1 <<Uwwai gogo a̱ɗu aza a Isra'ila, ili i na a zuwai na̱ wila̱ u na ma zama n roco ɗu. I kuru le adama i da̱nu wuma, reve waru i uwa pe i usa iɗa i na A̱sulazuva, A̱sula̱ a nkaya n ɗu aa casu ɗu wo o'wo za ɗu. 2 She i jebe ko i da̱shi e ili i na n damma nɗu wan. Amma i kuru wila̱ wa̱ A̱sulazuva A̱sula̱ a̱ ɗu a na maa casu ɗu.

3 <<Ye ene ta̱ ne esu a̱ ɗu ili i na A̱sulazuva a yuwain a Ba'al Peyo. A̱sulazuva A̱sula̱ a̱ ɗu o kototo ta̱ za na suru kuruyi a̱ma̱li a Ba'al va Peyo a̱tsuma̱ a̱ ɗu. 4 Amma akapi a̱ ɗu suru a na i guza̱i A̱sulazuva A̱sula̱ a̱ ɗu ulobonu i ta̱ wuma hali na ana'an. 5 Uwwai nda, n rito ɗu ta̱ ili i na a zuwai na̱ wila̱ mejege cine A̱sulazuva A̱sula̱ a̱ va̱ a zuwa numu n yuwan, adama i kuru le a̱tsuma̱ e iɗa i na yaa zama i uwa i tara wo o'wo za ɗu. 6 I kuru le waru i yuwan le, adama a na o to o'wo ɗu uguru nu urevu e ekere a akapi a nɗa, aza a na aa uwwa adama e ili i nda reve a damma, <Amayun ele nda ama a gbain a ɗa a̱za̱ o uguru nu urevu.> 7 Adama a na babu iɗa i gbain i ro i na i ri na̱ ma̱sula̱ zuzu na̱ a̱yi cine A̱sulazuva A̱sula̱ a̱ tsu a̱ ri zuzu na̱ a̱tsu mantsa ma na tsu ɗe niyi suru. 8 Waru babu iɗa i na i ri lo mgbain na wa̱a̱ tsura̱ ili i na aa yuwan na̱ wila̱ wa̱ a̱ɓula̱ tsa za na maa zuwusa a̱ ma̱ka̱ka̱n ma̱ ɗu ana'an.

9 <<I yuwan ugbozu, i goloɓo aciya̱ɗu ulobonu ta̱wa̱ yi icina ni ili i na ye enei ne esu a̱ ɗu wan, waru adama o uta̱ o okolo a̱ ɗu a mantsa ma wuma u ɗu wan. I rito muwun n ɗu ele na̱ muwun n tsukaya n ɗu. 10 I cuwan cine yi isawain a̱ ma̱ka̱ka̱n ma̱ A̱sulazuva A̱sula̱ a̱ ɗu a Horeb, ana u damma numu,<Ɓolotowo mu ama adama a uwwa adanshi a̱ va̱, adama o rito cine a uwwa wovon u va̱ a̱tsuma̱ a̱ nden n le a̱tsuma̱ e iɗa'a. Reve adama waru o rito muwun n le.> 11 Reve i ta̱wa̱ zuzu yi isawan e ikyun i masasan, a̱yi a madala na akina a gawusan zuva, ne eleshe a̱ lima̱ da̱n ni irumbu pici. 12 Reve A̱sulazuva a yuwan adanshi na̱ a̱ɗu diga a̱tsuma̱ a akina'a. Yu uwwa ta̱ uɗyo a adanshi amma ye ene oroci e ili i ro shi, uɗyo u ɗa goon yu uwwai. 13 Reve u revetyo ɗu akucunu a̱ yi, wila̱ kupa a na u zuwa nɗu i kuru'u. Reve u ɗana le a aɓaci a atali e re. 14 Reve a mantsa'a A̱sulazuva a zuwa mu n rito ɗu ili i na aa yuwan na̱ wila̱ u na ya̱a̱ kuru e iɗa i na yaa pasa Urudu adama wo o'wo za ɗu.>>

15 <<Ye ene oroci e ili i ro shi o urana u na A̱sulazuva a yuwain adanshi na̱ a̱ɗu a Horeb diga a̱tsuma̱ a akina. Adama o ndolo i goloɓo aciya̱ɗu ulobonu. 16 Adama i lungusa̱ aciya̱ɗu i yuwaan aciya̱ɗu a̱ma̱li wan, uruma wi ili i ro, ko oroci a vali ko za vu ka wan, 17 ko oroci a nama ro a̱tsuma̱ o uvaɗi, ko oroci a manunu ma tsu'yan zuva, 18 ko oroci e ili i wuma i na i tsu ka̱ta̱pa̱ e iɗa, ko oroci a magula za̱la̱ mini. 19 Waru she i 'ya̱sa̱n esu zuva i ka̱lyuwa̱ reve na̱ ye ene urana na̱ woto ni italyo'o, no oɓolo e ili i na a yuwain zuva suru, a̱vu o rono ugbozu u ɗu hali i ka̱ɗa̱to i yuwaan le a̱ga̱nda̱ wan. Ili i nda suru A̱sulazuva A̱sula̱ a̱ ɗu a zuwa le ta̱ e iɗa uba̱ta̱ wa ama suru a̱tsuma̱ o uvaɗi. 20 Amma a̱ɗu A̱sulazuva a tara ɗu ta̱ reve wu uta̱a̱ ɗu diga a̱tsuma̱ a akina o usuɗuwu, diga e iɗa ya Masar, adama yo o'wo ama a̱ yi la̱nga̱ cine i ri gogo.

21 <<A̱sulazuva a yuwan ta̱ upan na̱ a̱mu adama a̱ ɗu. Reve u kucina a na maa pasa mavada ma̱ Urudu n uwa e iɗa i sa'ani i na A̱sulazuva A̱sula̱ a̱ ɗu a casu ɗu wo o'wo agadu a̱ ɗu shi. 22 N ta̱ kuwa̱ e iɗa i nda maa pasa Urudu shi. Amma a̱ɗu i ta mapasaa mavada i usa iɗa i sa'ani i ndolo woo o'wo za ɗu. 23 I yuwan ugbozu, she yi icina akucunu a̱ A̱sulazuva A̱sula̱ a̱ ɗu a na u yuwain na̱ a̱ɗu wan. She i yuwaan aciya̱ɗu a̱ma̱li oroci e ili i ro na A̱sulazuva A̱sula̱ a̱ ɗu a putsa nɗu wan. 24 Adama a na A̱sulazuva A̱sula̱ a̱ ɗu akina a na a tsu lyuwa a ɗa, A̱sula̱ a̱ tsushu'un a ɗa.✝

25 <<Nni i ta̱wa̱ i tsura̱ muwun na̱ muwun n tsukaya, a̱vu i jima na̱ nden e iɗa'a, na̱ yo o'woto aciya̱ɗu idaba i yuwan a̱ma̱li oroci e ili i ro, i yuwan iwuya e ekere a̱ A̱sulazuva A̱sula̱ a̱ ɗu i zuwa yi u yuwan upan, 26 ana'an nda n ɗe ta̱ zuva ni iɗa o o'wo esu a̱ va̱ a aci a̱ ɗu, a na ya̱a̱ kuwa̱ babu usa̱n a̱tsuma̱ e iɗa i na yaa pasa Urudu a̱ tyo ɗe wo o'wo za ɗu. Yaa jima ɗe na̱ nden shi amma ili i ro yi lo shi o to kototo ɗu. 27 Reve A̱sulazuva e bete'we ɗu a̱tsuma̱ a ama, waru ama wa'a ɗa aa pasa a̱tsuma̱ a̱ ɗu a̱tsuma̱ a nɗa n na A̱sulazuva e bete'we ɗu a̱ tyo. 28 Ɗe ɗa yaa yuwaan musula̱ n na ama a yuwain vu ɗanga na atali a̱ga̱nda̱, aza a na e tse ene shi, a tsu uwwa shi ko a lyuwa ko gba a̱ i'yuwa̱n shi. 29 Amma diga ɗe nni i zami A̱sulazuva A̱sula̱ a̱ ɗu, i ta̱ tsura̱ yi nni i bunga̱ yi no okolo a̱ ɗu suru suru na asuvu a̱ ɗu suru. 30 A mantsa ma na i ri a̱tsuma̱ a̱ a̱tsuma̱lima̱ ni ili i nda suru i cina ɗu, reve na̱ a̱ca̱pa̱ i ka̱mba̱ uba̱ta̱ wa̱ A̱sulazuva A̱sula̱ a̱ ɗu a̱vu i yuwaan yi tsutoni. 31 Adama a na A̱sulazuva A̱sula̱ a̱ ɗu A̱sula̱ e isa'ani a ɗa. Waa vari ɗu ko u kototo ɗu ko wi icina na akucunu a̱ yi na̱ nkaya n ɗu, za na u kucinaa nle shi.>>

32 <<Ecei gogo adama a rana va̱ a̱ca̱pa̱, ɗe nu ujumu kafu mantsa ma̱ ɗu, diga mantsa ma na A̱sula̱ a yuwain vaɗilima̱ o uvaɗi, reve ye ece diga o utyo wa zuva u ro a̱ tyo a za ndeɗe. Ili i gbain i ro tsa nda tsa fara ta̱ ɗe, ko a uwwa ta̱ ɗe alabari a̱ cu'un va̱ yi? 33 Ama o ro a̱ ta̱ lo a na a uwwai ɗe uɗyo u ma̱sula̱ a adanshi diga a akina, cine yu uwwai reve a buwa wuma? 34 Ko ma̱sula̱ mo ro ma yuwan ta̱ mpolo n na waa taraa aciya̱yi iɗa diga a̱tsuma̱ e memere me iɗa i ro, na̱ ma̱lyungwa̱ na̱ linga va asalama nu uvon, nu ukere wu ucira, waru ni ili gbain i wovon, suru cine A̱sulazuva A̱sula̱ a̱ ɗu a yuwaan nɗu a̱tsuma̱ a Masar e esu a̱ ɗu?

35 <<O roco ɗu ta̱ ili i nda adama i reve a na A̱sulazuva a̱yi ɗa A̱sula̱, babu na̱ a̱yi za ro lo shi. 36 Diga zuva u zuwa ɗu ta̱ yu uwwa uɗyo wa̱ yi adama u ɓara ɗu. O uvaɗi u roco ɗu ta̱ akina a gbain, reve yu uwwa uɗyo wa̱ yi a̱tsuma̱ a akina'a. 37 Adama a na u cigai nkaya n ɗu, a̱vu u ɗangwa muwun n tsukaya n le ma̱ a̱ca̱pa̱. Wu uta̱a̱ ɗu ta̱ e iɗa ya Masar nu ucira u gbain wa̱ yi. 38 U gba̱ra̱ ta̱ nɗa n na n la'a nɗu mgbain nu ucira elime a̱ ɗu, waru adama u ta̱wa̱ na̱ a̱ɗu a̱tsuma̱ e iɗa i le u ca ɗu ele o o'wo agadu a̱ ɗu, cine u ri ana'an.

39 <<Adama o ndolo i reve a̱vu i zuwa o okolo a̱ ɗu ana'an a na A̱sulazuva a̱yi ɗa A̱sula̱ ɗe zuva na̱ pa o uvaɗi. Za ro lo shi. 40 I kuru ure wa̱ yi ni ili i na u zuwai, aza a na maa casu ɗu ana'an, adama i da̱nu lafiya na̱ a̱ɗu na̱ muwun n ɗu ma̱ a̱ca̱pa̱. Waru adama i jima e iɗa i na A̱sulazuva A̱sula̱ a̱ ɗu aa casu ɗu hali hali hali.>>

41 <<Reve Musa tawa ilyuci i gbagbain i ta'atsu upasu wa asana o Uɗolu wa̱ Urudu, 42 uba̱ta̱ u na za na suru unai vuma a suma a̱ tyo, nna̱ wu una ta̱ vuma babu ucigu wa̱ yi waru a̱ ri a̱ n'yuwunlai ɗe a̱ca̱pa̱ shi. U ta gura suma a̱ tyo a̱ lyuci ta̱ va aza a nda'a, u wawa wuma wa̱ yi. 43 Ilyuci'i ele ɗa: Beza a̱tsumona upasu wa agaɗi vu ugundo wa̱ Roben, na̱ Ramot a̱tsuma̱ a Giliyadu, vu ugundo wa Gadu, na̱ Golan a̱tsuma̱ a Bashan vu ugundo wa Manase.>>

44 A̱yi nda a̱yi ɗa wila̱ u na Musa cayi aza a Isra'ila. 45 Ele nda ele ɗa ure ni ili i na a̱a̱ kuru na̱ wila̱ u na Musa dammai aza a Isra'ila a mantsa ma na o uta̱i Masar, 46 ele o uka̱ri u na u ri a̱ nka̱la̱la̱i na̱ Bet Peyo asana a̱ Urudu, e iɗa ya Sihon mogono ma aza a Amoriya za na yuwain tsugono a Heshibon za na Musa na aza a Isra'ila a lyuwai nu uvon cina o uta̱ diga Masar. 47 Reve o o'woto iɗa ya̱ yi za le ni iɗa yo Og mogono ma Bashan, ngono n re ma aza a Amoriya mu upasu wa asana a̱ Urudu. 48 Iɗa'a u reme ta̱ diga Arowa za na ri a̱ nge'en mu Uɗolu wa Anon a̱ tyo Masasan ma Siriyon, *za na a̱yi ɗa Hamon. 49 Reve u ɓolo nu upasu wa Araba suru asana a̱ Urudu, diga a Mala ma Araba, za̱la̱ vu uzuru wa agaɗi a Pisiga.