1 Nkikaako atuleke injiisyo yantalisyo yaKkirisitu mpawo tuyinke kunembo kukukomena, peepe kubikka lubo intalisyo yakusanduka kuzwa kumilimu itola kulufu ayalusyomo kunembo lyaLeza, 2 anjiisyo atala alubbapatizyo, kubikka maanza, kubuka kwabafu, alubeta lutamani. 3 Alimwi eechi tuyoochichita kuti Leza wazumizya.

4 Nkaambo tachikonzyeki kubweedezya lubo kukusanduka kwabaabo bakali bamwinikilwa kale, bakalabila chipo chakujulu, mpawo baba bamwi baMuuya Usalala, 5 alimwi bakalabila bubotu bwajwi lyaLeza anguzu zyachiindi chichiza, 6 kuti eelyo balipeda kukuleya, mbukunga bagankamina Mwana Mulombe waLeza akuyanda kwabo akumusonsya antanganana.

7 Nkaambo inyika yakanywa imvula eeyo iwa lyoonse atala anjiyo, akuzyala michelo iyandika kulibaabo mbiyakaliminwa, itambula chilongezyo kuli Leza. 8 Pesi kuti yazyala maamvwa azinchenya, tayigwasyi pe alimwi ngayaba afwiifwi kutukwa; mamanino aayo nkuumpwa.

9 Nibayandwa, nikuba twaambule oobu, kakuli kuti muchiimo chanu, tumvwa choonzyo azintu zilimbubo eezyo zyalufutuko. 10 Nkaambo Leza tapilingene kapati mbuli kuti alube milimu yanu aluyando ndumwakatondezya nkaambo kakwe mukuwutawukila basalali, mbuli mbumuchichita. 11 Alimwi tuyandisya kuti awumwi wanu atondeezye chiyandisyo chikozyene mukuyeeya lusinizyo luzulide lwabulangilizi mane kumamanino, 12 kuchitila kuti mutabi bakandu, pesi mube bayiiya aabo mukwiinda mulusyomo amoyo mulamfu bayookona zisyomezyo.

13 Nkaambo Leza naakachita chisyomezyo kuli Abburahamu, mbukunga taakachilikwe mupati pe wakukonka aawe, wakakonka alwakwe, 14 kaamba kuti, "Choonzyo ndiyookulongezya akukuvuzya." 15 Alimwi nguAbburahamu, kaali wakakakatila chamoyo mulamfu, wakajana chisyomezyo. 16 Bantu bakonka abapati kwiinda lwabo, alimwi mukukazyana kwabo koonse chikonke nchichisinizyo chakumamanino. 17 Aboobo Leza naakayanda kutondeezya zyiindilide kukombelezya kuli basikukona chisyomezyo chiimo chitasanduki chamulimu wakwe, wakali kuzichita achikonke, 18 kuchitila kuti mukwiinda muzintu zibili zitasanduki, muli eecho Leza nchatakonzyi kutondeezya kuti nchakubeja, iswe nitwakachija kukuyuba ngatulaba ansungwaazyo ilaanguzu kukumweya bulangilizi bubikkidwe kunembo lyesu. 19 Tujisi eechi mbuli choonzyo andombondeya yaMuuya mpawo chiliimvwi, bulangilizi oobo bunjila mukati kusule kwamudabba wachisitikizyo chabusena busalala, 20 ooko Jesu nkwakayinka mbuli simweenda kunembo nkaambo kesu, kaali waba mupayizi mupati walyoonse mukwiinda mumabambe aMelikkizedeki.