1 Lino nikuba chizuminano chitaanzi chakali amilawu yakukomba abusena busala bwaanyika. 2 Nkaambo idyumba lyakali lyabambwa, lyakunze, oomo mwakali chibikkilo chazimwinikisyo atebuli achinkwa chipayililwa kuBuliwo bwakwe, chitegwa Busena Busalala. 3 Kusule lyachisitilizyo kwakali busena bwachibili mudyumba butegwa Busena Busalalisya, 4 bwakali achipayililo changolide chatununkilizyo abbokesi lyachizuminano livumbidwe mabazu woonse angolinde, lyakali anongo yangolide yakali nyampwide mana, amusako waAroni ooyo wakali syuukide, amabwe mapapali abili achizuminano; 5 atala abbokesi kwakali maKkerubbimu abulemu akali vumbide chuuno chaluse. Atala azintu eezi lino tatukonzyi kwambuula zinikide pe.

6 Kubambilila ooku kwakali kuchitwa kale, bapayizi bakali kunjila choonse chiindi mudyumba lyakunze, kabachita milimu yabo; 7 pesi mubusena bwamukati mupayizi mupati luzutu nguunjila, alimwi unjila kamwi amunyaka, alimwi peepe katabwezede bulowa oobo bwakulipayilila azibi zyabantu nzibakachita akulubizya kwabantu. 8 Acheechi Muuya Usalala ulatondeezya kuti inzila iya mubusena busalala tiinajulwa kufumbwa idyumba taanzi kalichiliwo 9 eechi nchitondeezyo chachiindi eechino. Eechi chaamba kuti, zipo azipayizyo zilapedekezegwa eezyo zitakonzyi kululamika miyeeyo yamukombi, 10 pesi zibeleka biyo azyakulya akunywa azimwi zyakulisalazya zisiyene, milawu yamubili ilabikkwa mane kuchiindi chakubukuluka.

11 Pesi Kkirisitu naakaliboniya mbuli mupayizi mupati wazintu zibotu eezyo zyaza kale, eelyo mukwiinda mudyumba pati alyiindilide kukubota peepe lyakachitwa amaanza abantu, zyaamba kuti, peepe lyabulenge oobu 12 wakanjila kamwi kwalyoonse muBusena Busalala, kabwezede peepe bulowa bwampongo akanamani pesi bulowa bwakwe lwakwe, ooko nkuyanduula kunununwa kwalyoonse. 13 Nkaambo kuti abulowa bwampongo abasipule akusansiilwa adyota lyampwizi kwabantu basofwede kakusalazya kukusalazigwa kwamubili, 14 buyoyinda biyeni bulowa bwaKkirisitu, ooyo mukwiinda aMuuya walyoonse wakalipeda lwakwe katakwe kampenda kuli Leza, ngamusalazye miyeeyo yanu kuzwa mumilimu ifwide kuti mukutawukile Leza upona.

15 Nkikaako nguusimwiimaakati wachizuminano chipya, kuchitila kuti aabo bayitwa bakatambule chisyomezyo chalukono lutamani, mbukunga lufu lwakwe lwakaba oolo lubanununa kuzwa kuzibi zyakachitwa munsi achizuminano chitaanzi.

16 Nkaambo aawo alikwaabanisigwa kwalubono, lufu lwayooyo wakaluchita lweelede lube abukamboni. 17 Nkaambo kuyanda kubeleka luzutu kulufu, mbukunga takuli kwakwaangila kufumbwa luzutu ooyo wakaluchita kachipona. 18 Mbukunga nikuba chizuminano chitaanzi teechakachitwa kakutakwe bulowa. 19 Nkaambo malayilile woonse amulawu naakaambulwa aMozesi kubantu boonse, wakabweza bulowa bwatunamani ampongo, ameenda abuluba busalala akatabi kamusamu utegwa hisopu, alimwi wakasansiila ibbuku lwalyo abantu boonse, 20 kati, "Oobu mbuubulowa bwachizuminano Leza nchaakamulayilila kuti muchiswiilile." 21 Alimwi munzila njiyeeyo wakasansiila abulowa idyumba azibelesyo zyoonse zyakali kubelesegwa mukukomba. 22 Choonzyo, aansi amulawu zintu zyiingi zyazyo zisalazigwa abulowa, alimwi kakutakwe kutilwa kwabulowa taakwe kulekelelwa kwazibi pe.

23 Aboobo kwakaleelede kuti zikozyanisyo zyazintu zyakujulu kazisalazigwa mbuli oobu, pesi zintu zyakujulu lwazyo ziyanda zipayizyo zilimbubo kwiinda eezi. 24 Nkaambo Kkirisitu wakanjila, peepe mubusena busalala bwakachitwa amaanza abantu pe, nchichikozyanisyo biyo chakasimpe, pesi kujulu lwako, lino ulaliboniya mubuliwo bwaLeza mubusena bwesu. 25 Nikuba kuti wakaleelede alipede lwakwe twindulwidwe, mbuli mupayizi mupati mbwanjila Busena Busalalisya munyaka amunyaka abulowa butali bwakwe; 26 nkaambo eelyo wakaleelede kupenzegwa twiindulwidwe kuzwa kuntalisyo yanyika. Pesi mbuli mbukubede, wakaliboniya kamwi kwalyoonse kumamanino achiindi kuti agwisye chibi akulipayizya. 27 Alimwi mbuli mbuchakasalwa nkaambo kabantu kuti bafwe kamwi, alimwi kunembo aboobo kuza lubeta, 28 aboobo Kkirisitu, kaabilidwe kamwi kuti abweze zibi zyabayingi, uyooliboniya kachibili, peepe kuzoolangana azibi zyabantu bayiingi pesi kuzoofutula aabo bamulindila achabusungu.