗe wan. 10 She a̱ tsura̱ ko vuma ta̱ na aa ca kucci vu ukula̱tosu vu ulobo ko usheli wa̱ yi a akina wan, ko u rito tsuboci ko yindi ko za vu ucuɗuwusa wa alavu ko za vu nkunu, 11 ko boci, ko za na a yuwusan ulinga no otoni a̱ lima̱, ko za na tsu zami urevu uba̱ta̱ wa̱ a̱kwa̱kwa̱. 12 Za na suru yuwain ili i ndolo wo o'wo ta̱ idaba e ekere a̱ A̱sulazuva, waru adama linga vi idaba i nda A̱sulazuva A̱sula̱ a̱ ɗu o to loso nɗa n ndolo elime a̱ ɗu. 13 Ni i ciga i 'yuwan yoo o'wo babu unusu a̱ ma̱ka̱ka̱n ma̱ A̱sulazuva A̱sula̱ a̱ ɗu.>>

14 Adama a na ama a nɗa n na yoo lo'o a ta zuwusaa a̱za̱ a̱ nkunu no ozo o tsuboci atsuvu, agba a̱ɗu A̱sulazuva A̱sula̱ a̱ ɗu a lyawa ɗu i yuwan ili i ndolo shi. 15 <<A̱sulazuva A̱sula̱ a̱ ɗu a̱ ta̱ 'ya̱sa̱a̱n ɗu vumava̱sula̱ a̱tsuma̱ a̱ a̱za̱ ɗu tsa̱ va̱, i zuwaa yi atsuvu.✝ 16 Adama a na ili i na i patiyi uba̱ta̱ wa̱ A̱sulazuva A̱sula̱ a̱ ɗu a ɗa ɗe Horeb o urana wi iɓolo'o ana i dammai, <She vu lyawa tsu da̱shi uwwa uɗyo wa̱ A̱sulazuva A̱sula̱ a̱ tsu wan, waru she tsu da̱shi ene akina a gbain a nda wan, na̱ ne ɗa shi tsu ta̱ kuwa̱i.>✝

17 <<Reve A̱sulazuva a damma mu, <Ili i na a dammai mejege ma ɗa le. 18 N ta̱ 'ya̱sa̱a̱n le vumava̱sula̱ tsa̱ wu a̱tsuma̱ a̱ a̱za̱ e le, n ta zuwa adanshi a̱ va̱ o una̱ wa̱ yi, a̱yi u ta damma le ili i na n zuwai suru. 19 Vuma na zuwai atsuvu a adanshi a na vumava̱sula̱'a̱ dammai a ala a̱ va̱ shi, a̱mu na aciya̱va̱ n ta ca yi a̱tsuma̱lima̱.✝ 20 Amma vumava̱sula̱ za na a yuwusan majiyan u ta yuwusan adanshi o una̱ u va̱ a dansa ili i na n zuwa niyi u damma shi, ko u yuwan adanshi na ala a̱ ma̱sula̱ mo ro, i ciga i 'yuwan yu una yi.>

21 <<I ta gura damma o okolo a̱ ɗu, <Cine tsa ɗa tsaa gura reve ikaka i na A̱sulazuva a ɗa a dammai shi?> 22 Ni ili i na vumava̱sula̱ dammai na ala a̱ A̱sulazuva a shiwan shi ko wo o'wo amayun shi, ili i ndolo uba̱ta̱ wa̱ A̱sulazuva a ɗa wu uta̱i shi. Vumava̱sula̱'a̱ u damma ta̱ majiyan ma̱ yi. She yu uwwa wovon wa̱ yi wan.>>