1 "Nanfera Ala Sɛnbɛ Kanna mi kiti waxatine saxi?

Nanfera naxanye a kolon

ne mi a toma kelɛ muxu ɲaxine xili ma?

2 Muxu ɲaxine xɛ bɔxɔne danne fari sama,

e xuruseene muɲama,

e yi e raba,

3 e kiridin nan ma sofali suxuma,

e kaɲa gilɛn nan ma ɲinge makankanma tolimani,

4 e tɔrɔ muxune radinma ayi kiraan xɔn,

yamanan yiigelitɔne birin e luxunma e bun."

5 "Yiigelitɔne sigama e wanla ra nɛn,

e sa e donseen fen burunna ra,

e sa e diine balon fen

alo burunna sofanle tonbonni.

6 E sa e xuruseene balon fen

muxu gbɛtɛye xɛɛne ma,

e lu ɲaxudene manpa bogi dɔnxɛne makentunɲɛ.

7 E ragenle nan xima kɔɛɛn na,

dugi mi e ma,

bitingan mi e yii xunbenla ra.

8 Tulen naxan fama geyane fari,

na e bɔnbɔma xunbenli,

banxi mi e yii,

e saxi fanyene nan ma."

9 "Muxu ɲaxine yiigelitɔna diin tongoma a yii doli saranna ra,

hali kiridina,

e xasunma xiɲɛn na a nga yii.

10 Yiigelitɔne ragenla nan sigama,

dugi mi e ma,

hali e to malo xidine maxali,

kamɛna e ma,

11 e oliwi turen bama muxu gbɛtɛne sansanne kui,

e walima manpa rafaladeni,

koni e mi nɔɛ sese minɲɛ.

12 Muxune faxamatɔɔn wugama taani,

muxu maxɔlɔxine wugama e mali feen na,

anu na fe mi findɛ tɛrɛna fe ra Ala xa."

13 "Kɛnɛnyaan naɲaxu muxu ɲaxine ma,

kira yiyalanxin mi rafan e ma,

e mi sigama a xɔn.

14 Faxa tiin kelima sogen godo waxatin nin,

a yi yiigelitɔɔn nun tɔrɔ muxun faxa,

a muɲan ti kɔɛɛn na.

15 Yalunden ɲinbanna nan mamɛma,

a a falama nɛn, a naxa,

‘Muxu yo mi n toma,’

a yi a yɛtagin luxun.

16 Muɲaden banxin dɛɛn kalama kɔɛɛn nan na,

yanyin na, a yɛtɛ mabalan a konni,

a mi kɛnɛnna kolon.

17 Na muxune yanyin fɔlɔma sogen godo waxatin nin,

e bata dari kɔɛɛn magaxu feene ra."

18 "Koni ɛ tan a falama, ɛ naxa,

‘Ɲaxuden xalima nɛn

alo se yelefuxina igen xun ma,

a dɔxɔden yi findi yire dangaxin na bɔxɔn fari,

a mɔn mi fa walima a manpa bili xɛɛn ma.

19 Balabalan kɛsɛne xuyama ayi kii naxan yi sogen na,

yulubi kanne sigama na kii nin laxira yi.

20 Hali naxanye e barixi,

ne ɲinanma nɛn e xɔn,

e findi donseen na kunle xa,

e fe falan mɔn yi dan.

Nanara, tinxintareyaan kalama nɛn

alo wudin na bira.’ "

21 " ‘Na muxune ɲaxalan gbantane tɔrɔxi nɛn,

e mi kaɲa gilɛne mali.

22 Koni Ala nɔɛ sɛnbɛmane raxɔrɛ a sɛnbɛni nɛn,

a na keli, a muxu ɲaxine halagi.

23 Ala ne luma bɔɲɛ xunbenla nun marakantanni,

koni a yɛɛn tima nɛn e sigati kiin na.

24 Na muxune sabatima nɛn waxati di,

koni na xanbi ra, e lɔ ayi,

e kɔnkɔrɔnma nɛn

alo ɲɔxɔnde xarena,

e xun sinma nɛn

alo se tɔnsɔnna xaba daxina.’ "

25 "Xa a mi na kiini,

nde n matandɛ,

a n ma falan nakala ayi?"