1 Yuba mɔn yi falan ti, a naxa,

2 "N bata n kɔlɔ habadan Ala yi,

naxan tondixi n ma kitin sɛ,

Ala Sɛnbɛ Kanna

naxan n niin nafexi xɔlɛn na,

3 xa n niin mɔn n yi,

xa Alaa foyen mɔn soma n ɲɔɛni,

4 n bata n kɔlɔ

n dɛɛn mi tinxintareya falan tiyɛ,

wule yo mi minɛ n dɛ.

5 Na miriyaan makuya n na,

n xa ɲɔndin fi ɛ ma.

Han n yi faxa,

n mi n ma fɛtareya wanle kalɛ,

6 n luma nɛn tinxinni,

n mi a beɲinɲɛ mumɛ,

n xaxinla mi n yalagɛ n ma simayani mumɛ!"

7 "N yaxun nan lan a yatɛ ɲaxuden na,

naxan kelima n xili ma,

na xa yatɛ tinxintaren na!

8 Ala kolontarena a yigin sama nanse yi,

Ala na a niin ba a yi?

9 Tɔrɔn na fa a ma,

Ala a gbelegbele xuiin namɛ ba?

10 A sɛwan sɔtɛ Ala Sɛnbɛ Kanna yii ba?

A Ala maxandɛ waxatin birin ba?"

11 "Iki, n na Ala sɛnbɛn yitama nɛn ɛ ra,

n mi Ala Sɛnbɛ Kanna miriyane luxunma ɛ ma.

12 Ɛ birin bata a to ki faɲi,

nayi, nanfera ɛ yɛtɛ luma fe fuune yi?"

13 "Ala nan kɛɛni ito ramaraxi ɲaxuden xa,

ɲaxankata tiin naxan sɔtɔma Ala Sɛnbɛ Kanna yii fa fala:

14 Xa e diine wuya,

e faxama yɛngɛn nin,

donseen yi dasa e yixɛtɛne ma.

15 Naxanye na lu e xanbi ra,

furen yi ne faxa,

e kaɲa gilɛne mi e wugama.

16 Hali e gbeti fixɛn makɔ

alo burunburunna,

e nun dugina alo borona,

17 tinxin muxune nan e dugine ragodoma e ma,

sɔntarene nan e gbeti fixɛni taxunma e ra.

18 E banxine kala ɲaxun

alo dondoli xuyenna,

alo kantan muxuna bubuna.

19 E sama nɛn nafulu kanyani,

koni a danna nan na ra,

e na xulun,

e lima nɛn sese mi na.

20 Gaxuna e ratɛrɛnama nɛn

alo fufana,

wuluwunla yi e xasun kɔɛɛn na.

21 Sogeteden foyen yi e tongo,

a yi e xali wulani,

a yi e ba e dɔxɔdeni,

22 a yi e radinɲɛ ayi kininkinintareyani,

e yi e gi a sɛnbɛn bun ma.

23 Yamaan yi e yii bɔnbɔ e magele feen na,

muxune yi kolin e dɔxɔde fonne birin kala kii ma."