1 Yuba mɔn yi falan ti, a naxa,

2 "I fatan sɛnbɛtarene maliyɛ yati!

I bata fa fangatarene malideni!

3 I fatan fekolontaren kawandɛ,

i yi a maxadi han!

4 Koni i ya falane tima nde xa?

I falani itoe tongoxi nde yii?"

5 "Faxa muxune niine xuruxurunma Ala yɛɛragaxuni laxira yi,

naxanye bɔxɔ bun igene bun.

6 Ala yɛɛn laxira yiren birin na,

hali sayani muxe mi e luxunɲɛ a tan ma.

7 Ala nan kore xɔnni fulunxi na yigenla xun ma,

a bɔxɔn singan na yigenli.

8 Ala tulen namarama kundani,

koni kundane mi kalama igen binyen bun.

9 A yi a mangaya gbɛdɛn luxun,

a yi a kundaan sa a yɛɛ ma.

10 Ala yi digilinna sa fɔxɔ igen xun ma,

naxan dan findixi kɛnɛnna nun dimin naralanden na.

11 Kore xɔnna sɛnbɛtɛnne xuruxurunma,

e kabɛ Alaa xɔlɔn ma.

12 Ala bata fɔxɔ igene nɔ a sɛnbɛni,

a yi ige yi ninginangan Raxabi faxa a xaxilimayani.

13 A foyen bata kore xɔnna fixa,

a bata ige yi sube ɲaxin faxa a yiin na,

saɲin naxan a gima.

14 A wali xurine nan itoe ra,

nxu a ɲununɲunun xuiin nan tun mɛma.

Nayi, nde nɔɛ a sɛnbɛn galan xuiin kolonɲɛ?"