1 Urana u ro reve Na'omi a̱na̱wa̱ le a damma yi, <<Usheli u va̱, maa zamiya wu u'wa, uba̱ta̱ u na a̱a̱ ka̱lyuwa̱ wu ulobonu shi? 2 Buwaza eedenge a̱ tsu a ɗa shi, za na vu shi oɓolo na agbashi e esheli a̱ yi shi? Ana'an nu ulivu u ta faba ishina o ufabata wi ishina. 3 Vu sumba̱ a̱vu vu sukuma mani'in ma̱ ma̱guru. Reve vo oto itana ya̱ wu i na i la'ai ulobonu. A̱vu vu ka̱ra̱ a̱ cipa̱ a̱ tyo uba̱ta̱ wu faba vi ishina, agba she vu lyawa u reve a na vu ri lo wan, she nu koto alya no oso. 4 A mantsa ma na woo von vu ka̱lyuwa̱ uba̱ta̱ u na u voyin. A̱vu vu 'ya̱wa̱ vu palu'wa ana a̱ yi a̱vu vu von. U ta damma wu ili i na vaa yuwan.>>

5 Reve Rutu usu, <<N ta yuwan ili ina vu dammai biti.>> 6 Ɗaɗa u ka̱ra̱i a̱ cipa̱ uba̱ta̱ wu faba vi ishina, a̱vu u yuwan cine a̱na̱wa̱le a damma niyi suru. 7 A̱vu ana Buwaza kotoi alya no oso, reve okolo a̱ yi a uwwa uyo'o, reve u 'ya̱wa̱ u von ɗe o ukosu wo oɓolo e ishina. Reve Rutu rawa ben u palu'wa ana a̱ yi a̱vu von. 8 Na ayin uɓatsu reve Buwaza dada'wan, a̱vu u vadala a̱vu we ene ka nven a ana a̱ yi. 9 A̱vu u damma, <<A̱vu ɗa zane?>> A̱vu Rutu usu, <<A̱mu ɗa aagbashi a̱ wu Rutu. Buba̱ruwa̱ umuna wa̱ wu vu pala aagbashi a̱ wu, adama a na a̱vu ɗa eedenge a̱ zuzu za va atsupu.>> 10 Reve u damma, <<A̱sulazuva a zuwaa wu aba'un, usheli u va̱. Isa'ani i nda i la'a ta̱ za na vu rocoi numu nu ufaru, a na vu toniyi olobo shi, za vu ulambu ko za vu utsuru. 11 Adama o ndolo, she vu uwwa wovon wan usheli u va̱. N ta yuwaan wu ili i na vu cigai suru. Ama a̱ lyuci nda suru e reve ta̱ a na a̱vu ka va̱ a̱ɓula̱ a ɗa. 12 Agba ko na wo o'woi amayun a ɗa a̱mu a̱mu eedenge a̱ zuzu a na aa tsupaa wu ɗa, za ro ta̱ lo na la'a numu zuzu na waa tsupa. 13 Isawan pa na ayin a nda, reve nu usana nnu u ciga u tsupaa wu, u lobono ta̱, lyawa u tsupa. Agba nu u ciga u tsupa shi, n kucina ta̱ na̱ wuma wa̱ A̱sulazuva n ta tsupa. Von pa hali she nu usana u tawa.>> 14 Ɗaɗa u voyin zuzu na ana a̱ yi hali she usana. Agba reve u 'yon kafu mantsa ma na aa gura reve vuma, adama a na u damma yi ta̱, <<She vu lyawa e reve a na ka ta̱wa̱i uba̱ta̱ wu faba vi ishina wan.>> 15 Reve Buwaza damma yi, <<Ta̱wa̱ na̱ gele na vu nla̱i vu poloi pa nda.>> Ana u polo niyi a̱vu u kunzu makundatsu mo oroci a yitabo uta̱li reve u tsuwa̱n yi. Reve u tanu yi, a̱vu u ka̱mba̱ a̱ lyuci. 16 Ana u ka̱mba̱i ya̱ a̱na̱wa̱le, Na'omi ece ta̱, <<Cine tsa ɗa a yuwain, usheli u va̱?>> Reve u ka̱mbuwa̱ yi ili i na Buwaza yuwaan niyi suru. 17 U damma, <<A̱yi ɗa u ca numu makundatsu uta̱li mo oroci a yitabo i nda, u damma, <She vu ka̱mba̱ uba̱ta̱ wa̱ a̱na̱wa̱ a̱ ɗu ekere lya̱nga̱ wan.> >> 18 Reve Na'omi damma yi, <<Puro usheli u va̱, she vee ene ili i na yaa fara. Adama a na vuma'a we ivuwan shi she na addama'a o koto ana'an.>>