1 <<A mantsa ma na ama e re a yuwain mawasan, a ta tara adanshi'i a̱ 'ya̱wa̱ o ukobu wu uge'etosu, reve a̱za̱ o uge'etosu e ge'eto adanshi'i, a ca za na ri mejege mejege, za vu unusu waru a ca yi unusu. 2 Na̱ wu ntsaa ta̱ a faba za vu unusu, za vu uge'etosu ta zuwa yi u von, reve u zuwa a faba yi a̱ ma̱ka̱ka̱n ma̱ yi a̱bunda̱ a wufabu u na unusu wa̱ yi wu ntsayi. 3 A ta faba yi amunga agba she u la'a ne wan. Na a faba yi a na u la'ai amunga, za va̱ wu to o'wo ili yi izo'oshi e esu a̱ ɗu.

4 <<She vu ɓa̱ru nan vi iluma una̱ a mantsa ma na waa dasasa ishina a faba wan.✝

5 <<Na̱ muwun ma̱ a̱na̱wun n ri nden oɓolo reve za ta̱ kuwa̱ babu mawun, she ma̱runa̱ ma̱ yi mo olo a alanga wan. Mawun ma̱ a̱na̱wun ma vali va̱ yi mo sotso yi adama u yuwaan yi ili i na yi ntsayi mawun ma̱ a̱na̱wun ma vali'i ma yuwan.✝ 6 Mawun mo ulobo mo ufaru ma na waa matsan a ta ca yi ala a za na kuwa̱i'i, adama e icina na ala a̱ yi a̱tsuma̱ a Isra'ila wan.

7 <<Amma na̱ vuma ciga u sotso ka mawun ma̱ a̱na̱wun ma̱ yi shi, ka'a u ta̱ 'ya̱wa̱ uba̱ta̱ wu mbara o una̱ntsu u lyuci reve u damma, <Mawun ma̱ a̱na̱wun ma vali va̱ ma 'yuwan ta̱ a lyuwato ala a mawun ma̱ a̱na̱wun ma̱ yi elime a̱tsuma̱ a Isra'ila. U 'yuwan ta̱ a yuwan ili i na yi ntsayi mawun ma̱ a̱na̱wun ma vali ma yuwan a̱ tyo uba̱ta̱ u va̱.> 8 A̱vu mbara n lyuci'i e ɗe yi a yuwan adanshi na̱ a̱yi. Agba nu usu shi a̱vu u damma, <N ciga n sotso yi shi.> 9 Reve ma̱runa̱ ma mawun ma̱ a̱na̱wun ma̱ yi'i u 'ya̱wa̱ ya̱'a̱ yi a̱ ma̱ka̱ka̱n ma mbara'a, a̱vu u foɗo yi atan a̱ ta̱, a̱vu tsuwa̱a̱n yi ma̱tsa̱n o urewesu, a̱vu u damma, <Ne ɗa a tsu yuwan na̱ vali na 'yuwain a lyuwato u'wa u mawun ma̱ a̱na̱wun ma̱ yi elime.> 10 A̱tsuma̱ a Isra'ila e te reve nu u'wa u vuma'a a na, <U'wa wu Za na o foɗoi Atan.>

11 <<Nna ama e re a̱ ri a̱ nla̱ngi, reve ka vu za ta̱ ta̱wa̱ adama a na waa kamba vali va̱ yi e ekere a za na a lapusa yi, a̱vu u canana ukere wa̱ yi a̱vu u reme yi tsali tsa̱ yi, 12 i koɗo yi ukere'e. She ye ene iliyali ya̱ yi wan.

13 <<She vu da̱na̱ na̱ nkundatsu mi ili yu ume n re koko'o a̱tsuma̱ a̱ tsa̱n va̱ wu wan, za gbain na̱ za ke'en wan. 14 She vu da̱na̱ na̱ nkundatsu n re koko'o a̱tsuma̱ o u'wa wa̱ wu za gbain na̱ za ke'en wan. 15 Vu da̱na̱ na̱ nkundatsu mi ili yu mu ume na̱ nkundatsu n na mu ntsayi n sa'ani, adama wuma wa̱ wu u jima a̱tsuma̱ e iɗa i na A̱sulazuva A̱sula̱ a̱ wu aa casu ɗu. 16 Adama a na A̱sulazuva A̱sula̱ a̱ ɗu e te inda idaba yi za na aa yuwusan ili i nda, za na suru aa yuwusan ili i na i ri mejege shi.

17 <<Cuwain ni ili i na aza a Amaleka a yuwain na̱ a̱ɗu o ure mantsa ma na yu uta̱i a̱tsuma̱ Masar. 18 Mantsa ma na i kuna̱i a̱vu i ta̱ka̱lyuwa̱, reve a vawan ɗu o ure a̱vu una aza a na suru a̱ kuna̱i a̱ ri a̱ca̱pa̱. Agba a uwwa wovon wa̱ A̱sula̱ shi. 19 A mantsa ma na A̱sulazuva A̱sula̱ a̱ ɗu a ca nɗu wivuwun e ekere a n'yuwatan n na n ri uka̱nda̱ruwu na̱ a̱ɗu suru a̱tsuma̱ e iɗa i na waa casu ɗu wo o'wo za ɗu, i tasa ala a aza a Amaleka a̱tsuma̱ o uvaɗi. She yi icina wan!>>