1 A̱vu Musa uta̱ u yuwaan aza a Isra'ila adanshi e ili i ndolo suru, 2 <<A̱mu gogo n ta̱ na a'wan ukpaku nu ushin (120), agba maa gura ɓa̱na̱ ɗu waru shi. A̱sulazuva a damma mu ta̱, <Vaa pasa Urudu shi.> 3 Agba A̱sulazuva A̱sula̱ a̱ ɗu a ta fara pasaa ɗu na aciya̱yi. U to kototo nɗa n na n ri elime a̱ ɗu, reve a̱ɗu yoo o'wo ni iɗa i le. Josuwa waru u ta uwaa ɗu elime u fara pasaa ɗu cine A̱sulazuva a dammai. 4 A̱sulazuva a ta yuwan ne ele cine u yuwain na̱ Sihon na̱ Og, ngono ma aza a Amoriya, aza na u kototoi oɓolo ni iɗa i le. 5 A̱sulazuva a ta ca ɗu ele e ekere a̱ ɗu, i reve gba i yuwan ta̱ ne ele ili i na n zuwa nɗu i yuwan ne ele. 6 I kapanu yi isawan nu ucira, she yi uwwa wovon ko yi da'wan adama e le wan, adama a na A̱sulazuva A̱sula̱ a̱ ɗu o to oɓolo na̱ a̱ɗu. Waa lyawa ɗu shi, waru waa vari ɗu shi.>>

7 Reve Musa ɗe Josuwa reve u damma yi a̱ ma̱ka̱ka̱n ma ama a Isra'ila suru, <<Vu kapanu vi isawan nu ucira, adama a na a̱vu ɗa vaa tara ama a nda a̱ tyo e iɗa i na A̱sulazuva a kucinai a na waa ca nkaya n le. A̱vu vu ne'esheen le iɗa'a adama wo o'wo agadu e le. 8 A̱sulazuva na aciya̱yi u ta uwa elime a̱ wu, waru u ta̱ da̱na̱ oɓolo na̱ a̱vu. Waa lyawa wu shi, waru waa vari wu shi. She vu uwwa wovon wan, waru she okolo a kuɗa wu wan.>>

9 Reve Musa ɗana wila̱ u nda a̱vu u ca nan ganu olobo a̱ Levi aza a na a tsu tanu Akpati a Nzuwulai a̱ A̱sulazuva oɓolo na̱ mbara ma aza a Isra'ila biti. 10 Reve Musa damma le, <<O ukosu wa a'wan e cindere suru, a mantsa ma na za uwai adama a̱ mona mo utan, a mantsa ma̱ A̱buki o Ogodo o Ucuwusan, 11 mantsa ma na aza a Isra'ila suru o tsu ɓoloto a̱ ma̱ka̱ka̱n ma̱ A̱sulazuva A̱sula̱ a̱ ɗu uba̱ta̱ u na waa ɗangwa, a̱vu e ɗenuna̱ wila̱ u nda a atsuvu e le. 12 I ɓoloto ama'a, ali na̱ a̱ma̱ci na̱ muwun hali no omocin a na a̱ ri nden e ilyuci i ɗu, adama a uwwa reve o rito cine a uwwa wovon wa̱ A̱sulazuva A̱sula̱ a̱ ɗu, a̱vu a̱ kuru idanshi i wila̱ i nda suru ulobonu. 13 Reve muwun n le n na koto n revei wila̱ u nda shi a uwwa yi reve o rito cine aa uwwa wovon wa̱ A̱sulazuva A̱sula̱ a̱ ɗu mantsa ma n i ri nden e iɗa i na yaa pasa mavada ma̱ Urudu wo o'wo za ɗu.>>

14 Reve A̱sulazuva a damma Musa, <<Uwwa nda, mantsa mo ukwisa̱ ma̱ wu ma yuwan ta̱ zuzu. Vu ɗe Josuwa reve i ta̱wa̱ o Oogodo o Uga'asusan, uba̱ta̱ u na maa ca yi ucira u tsugbain.>> Ɗaɗa Musa na̱ Josuwa a̱ 'ya̱wa̱i na aciyele o Oogodo o Uga'asusan.

15 Reve A̱sulazuva a̱ ta̱wa̱ o Oogodo o Uga'asusan a̱tsuma̱ o oɓolo e eleshe. Reve eleshe'e e isawan o una̱ntsu wo Oogodoꞌo. 16 Reve A̱sulazuva a damma Musa, <<Uwwa nda, vu ta̱ kuwa̱ vu cina nkaya ma̱ wu, waru a jima shi ama a nda a̱ ta̱ 'yon a yuwan tsushakala na̱ musula̱ mo omocin mi iɗa i na aa uwa. Reve a lyawa mu a kuɗa akucunu a na n yuwain ne ele. 17 Reve upan u va̱ u suɗuwa a aci e le o urana u ndolo. Reve n lyawa le, a̱vu n sokoo le urewesu u va̱, reve o kototo le. Meleshe ma̱ a̱bunda̱ na addama a̱ ta̱ reme le. O urana u ndolo e te ece, <Meleshe ma nda ma̱ cipa̱a̱ tsu ta̱ o una̱ u na A̱sulazuva a̱ ri e memere ma̱ tsu shi?> 18 O urana u ndolo na amayun n to soko urewesu u va̱ adama e iwuya i na a yuwain suru, a na a vadalai a̱ kuruyi musula̱ n ro.

19 <<Gogo nda vu ɗana ishipa i nda adama a̱ ɗu, a̱vu vu rito aza a Isra'ila a̱yi. Vu zuwa le a cana yi adama wo o'wo mu urotsu e ekere a aza a Isra'ila. 20 Adama a na na̱ n ta̱wa̱ ne ele e iɗa i na yee yenishe maani ni ishiki, za na n yuwain nzuwulai n na maa ca nkaya n le, reve na a lyuwa a̱ cuwa̱n a yuwan mgbain, a ta vadala a̱ tyo a̱ musula̱ n ro a̱vu a yuwaan le a̱ga̱nda̱, a 'yuwan mu. A̱vu a kuɗa akucunu a̱ va̱. 21 Reve a mantsa ma na meleshe ma̱ a̱bunda̱ na̱ a̱tsuma̱lima̱ a cina nle, ishipa i nda i ta yuwan adanshi a aci e le, adama a na limatan le ve icina na̱ a̱yi shi. N reve ta̱ ifoɓi yi ili i na aa gura yuwan, ko kafu n ta̱wa̱ ne ele e iɗa i na n yuwaan nle zuwulai.>> 22 Ɗaɗa Musa ɗanai ishipa'a o urana u ndolo reve u roco aza a Isra'ila a̱yi.

23 Reve A̱sulazuva a damma Josuwa ulobo wa̱ Nun, <<Vu kapanu vi isawan nu ucira, adama a na vu ta̱ tara aza a Isra'ila a uwa e iɗa i na n yuwain nzuwulai n na maa ca le. Waru a̱mu na aciya̱va̱ n ta̱ da̱na̱ oɓolo na̱ a̱vu.>>

24 Ana Musa ɗanai idanshi i wila̱ i nda aa aatagada kpa̱ra̱, 25 reve u ca nan Levi aza a na a tsu tanu Akpati a Nzuwulai a̱ A̱sulazuva wila̱ u nda, 26 <<I tara Aatagada a̱ Wila̱ a nda reve i zuwa yi e eɓele a Akpati a Nzuwulai a̱ A̱sulazuva A̱sula̱ a̱ ɗu, tsura̱ wo o'wo lo tsu urotsu a aci a̱ ɗu. 27 Adama a na n reve ta̱ cine i ri nu u'ya̱susa̱n wa aci na aciyogbamu. Uwwai nda, ko gogo a na m buwai wuma oɓolo na̱ a̱ɗu i ta̱ 'ya̱susa̱a̱n A̱sulazuva aci. Cine woo o'wo na̱ n kuwa̱! 28 Ɓolotowo numu mbara mu gundo ɗu suru na azagbain a̱ ɗu suru, tsura̱ n yuwan adanshi a nda a atsuvu e le. Reve n ɗe zuva ni iɗa yo o'wo urotsu a aci e le. 29 Adama a na n reve ta̱ na̱ n kuwa̱, ili i ro yi lo shi i ta yuwan ili yi idaba, a̱vu i ɓatsa i lyawa ure u na n zuwa nɗu. A̱vu a rana ve elime meleshe ma cina ɗu, adama a na i ta yuwan ili i vama e ekere a̱ A̱sulazuva. Reve i zuwa yi u yuwan upan adama o ulinga we ekere a̱ ɗu.>>

30 Reve Musa ɗe idanshi yi ishipa i nda diga o ufaru a̱ tyo o ukosu a atsuvu e iɓolo ya aza a Isra'ila suru.