1 Ama a Ifiramu o ɓoloto ta̱ ali o uvon e le uba̱ta̱ u ta̱. A̱vu a pasa a̱ tyo Zafon, a̱vu a damma Japuta, <<Adama a̱ nye vu 'ya̱wa̱i vu yuwain uvon na aza a Amon agba vu banu tsu shi? To, tsu ta̱ kula̱to wu oɓolo nu u'wa wa̱ wu.>>

2 Ɗaɗa Japuta damma nle, <<A̱mu oɓolo na ama a̱ va̱ tsu tsura̱ ta̱ mawasan ma̱ a̱bunda̱ na aza a Amon, waru ana n ɗe nɗu, i ta̱wa̱ i wawa mu e ekere e le shi. 3 Ana waru me enei yaa wawa mu shi, ɗaɗa n cayi wuma u va̱ reve m pasa adama n 'ya̱wa̱ n yuwan uvon na aza a Amon, a̱vu gba A̱sulazuva a ca mu ele e ekere a̱ va̱. Gogo adama a̱ nye a ɗa i pasai ana'an a̱ ta̱wa̱ adama i yuwan uvon na̱ a̱mu?>>

4 A̱vu Japuta ɓoloto ali a Giliyadu suru, reve a yuwan uvon na aza a Ifiramu. Ɗaɗa gba ali a Giliyadu o kototoi Ifiramu, adama a na a dammai, <<A̱ɗu a̱za̱ a Giliyadu aza e izami yu upa'atan u ɗa e memere ma Ifiramu na aza a Manase.>> 5 A̱vu aza a Giliyadu a usa upasata o Uɗolu wa̱ Urudu a̱ tyo Ifiramu. Mantsa ma na vuma va Ifiramu ro na la'ai dammai, <<Lyawa m pasa,>> reve aza a Giliyadu e ece yi, <<A̱vu za va Ifiramu ɗa?>> Nu u usu, <<O'o,>> 6 a̱vu a damma yi, <<To damma <Shibole.> >> Nu u damma <<Sibole,>> adama a na waa gura ɗe adanshi'i ulobonu shi, a̱vu e reme yi o una yi o upasata wu Uɗolu wa̱ Urudu. A mantsa mo ndolo ma ɗa o unai ama ukpakukupa amunga nu ukpakukupa ure (42,000) wa aza a Ifiramu.

7 Japuta yuwan ta̱ tsugbain tsa aza a Isra'ila a'wan a̱ ta̱li. Ɗaɗa Japuta za va Giliyadu kuwa̱i, reve a̱ ciɗo yi a̱ lyuci ro va̱ Giliyadu.

8 A̱ca̱pa̱ a Japuta, Ibuzan za va Batalami yuwan ta̱ tsugbain tsa aza a Isra'ila. 9 U da̱na̱ ta̱ no olobo mata'atsu, esheli mata'atsu. A̱vu u ca esheli a̱ yi uba̱ta̱ wa aza a na a̱ ri o umatsun wa̱ yi shi lolo. A̱vu a̱ ta̱wa̱ ne esheli mata'atsu aza a na a̱ ri o umatsun wa̱ yi shi adama o olobo a̱ yi. Ibuzan yuwan ta̱ tsugbain tsa aza a Isra'ila a'wan e cindere. 10 A̱vu Ibuzan kuwa̱ a̱vu a̱ ciɗo yi Batalami.

11 A̱ca̱pa̱ a̱ Ibuzan, reve Elon vuma va Zebulun yuwan tsugbain tsa Isra'ila a'wan kupa. 12 Reve Elon kuwa̱, ɗaɗa a̱ ciɗo niyi ɗe Ajalo e iɗa ya Zebulun.

13 A̱ca̱pa̱ a̱ yi, a̱vu Abudon ulobo wa Hilele, vuma va Piraton, yuwan tsugbain tsa aza a Isra'ila. 14 U da̱na̱ ta̱ no olobo amunga na̱ muwun n tsukaya mata'atsu, aza a na a kumbusai o nloli kupocindere. U yuwan ta̱ tsugbain tsa aza a Isra'ila a'wan kunla̱. 15 Reve Abudon ulobo wa Hilele vuma va Piraton kuwa̱, reve a̱ ciɗo yi ɗe Piraton e iɗa ya̱ Ifiramu e iɗa ya agaɗi ya aza a Amaleka.