1 Nkaambo mbukunga mulawu ulijisi pesi munzwiide biyo wazintu zibotu zichiza kwiinda chachibumbwa chachoonzyo chazyiitiko eezi, teengachilaba pe, azipayizyo nzizyo eezyo zipegwa lubbe munyaka amunyaka, zilulamika aabo baswena afwiifwi. 2 Muli chimwi chiindi, teenikuli bakaleka kuzipeda, kuti bakombi kabali bakasalazigwa, nikuli tabachiyeeyi limbi pe achibi? 3 Pesi muzipayizyo eezi kuli chiyubulusyo chachibi munyaka amunyaka. 4 Nkaambo tachikonzeki pe kuti bulowa bwabasipule ampongo bugwisye zibi.

5 Nkikaako, Kkirisitu naakaza munyika wakati,

"Zipayizyo azipo eezyo nzimutakwe mwakayanda,

pesi mwakandibambila mubili;

6 teemwakabotelwa pe muzipayizyo zyakuumpa

azipayizyo zyachibi.

7 Eelyo ndakati, ‘Laanga, ndili aano

ndaza kuzoochita kuyanda kwako, O Leza,’

mbuli mbukulembedwe atala andime mubbuku lyamulawu."

8 Naakamba eezi zili atala kuti, "Inywe tamuyandi nikuba kubotelwa muzipayizyo azipo zyakuumpa azipo zyachibi" eezi zipegwa mukwiinda kumulawu, 9 eelyo wakayungizya wati, "Laanga, ndaza lino, kuzoochita kuyanda kwako." Ujeya chitaanzi kuchitila kuti atangune chachibili. 10 Alimwi ankaambo kakuyanda ooko twakasalazigwa mukwiinda achipayizyo chamubili waJesu Kkirisitu kamwi kwalyoonse.

11 Alimwi mupayizi woonse ulayimikila buzuba abuzuba kumulimu wakwe, kapayizya zipayizyo zyiindulidwe zikozyene, zitakonzyi kugwisya zibi pe. 12 Pesi Kkirisitu naakamana kupeda kwachiindi choonse chipayizyo chimwi chazibi, wakakkala aansi kuluboko lwakululyo lwaLeza, 13 eelyo ulalindila mane basinkondonyina bakachitwe chuuno chamawulu aakwe. 14 Nkaambo achipayizyo chimwi kwachiindi choonse wakalulamika aabo bakasalazigwa.

15 Alimwi Muuya Usalala waamba kuti ujisi bukamboni kulindiswe kuti,

16 "Eechi nchiichizuminano nchindiyoochita ambabo

mumazuba aayo, mbwaamba Mwami,

ndiyobikka milawu yangu amyoyo yabo,

akwiilemba mumiyeeyo yabo,"

17 eelyo ulayungizya lubo kati, "Tandikwe kuyoyeeya zibi zyabo amilimu yabo mibi limbi pe." 18 Ooko kuli kulekelelwa kwazeezi, takuchikwe kupayizigwa kwachibi limbi pe.

19 Nkikaako, bakwesu, mbukunga tujisi busichaamba bwakunjila Mubusena Busalalisya abulowa bwaJesu, 20 anzila mpya ipona njaakatujulida mukwiinda muchisitilizyo, chaamba kuti, kwiinda mumubili wakwe. 21 Alimwi mbukunga tujisi mupayizi mupati waŋanda yaLeza, 22 ngatuswene afwiifwi amoyo wachoonzyo uzwide lusinizyo luzwa kulusyomo, amyoyo yesu kiisansidwe kayisalala kuzwa kumuyeeyo wabubi amibili yesu kiisambide ameenda loko. 23 Ngatujatisye kulyambilila kwabulangilizi bwesu butakwe kusunzuluka, nkaambo ooyo wakatusyomezya ulisyomekede; 24 alimwi ngatugame kusungwazyaniya umwi awumwi kuluyando amilimu mibotu, 25 peepe kuleka kubungana, mbuli bamwi mbubachita, pesi kusungwazya umwi awumwi, alimwi kapati mbuli mbumubona kuti Buzuba oobo buli afwiifwi.

26 Nkaambo kuti twabisya achaali katuli twatambula luzibo lwakasimpe, takuchikwe chipayizyo chimbi chichicheede chazibi, 27 pesi lubeta luyoosya, abukali bwamulilo wakuumpya basinkondonyina baLeza. 28 Kufumbwa muntu utyola mulawu waMozesi ulajeegwa kakutakwe luse pe kubukamboni bwabakamboni babili nikuba batatu. 29 Nchisubulo chiindilide biyeni nchimuyeeya kuti uyoojana ooyo muntu ulyata mawulu aMwana Mulombe waLeza, akutalemeka bulowa bwachizuminano oobo mbwaakasalazigwa aabo, akutukila Muuya waluzyalo? 30 Nkaambo tulimuzi ooyo wakati, "Kubweedezya nkukwangu, ndiyoliya." Alimwi alubo, "Mwami uyoobeteka bantu bakwe." 31 Nchintu chiyoosya kuwida mumaanza aLeza upona.

32 Pesi ngamuyeeye mazuba akayinda, kamuli mwamwinikilwa, mwakakakatila inkondo mpati akupenzegwa, 33 muli chimwi chiindi kamupenzegwa akusukuusigwa antanganana, achimwi chiindi kamuli kubasungwaazya abaabo bakali kuchitwa oobo. 34 Nkaambo mwakali aluzyalo kubaange, alimwi mwakazumina alukondo nimwakali kubwezelwa buvubi bwanu, mbukunga mwakalizi kuti inywe lwanu mujisi buvubi bulimbubo alimwi bukkalilila. 35 Nkikaako mutasowi busichaamba bwanu, buli ampindu mpati. 36 Nkaambo inywe mweelede kuba alukakatilo, kuti mwachita kuyanda kwaLeza muyootambula eecho chakasyomezegwa.

37 "Eelyo mbukunga mukayindi kaniini,

alimwi ooyo uza uyooza

takwe kuyoochedwa pe;

38 pesi basalali bangu bayoopona alusyomo,

alimwi kuti wabweeda musule,

muuya wangu tuukwe kuyoobotelwa pe mulinguwe."

39 Pesi tatuli bankamu ibweedela musule pe abanyonyoonwa, pesi tuli bankamu yalusyomo akubamba myuuya yesu.