1 Yuba mɔn yi a fala, a naxa,

"N yengin dasama,

n ma siimayaan yi ɲan,

gaburun dɔxi n yɛɛ ra.

2 Magele tiine n nabilinni yati,

e fa fuma n ma, n mi nɔɛ xiyɛ."

3 "Ala, i bata tolimaan naxan maxɔdin n ma,

i yɛtɛɛn xa na so n yii.

Xa i tan mi a ra,

nde gbɛtɛ n ma donla goronna tongɛ?

4 Bayo i bata xaxinla birin ba n xɔyine yi,

na ma, i nama tin e xa nɔɔn sɔtɔ.

5 E luxi nɛn

alo muxun naxan yanfan soma a xɔyine xili ma,

na yi findi tɔrɔn na a diine xa."

6 "Muxune n magelema e sigine yi,

e dɛgen namini n yɛtagi.

7 N yɛɛne bata yidimi sununi,

n fati bɛndɛn bata yelefu ayi alo a nininna.

8 Muxu faɲine na n to,

n kiin yi e ratɛrɛna,

sɔntarene xɔlɔma n ma,

e yi n yatɛ Ala kolontaren na.

9 Koni, tinxin muxune xa lu e kiraan xɔn,

naxanye sariɲan, ne sɛnbɛn sɔtɔma nɛn.

10 Koni ɛ tan, ɛ xɛtɛ, ɛ mɔn xa fa.

N mi fekolon toma ɛ yɛ.

11 N ma siimayaan bata ɲan,

n ma wanle bata kala,

n waxɔn feene bata kala.

12 N xɔyine a falama, e naxa,

a kɔɛɛn findima nɛn a yanyin na,

fitirin na so, e fala a subaxan na a ra.

13 N xa n yigi sa laxira yi tun ba,

n na n sama dimini dɛnaxan yi?

14 N falan tima nɛn n gaburun xa

alo a tan nan n fafe ra.

N falan ti kunle xa

alo e tan nan nga nun n magilɛn na.

15 Nayi, n yigin minɛn?

Nde n yigin toɛ?

16 Yigin laxira yi ba,

nxu birin na siga nxu sa nxu sa burunburunni?"