1 Urana u ro Samuson 'ya̱wa̱ ta̱ Timna, reve we ene ɗe usheli wa aza a Filistiya. 2 Ana u ka̱mba̱i o u'wa reve u ka̱mbuwa̱ dada va̱ yi na̱ mma va̱ yi u damma, <<Me ene ta̱ usheli wa aza a Filistiya ɗe Timna, n ciga ta̱ i taraa mu a̱yi wo o'wo ka va̱.>>

3 Amma dada va̱ yi na̱ mma va̱ yi a damma yi ta̱, <<Babu usheli a̱tsuma̱ e imaci ya̱ wu, ko a̱tsuma̱ a ama a̱ tsu suru? Cine tsa ɗa she na̱ vu 'ya̱wa̱ vu zami ka a̱tsuma̱ a aza a na koto a paɗai uryumbu shi, aza a Filistiya?>>

Amma Samuson damma ta̱ dada va̱ yi, <<Taraa numu a̱yi. A̱yi ɗa za na uwa numu o okolo.>> 4 Dada va̱ yi oɓolo na̱ mma va̱ yi e reve a na ifoɓi ya̱ A̱sulazuva a ɗa shi, adama a na u ta zama ure u na waa yuwan uvon na aza a Filistiya, adama a na a mantsa mo ndolo ele ɗa aa yuwusain tsugbain tsa ama a Isra'ila. 5 Ɗaɗa Samuson na̱ dada va̱ yi oɓolo na̱ mma va̱ yi a̱ ka̱ra̱i a̱ tyo Timna. Ana a rawai a̱ a̱ɗuma̱ a ina̱bi a Timna, a̱vu makamu ma̱ zura̱ yi a̱ ma̱gugwa̱. 6 A̱vu Ruhu va̱ A̱sulazuva a̱ cipa̱a̱ yi nu ucira, a̱vu u karalai kamu'u ne ekere cine vuma aa karalai meggbele. Agba u damma dada ko mma va̱ yi ili i na u yuwain shi. 7 Reve u 'ya̱wa̱ u yuwan adanshi na̱ ka'a, reve gba u uwa o okolo a Samuson a̱bunda̱ lon.

8 Ana a tarai mamantsa, a̱vu u 'ya̱wa̱ adama u zuwa yi, reve u ɓatsa adama we ene lipu vu kamu na wu unai. A̱tsuma̱ a̱ yi a̱vu we ene pe ishiki na abaji e ishiki. 9 Reve u kene ne ekere a̱ yi, a̱vu reme e peɗishe a̱yi a mmalu. Ana u cinai nan dada va̱ yi, a̱vu u ne'e le fo, a̱vu ele fo e peɗe. Agba u damma le a na u kenei ishiki'i a̱ a̱a̱kwa̱kwa̱ a̱ lipu vu kamu shi.

10 A̱vu dada va̱ yi 'ya̱wa̱ we ene usheli'i. Ɗaɗa Samuson foɓoi a̱buki ɗe, ne ɗa muwun mo olobo n tsu yuwusan. 11 Ana aza a Filistiya e ene niyi, ɗaɗa a ɗangulai olobo mata'atsu a̱ da̱nu oɓolo na̱ a̱yi.

12 Reve Samuson damma le, <<Lyawa n yuwaan ɗu cu'un yitele iro. Ni i gura damma mu ko nye i ɗa, a̱tsuma̱ a rana cindere va̱ a̱buki'i, n ta ca ɗu amuna o okoro mata'atsu ni itana yu otosu i ro ko'o mata'atsu. 13 Amma gba ni i gura damma mu shi, to, i ta ca mu amuna o okoro mata'atsu ni itana yu otosu ko'o mata'atsu.>>

Reve a damma yi, <<Damma tsu cu'un yitele ya̱ wu, tsa̱ra̱ tsu uwwa yi.>>

14 Reve u damma le, <<A̱tsuma̱ a liwi, ili i malya yu uta̱i. A̱tsuma̱ a za vu ucira ili ya̱ a̱limu yu uta̱i.>> Agba a̱tsuma̱ a rana ta'atsu a gura ca ucuɗuwu u yitele i ndolo shi.

15 O urana wa̱ na̱shi ɗaɗa a dammai ka va Samuson, <<Vu kpara vali va̱ wu u damma tsu ucuɗuwu u yitele i ndolo, na̱ ne ɗa shi tsu ta̱ kula̱to wu oɓolo nu u'wa wa dada va̱ wu. I banu tsu ta̱ pa a̱buki a nda adama i yuwan tsu a'usa?>>

16 A̱vu ka va Samuson vowon yi e shoshen yi a̱vu u damma, <<A̱vu de vu 'yuwan mu ta̱! Vu ciga mu na amayun shi. Vu yuwaan ta̱ ama a̱ tsu cu'un yitele i ro, agba vu damma mu ucuɗuwu wa̱ yi shi.>>

Ɗaɗa u damma niyi, <<Amayun koto n cuɗuwa dada ko mma va̱ shi. Cine tsa ɗa maa cuɗuwa wu a̱yi?>> 17 A̱tsuma̱ a rana cindere va̱ a̱buki o ndolo, a̱vu u da̱na̱ e mesun a̱ ma̱ka̱ka̱n ma̱ yi, ɗaɗa o urana we cindere u damma niyi, adama a na u damaton niyi a̱bunda̱ lon. Ɗaɗa gba u 'ya̱wa̱i u dammai ama a̱ yi ucuɗuwu u yitele'e.

18 Kafu urana u koto o urana we cindere'e, ɗaɗa ama a̱ lyuci'i a damma niyi, <<Ili i ne i ɗa i la'ai ishiki a̱limu? Waru ili i ne i ɗa i la'ai kamu ucira?>> Reve Samuson damma le, <<Ni i shi i yuwan iluma na̱ a̱na̱wun a nan va̱ shi, i shi a gura tsura̱ ucuɗuwu wu cu'un yitele i va̱ shi.>>

19 A̱vu Ruhu va̱ A̱sulazuva a̱ cipa̱a̱ yi nu ucira, ɗaɗa u 'ya̱wa̱i Ashikelon uba̱ta̱ u na wu unai ama mata'atsu, a̱vu u pura̱ a̱tugu e le a̱vu u ca aza a na a damma niyi ucuɗuwu u yitele'e. Nu upan wa̱ a̱bunda̱ a ɗa u ka̱mba̱i o u'wa wa dada va̱ yi. 20 A̱vu a tara ka va Samuson, ɗaɗa a cayi za ta̱ a̱tsuma̱ o olobo a na a̱ da̱na̱i oɓolo na̱ a̱yi'i za na shi i'utsa̱ i lolo va̱ yi.