1 Reve aza a Isra'ila a yuwisan ili i iwuya a̱ ma̱ka̱ka̱n ma̱ A̱sulazuva, a̱vu A̱sulazuva a ca le e ekere a aza a Filistiya hali a'wan amunga.

2 Vuma ro da̱na̱ ta̱ lo za na a̱ tsu ɗe Manowa a̱ lyuci va̱ Zora. Diga o ugundo wa Dan, ka va̱ yi idari i ɗa i shi waru koto u shi u tsura̱ limatan shi. 3 Reve malingata ma̱ A̱sulazuva ma̱ ta̱wa̱ uba̱ta̱ wu ka'a a̱vu u damma yi, <<Ko na vu ri idari waru koto vu tsura̱i limatan shi, vu ta̱ tsura̱ a̱a̱tsuma̱ reve vu matsan ulobo. 4 Gogo vu ka̱mbuwa̱ ugbozu, she vu sowo masayan ma̱ ina̱bi wan, ko ili i na yaa zuwa wu vo o'wo usowu ko ke'en wan, ko vu lyuwa ili i na i ri idaba wan. 5 Adama a na vu ta yuwan a̱tsuma̱ reve vu matsan ulobo. She a̱ ju'wa̱n aaci a̱ yi nu utanu wan, adama a na ulobo'o u to o'wo za na a tawai* adama a̱ A̱sula̱ diga a̱ a̱a̱tsuma̱. U teme mawawa ma aza a Isra'ila e ekere a aza a Filistiya.>>

6 Reve ka'a u 'ya̱wa̱ u damma vali va̱ yi, <<Vuma va̱ A̱sula̱ ta̱wa̱ ta̱ ya̱'a̱ va̱. U rotso ta̱ malingata ma̱ A̱sula̱, u ta̱ wovon. Me ece yi uba̱ta̱ u na wu uta̱i shi, agba waru u damma aala a̱ yi shi. 7 Amma u damma mu ta̱, <Vu ta yuwan a̱a̱tsuma̱ a̱vu vu matsan mawun mo ulobo. Adama o ndolo, she vu sowo masayan ma̱ ina̱bi wan, ko ili i na ya zuwa wu vo o'wo usowu wan, waru she vu lyuwa ili yi idaba wan, adama a na mawu'un u to o'wo za na a tawai a̱ tyo e ekere a̱ A̱sula̱ diga a̱ a̱a̱tsuma̱ a̱ tyo a mantsa mo ukwa̱.> >>

8 A̱vu Manowa yuwan avasa a̱ tyo uba̱ta̱ wa̱ A̱sulazuva u damma:<<Zagbain m pati wu ta̱, lyawa vuma va̱ A̱sula̱ za na vu lyunguyi a̱ ta̱wa̱ uba̱ta̱ u tsu u ta̱wa̱ u rito tsu cine tsaa kungwato mawun ma na aa matsaan.>>

9 A̱vu A̱sula̱ a uwwa avasa a Manowa, reve malingata ma̱ A̱sula̱ ma̱ ta̱wisa̱ uba̱ta̱ wu ka'a a̱yi lo nden a atsusa. Agba Manowa vali va̱ yi da̱na̱ lo oɓolo na̱ a̱yi shi. 10 A̱vu ka'a u suma u jika̱ a̱vu u damma vali va̱ yi, <<Apa nda vuma na ta̱wa̱i uba̱ta̱ u va̱ urana u lo'o, u ta̱wisa̱ ta̱ uba̱ta̱ u va̱!>>

11 A̱vu Manowa 'yon a̱vu u toni ka va̱ yi. Ana u ta̱wa̱i uba̱ta̱ u vuma'a, a̱vu u damma, <<A̱vu ɗaɗa vuma na yuwain adanshi na̱ ka va̱'a̱?>>

A̱vu u usu, <<A̱mu ɗaɗa.>>

12 Ɗaɗa Manowa aa damma, <<Na adanshi a̱ wu a̱ ta̱wa̱ a shiwan, cine tsa ɗa tsaa kungwato mawu'un, nye waru waa yuwan?>>

13 Reve malingata ma̱ A̱sulazuva ma damma Manowa, <<Ili i na n dammai ka'a lyawa u kuru le suru. 14 She u lyuwa ili i na a yuwain nu umatsun wa ataci, ko u sowo masayan ma̱ ina̱bi ko ili i na yaa zuwa yi wo o'wo usowu, ko u lyuwa ili yi idaba wan. U toni ili i na n damma niyi.>>

15 Ɗaɗa Manowa dammai malingata ma̱ A̱sulazuva'a, <<Yuwan ankuri she vu ka̱ra̱ ne'e wan lyawa tsu paɗaa wu meggbele.>>

16 Reve malingata ma̱ A̱sulazuva ma damma Manowa, <<Ko shi vu geshe mu pa, maa lyuwa ilyalya ya̱ wu shi. Amma na̱ vu foɓo kucci vu ukula̱tosu, to a̱vu vu ca A̱sulazuva.>> Adama a na Manowa gura reve a na malingata ma̱ A̱sulazuva ma ɗa shi.

17 Reve Manowa ece malingata ma̱ A̱sulazuva'a, <<Cine tsa ɗa aala a̱ wu, adama na adanshi a̱ wu a shiwan tsu cuwa wu?>>

18 Reve malingata ma̱ A̱sulazuva ma damma yi, <<Adama a̱ nye ve ece numu aala a̱ va̱? U la'a ta̱ ucira u na vee reve.>> 19 Reve Manowa tara meggbele na̱ kucci vi ishina, reve u ca A̱sulazuva kucci a aatali. Reve A̱sulazuva a yuwan a̱ba̱jini e ili ya asalama, Manowa na̱ ka va̱ yi a̱ka̱nla̱. 20 Reve ana elentsu a akina a̱ 'yoyin a̱ tyo zuva diga a masa'a, a̱vu malingata ma̱ A̱sulazuva'a mo toni elentsu a akina'a. Ana e enei ne Manowa na̱ ka va̱ yi a̱ riya̱ ta̱ ma̱kpa̱ɓa̱. 21 Ana malingata ma̱ A̱sulazuva mo rocoyi aciya̱yi waru shi ya Manowa na̱ ka va̱ yi, Manowa gura ta̱ reve a na malingata ma̱ A̱sulazuva ma ɗa ma̱ da̱na̱i.

22 A̱vu Manowa damma ka va̱ yi, <<Na amayun tsu ta̱ kuwa̱, adama a na tse enei A̱sula̱!>>

23 Agba ka va̱ yi usu yi ta̱, <<Na̱ A̱sulazuva a̱ shi a ciga wu una tsu, u shi a̱ usu kucci vu ukula̱tosu na̱ za vi ishina e ekere a̱ tsu shi, ko u roco tsu ili i nda ko u ka̱mbuwa̱ tsu ili i nda suru shi.>>

24 A̱vu ka'a u matsan ulobo, reve u ɗe yi Samuson. Reve u kungwa a̱vu A̱sulazuva a zuwaa yi aba'un. 25 Reve Ruhu va̱ A̱sulazuva e teme a yuwusan ulinga na̱ a̱yi, a̱yi a̱tsuma̱ a Mahane Dan, e memere ma̱ Zora na̱ Eshitawo.