1 Ana a yuwain reve Buwaza ka̱ra̱ a̱ tyo o una̱ntsu reve u da̱nu ɗe. Ana eedenge za va atsupu, na Buwaza yuwain ɗe adanshi a rawai zuzu, ɗaɗa Buwaza dammai, <<I'utsa̱ i va̱ ta̱wa̱ zuzu, vu da̱nu pa nda.>> Reve u vadala u 'ya̱wa̱ u da̱nu. 2 Reve Buwaza ɓoloto azagbain a̱ lyuci ama kupa, reve u damma le a̱ da̱nu. A̱vu a̱ da̱nu. 3 A̱vu u damma za va atsupu'u, <<Na'omi na ka̱mba̱i diga e iɗa ya Mowa, u ta awina e iɗa yi za tsu Elimele. 4 N jiyan ta̱ n yuwaan wu adanshi a̱vu n ca a̱sa̱la̱ a̱ ma̱ka̱ka̱n a aza a na a̱ ri lo nden lo, na̱ a̱ ma̱ka̱ka̱n ma azagbain ama a̱ va̱. Na̱ vaa tsupa yi, vu tsupa. Na̱ vaa tsupa gba shi, vu damma mu, tsa̱ra̱ n reve. Adama a na babu za na ri nu ucira she a̱vu goon, she waru a̱mu na moo tono.>> Ɗaɗa u dammai, <<N ta tsupa yi.>> 5 Reve Buwaza damma, <<Urana u na vu tsulai iɗa i ndolo e ekere a̱ Na'omi ne ekere a̱ Rutu za va Mowa, vu ta tara ma̱runa̱ ma za na kuwa̱i, ne ɗa waa zuwa aala a za na kuwa̱i oɓolo ni itana ya̱ yi a lyuwa elime.>> 6 Adama o ndolo a̱vu a̱yi eedenge za va atsupu'u u damma, <<Maa tsupa yi adama a aciya̱va̱ shi, adama a na na̱ n yuwan ne, n ta̱ lungusa̱ agadu a̱ va̱. Vu tsupa yi na aciya̱wu, a̱mu maa tsupa yi shi.>> 7 Ɗe nu ufaru a̱tsuma̱ a Isra'ila, adama a atsupu nu uvadalasa wi itana yo o'wo amayun, vuma tsu foɗo ta̱ aatan a̱ yi reve u ca za vu ushishi. Tsundolo tsa ɗa ure u na a tsu yuwan a̱tsuma̱ a Isra'ila a̱vu ili'i wo o'wo amayun. 8 Reve za va atsupu damma Buwaza, <<Tsulaa aciya̱wu.>> Reve u foɓo aatan a̱ yi. 9 Reve u damma azagbain na akapi a ama, <<Suru nɗu yu uwwa ta̱ ana'an a na n tsulai e ekere a Na'omi ili i na i ri ili ya Elimele ne e ekere a̱ muwun ma̱ yi, Kiliyon na̱ Malo. 10 Waru n tara ta̱ Rutu, za va Mowa za na da̱na̱i ka va Malo wo o'wo ka va̱. A̱yi nda ɗa aa zuwa iɗa ni itana ya̱ a̱a̱kwa̱kwa̱'a̱, nu ugundo wa̱ yi u lyuwa elime a̱tsuma̱ a ama a̱ yi, waru a̱tsuma̱ a̱ lyuci va̱ yi. Yo o'wo ta̱ esu ana'an.>> 11 Ɗaɗa azagbain na aza a na a̱ da̱na̱i lo o una̱ntsu suru a dammai, <<Tsoo o'wo ta̱ esu. Lyawa A̱sulazuva a̱ ka̱mba̱to ka na ri lo a̱ ta̱wa̱ o u'wa wa̱ wu wo o'wo tsa Rikatu oɓolo na̱ Liyatu, aza a na o shitoyin u'wa wa Isra'ila. Lyawa vu bala a̱tsuma̱ a̱ Efarata e reve wu a̱tsuma̱ a Batalami. 12 A̱sulazuva a ca wu muwun na̱ ka nda aza a na oo o'wo tsu nkaya n tsu Fere, ulobo u na Tamar matsayin Yahuza.>>

13 Tsundolo tsa ɗa Buwaza zuwai Rutu, reve u tara yi a̱ tyo o u'wa wa̱ yi wo o'wo ka va̱ yi. Reve u von na̱ a̱yi reve A̱sulazuva a ca yi a̱a̱tsuma̱, reve u matsan mawun mo ulobo. 14 A̱vu a̱ma̱ci a̱ lyuci'i a damma Na'omi, <<Ica a̱ tyo uba̱ta̱ wa̱ A̱sulazuva, za na hali ana'an koto u lyawa nuwu babu eedenge za va atsupu shi. Lyawa mawun ma nda ma̱ tsura̱ ala a̱tsuma̱ a Isra'ila! 15 U to o'wo za na a̱ ka̱mba̱to wuma wa̱ wu usa'avu, za na a̱ ka̱lyuwa̱ wu a mantsa ma na vu kutsai. Adama a na a̱yi mawun me jene va̱ wu ma ɗa, za na ciga nuwu za na waru la'aa nuwu olobo e cindere e ekere a̱ wu.>>

16 A̱vu Na'omi kasa mawu'un, a̱vu u kungwato yi tsa mawun ma̱ yi. 17 Reve nron mu nden ma̱ a̱ma̱ci n damma, <<Ulobo u nda a matsaan ta̱ Na'omi.>> Ɗaɗa a ca niyi aala Obe. Obe ɗa matsain Yese, Yese ɗa waru matsain Da̱wuda. 18 Apa cine ugundo we Pere u ri. Pere ɗa matsain Hezeron. 19 Hezeron ɗa matsain Ram. Ram ɗa dada va Aminada. 20 Aminada ɗa dada va̱ Nashon. Nashon ɗa dada va Salmon. 21 Salmon ɗa dada va Buwaza. Buwaza ɗa dada va̱ Obe. 22 Obe matsan ta̱ Yese, a̱vu Yese matsan Da̱wuda.