1 A mantsa ma na A̱sulazuva A̱sula̱ a̱ ɗu a rawato nɗu e iɗa i na yaa zama i uwa yoo o'woto yi za ɗu, u ta̱ gba̱ra̱ nɗa ma̱ a̱bunda̱ a̱ ma̱ka̱ka̱n ma̱ ɗu, aza a Hitiya na aza a Girigashiya na aza a Amoriya na aza a Ka'ana na aza a Periziya na aza a Hiviya na aza a Jebusiya, nɗa n cindere n na n la'a nɗu a̱bunda̱ nu ucira, 2 reve nna̱ A̱sulazuva a ca ɗu ele, a̱vu i lyuwa le, ni i ciga i 'yuwan i kototo le suru suru. She i yuwan nzuwulai ne ele ko ye ene iliyali i le wan. 3 She i zuwulai ne ele wan. She i ca esheli a̱ ɗu olobo le wan, ko i taraa olobo a̱ ɗu esheli e le wan. 4 Adama a na a ta vadala muwun n ɗu a lyawa itoni i va̱, reve a yuwaan musula̱ n ro tsugbashi. Reve gba upan wa̱ A̱sulazuva u puna̱ a aci a̱ ɗu, reve u kototoshi nɗu. 5 Agba apa nda ili i na yaa yuwan ne ele: yi ɓoso musa'a n le, reve yi ɓoso atali a̱ a̱ga̱nda̱ e le, yi gasa a̱shuwutsu a nan Ashera e le. Reve i kula̱to a̱ma̱li e le na akina. 6 Adama a na a̱ɗu ama a na a tawai na akiza a̱ A̱sulazuva A̱sula̱ a̱ ɗu a ɗa. A̱sulazuva A̱sula̱ a̱ ɗu a ɗangwa ɗu ta̱ diga a̱tsuma̱ a ama o uvaɗi suru, yo o'wo ama a̱ yi la̱nga̱.

7 <<A̱sulazuva a ciga ɗu a̱vu u ɗangwa ɗu adama a na i la'ai akapi a ama a̱ a̱bunda̱ shi, adama a na a̱ɗu ɗa i la'ai uka̱la̱mu a̱tsuma̱ a ama suru. 8 Amma adama a na A̱sulazuva a ciga nɗu ɗa, reve waru u shiton nzuwulai n na u kucinayi nkaya n ɗu, ɗaɗa wu uta̱a̱ nɗu nu ukere wu ucira. A̱vu u tsupaa ɗu e iɗa i tsugbashi, diga o ukere wa Firi'awuna mogono ma Masar. 9 Adama o ndolo i reve a na A̱sulazuva A̱sula̱ a̱ ɗu a̱yi ɗa A̱sula̱. A̱sula̱ a̱ a̱ɓula̱ a ɗa, o shitosun akucunu e icigi ya̱ yi hali a̱ tyo mantsa ukpakukupa kupa wa aza a na a ciga niyi waru a̱a̱ kurusu ili i na u zuwai. 10 Amma,

<<Aza a na a 'yuwan niyi u tsu tsupa le ta̱ a alanga eteshe, u kototo le.

U tsu lungusa̱ mantsa ma na waa tsupa aza a na a 'yuwan niyi shi.

11 Adama o ndolo i ka̱mbuwa̱ ugbozu i kuru ili i na a zuwai ni ili i na a̱a̱ kuru na̱ wila̱ u na maa casu ɗu ana'an.

12 <<Nni i ka̱mbuwa̱ ugbozu a̱ wila̱ u nda, reve i kuru le ulobonu, A̱sulazuva A̱sula̱ a̱ ɗu o to shiton akucunu e icigi ya̱ yi a̱ tyo ya̱'a̱ ɗu, cine u kucinayi nkaya n ɗu. 13 U ta ciga ɗu, u zuwaa ɗu aba'un, a̱vu u da̱shi ɗu a̱bunda̱. Waru u ta zuwaa muwun n ɗu aba'un oɓolo ni ili yi cimba i ɗu, ishina i ɗu na̱ masayan ma sa'avu ma̱ ɗu na̱ mani'in ma̱ ɗu na̱ mudindim mo oɓolo e inan i ɗu na̱ mukyokyon n ɗu, a̱tsuma̱ e iɗa i na u kucinayi nkaya n ɗu u ta ca ɗu. 14 I to o'wo aza a aba'un a na a la'ai ama suru. Ko vuma ta̱ a̱tsuma̱ a̱ ɗu ka ko vali oo o'wo idari shi, ko a̱tsuma̱ e iliyamunga i ɗu. 15 A̱sulazuva a ta yuwaan ɗu mapari na̱ cu'un vu mɓa̱la̱ suru. Wa̱a̱ tsuwa̱n ɗu mɓa̱la̱ n wuya n na i revei a̱tsuma̱ a Masar shi. Amma u ta̱ tsuwa̱a̱n aza a na a 'yuwan ɗu ele. 16 I kototo ama a na A̱sulazuva A̱sula̱ a̱ ɗu aa ca ɗu e ekere a̱ ɗu suru. She ye ene iliyali i le wan, waru she i yuwaan musula̱ n le a̱ga̱nda̱ wan, adama a na u to o'wo ɗu maza.

17 <<I ta gura jiyan o okolo a̱ ɗu, <Ama a nda a la'a tsu ta̱ a̱bunda̱. Cine tsa ɗa tsaa gura gba̱ra̱ le?> 18 Agba she yu uwwa wovon u le wan, cuwain ni ili i na A̱sulazuva A̱sula̱ a̱ ɗu a yuwain na̱ Firi'awuna na̱ Masar suru. 19 Ye ene ta̱ ne esu a̱ ɗu mɓa̱la̱ m gbagbain ni iroci ni ili ya asalama, nu ukere wu ucira, za na A̱sulazuva A̱sula̱ a̱ ɗu o uta̱a̱ nɗu. Ne ɗa A̱sulazuva A̱sula̱ a̱ ɗu aa yuwan na ama a na yaa uwwusa wovon u le gogo. 20 Waru A̱sulazuva A̱sula̱ a̱ ɗu a̱ ta̱ lyungu ni ili i wovon, hali she na aza a na a la'ai a pa'atoyin aciyele e ekere a̱ ɗu a̱ kuwa̱. 21 She yu uwwa wovon u le wan, adama a na A̱sulazuva A̱sula̱ a̱ ɗu a̱ ta̱ e memere ma̱ ɗu u ta̱ na̱ tsugbain, a̱yi ɗa yaa uwwa wovon. 22 A̱sulazuva A̱sula̱ a̱ ɗu a̱ ta̱ gba̱ra̱ nɗa n nda elime a̱ ɗu ben ben. She i kototo le nu uta̱ wan, adama inama yu una i bala a yuwan ɗu a̱bunda̱ a damaton ɗu wan. 23 Amma A̱sulazuva A̱sula̱ a̱ ɗu a ta ca ɗu ele, a̱vu u zuwa ugbozu u le u ja̱mba̱ra̱ hali she no o kototo le. 24 Waru u ta ca ɗu ngono n le e ekere a̱ ɗu, a̱vu i tasa ala ele a̱tsuma̱ o uvaɗi. Ko vuma aa gura isawan a̱ ma̱ka̱ka̱n ma̱ ɗu shi, i to kototo le. 25 Reve i kula̱to musula̱ n le na akina. She i ka̱mbuwa̱ ugbozu u ɗu a azurufa na̱ zinariya na a̱ ri ne ele wan. She i tara le adama a aciya̱ɗu wan, adama o o'wo ɗu maza wan, adama a na ili yi idaba i ɗa e ekere a̱ A̱sulazuva A̱sula̱ a̱ ɗu. 26 She i ta̱wa̱ ni ili yi idaba a 'wa ɗu wan, adama yo o'wo ili i na a tawai adama o ukototosu tse le wan. I 'yuwan yi ye ene idaba ya̱ yi, adama a na a tawa le ta̱ adama o ukototosu.>>