1 Nchiinchicho nchitweelede kuswiilizya kapati kuli eezyo nzitwakamvwa, kuchitila kuti tutasunzulusigwi kuzwa kulindulo. 2 Nkaambo kuti ijwi lyakaambwa abaangelo kuli bamataata besu lyakali lyachoonzyo kufumbwa utakwe wakaliswiilizya nikuba kulitobelezya watambula chisubulo chimweelede, 3 eelyo tuyoochija biyeni kuti twasiya lufutuko lupati oolu? Lufutuko oolu lwakaambwa lutaanzi mukwiinda muMwami, alimwi lwakasinizigwa kuti ndwachoonzyo kulindiswe abaabo bakamumvwa. 4 Alakwe Leza wakapa bukamboni azitondeezyo amalele azigambyo zisiyene alimwi azipo zyaMuuya Usalala nzyakaabila mukwiinda mukuyanda kwakwe.

5 Nkaambo Leza teekwakali kubaangelo pe ooko nkwakafwiinsya inyika ichiyobuza, eeyo njitwaambuula. 6 ✝ Pesi kwakaambwa bukamboni mumalembe kuti,

"Muntu niinzi O Leza ngulikataazya atala anguwe,

nikuba mwana amuntu, ooyo ngubamba?

7 Wakamuchita kuti abe munsi lyabaangelo kwakayindi kaniini,

mpawo wakamusamika abulemu akulemekwa,

8 wakabikka zyoonse munsi amawulu aakwe."

Lino mukubikka zintu zyoonse munsi lyakwe, Leza takukwe nchaakasiya pe anze abweendelezi bwakwe. Mbuli mbukubede, tatuna bona zintu zyoonse pe zili munsi abweendelezi bwakwe. 9 Pesi tubona Jesu, ooyo kwakayindi kaniini wakabikkwa munsi kwiinda baangelo, lino usamikidwe abulemu akulemekwa nkaambo kakupenzegwa kwalufu, kuchitila kuti aluzyalo lwaLeza Jesu akafwe nkaambo kabantu boonse.

10 Nkaambo kwakali kweelela kuti we Leza, nkaambo kakwe alimwi mulinguwe zintu zyoonse mpuzili, mukweeta bana bayingi kubulemu, kuti abe mutaanzi wakweeta lufutuko lwabo lululeme mukwiinda mukupenzegwa.

11 Nkaambo kufumbwa usalazya abaabo basalazigwa boonse bajisi chisiko chimwi. Nchiinchicho nchatakwe bweeme kubayita kuti nimpuli iimwi, 12 ✝ waamba kuti,

"Ndiyoobaambila bantu bakulindiswe anzuwachita,

mukati kambungano ndiyokulumbayizya."

13 ✝ Alimwi alubo waamba kuti, "Ndiyobikka lusyomo lwangu muliLeza." Alimwi alubo waamba kuti, "Ndili aano, abana aabo Leza mbaakandipa."

14 Nkikaako mbukunga bana balaabilana mumubili amubulowa, we lwakwe Jesu mbukubede wakaba muchiimo chamubili mbuli mbabo, kuchitila kuti mukwiinda mulufu akonzye kunyonyoona ooyo ujisi inguzu zyalufu, kaali nguwe, Sikuchenga, 15 alimwi kuti aangunune aabo bakali mubuzike buumi bwabo boonse nkaambo kakuyoowa lufu. 16 ✝ Nkaambo choonzyo tagwasyi ankaambo kabaangelo pe pesi ankaambo kazyalane lyaAbburahamu. 17 Nkikaako wakaleelede kuchitwa mbuli babunyina munzila yoonse, kuchitila kuti abe mupayizi mupati uli aluse akusyomeka mumulimu waLeza, kuti abe chipayizyo chazibi zyabantu. 18 Nkaambo we lwakwe wakapenzegwa naakasunkwa, eelyo ulakonzya kugwasya aabo basunkwa.